.jpg)
តាអូស្ត្រាលី James Bernard King ត្រូវចាប់ឃុំខ្លួន។ រូបថត នគរបាល
ព្រះសីហនុៈ បុរសជនជាតិអូស្ត្រាលីម្នាក់ត្រូវបានសាលាដំបូងខេត្តព្រះសីហនុ ចោទប្រកាន់ពីបទបង្ខាំងមនុស្សខុសច្បាប់ ដែលអាចប្រឈមមុខនឹងការជាប់ពន្ធនាគារពី ១ ទៅ ៣ ឆ្នាំ បន្ទាប់ពីត្រូវបានសមត្ថកិច្ចចាប់ខ្លួន ខណៈដែលបុរសរូបនេះ ត្រូវបានចោទប្រកាន់ថា បានចាក់សោទ្វារផ្ទះបង្ខាំងមិត្តស្រីរបស់ខ្លួន ប្អូនស្រី មិត្តស្រីដែលមានកូន ២ នាក់ និងក្មួយស្រីម្នាក់ទៀត មិនឱ្យចេញពីផ្ទះ ដើម្បីបង្ខំឲ្យរួមភេទជាមួយគាត់។
លោក James Bernard King អាយុ ៦៩ ឆ្នាំ ត្រូវបានប៉ូលិសចាប់ខ្លួន កាលពីព្រឹកថ្ងៃទី ២៨ ខែធ្នូ ដោយត្រូវចោទថា បានចាក់សោបង្ខាំងមិត្តស្រីរបស់គាត់ ដែលមានឈ្មោះ យូ គា អាយុ ៣៨ ឆ្នាំហើយប្អូនស្រីរបស់មិត្តស្រីគាត់ឈ្មោះយូ ចាំងរ៉េត អាយុ ២៧ ឆ្នាំ និងក្មួយស្រីឈ្មោះទូច រតនា អាយុ ២២ ឆ្នាំនិងកូនប្រុសកូនស្រីរបស់អ្នកនាង ចាំង រ៉េត ពីរនាក់ផ្សេងទៀត ដែលម្នាក់មានអាយុ ២ ឆ្នាំ និងម្នាក់ទៀត មានអាយុ ៦ ឆ្នាំនៅពេលពួកគេបានមកលេងផ្ទះនោះកាលពីថ្ងៃទី ២៧ ខែធ្នូ។
លោក គៀត ច័ន្ទថារិទ្ធ អ្នកនាំពាក្យនគរបាលជាតិ បានថ្លែងថា៖«នៅពេលយប់លោក King បានចាក់សោទ្វារផ្ទះ ហើយមិនអនុញ្ញាតឱ្យមនុស្សទាំងនោះចេញក្រៅទេ»។
លោកបញ្ជាក់ថា៖«គាត់បានដាក់លក្ខខណ្ឌថា មិត្តស្រីរបស់គាត់ ត្រូវតែចម្អិនអាហារសម្រាប់គាត់ ហើយ[ប្អូនស្រី និងក្មួយស្រីរបស់អ្នកនាងគា] ត្រូវតែចូលទៅក្នុងបន្ទប់ហើយរួមភេទជាមួយគាត់ បើមិនដូច្នោះទេ គាត់នឹងមិនអនុញ្ញាតឱ្យពួកគេចាកចេញពីផ្ទះរបស់គាត់ឡើយ»។
អស់រយៈពេលជាច្រើនម៉ោង ជនរងគ្រោះទាំង ៥ នាក់ បានសុំអង្វរលោក King ដែលមិនមានអាវុធជាប់នឹងខ្លួនឲ្យអនុញ្ញាតឱ្យពួកគេចេញក្រៅ មុនពេលពួកគេទាក់ទងទៅសាច់ញាតិ រួចហើយក៏បានជូនដំណឹងដល់អាជ្ញាធរ។
ប៉ូលិសបានចំណាយពេល២ម៉ោង ដើម្បីសម្របសម្រួល ជាមួយលោក King ឲ្យចាក់សោទ្ធារ ប៉ុន្តែលោក King មិនព្រមតាមការស្នើសុំរបស់សមត្ថកិច្ចឡើយ លុះដល់ម៉ោង ១២ និង ១៥ នាទី សមត្ថកិច្ចបានសម្រេចកាត់សោទ្វារ។ ជនរងគ្រោះទាំង ៥ នាក់ បានស្ថិតនៅក្រោមការឃុំខ្លួនពីលោក King អស់រយៈពេលប្រហែល១០ ម៉ោងប៉ុន្តែជនរងគ្រោះគ្មានរបួសស្នាមអ្វីនោះទេ។
អ្នកស្រីគា ដែលជាមិត្តស្រីរបស់លោក King បានរៀបរាប់ថា៖«ក្មួយស្រី និងក្មួយតូចៗរបស់ខ្ញុំពួកគេភ័យខ្លាចខ្លាំងណាស់ពួកគេបានឱបម្តាយរបស់ពួកគេនិងឱបខ្ញុំប៉ុន្តែគ្មាននរណាម្នាក់ ត្រូវបានរំលោភបំពានផ្លូវភេទទេ»។
ព្រះរាជអាជ្ញាសាលាដំបូងខេត្តព្រះសីហនុ លោកស្រី ចាត សូរស្មី បានបញ្ជាក់កាលពីម្សិលមិញថា លោក King ត្រូវបានចោទប្រកាន់ពីបទបង្ខាំងមនុស្សខុសច្បាប់ដែលអាចមានទោសជាប់ពន្ធនាគារ ពី ១ ឆ្នាំទៅ ៣ ឆ្នាំ ហើយឥឡូវនេះ រឿងក្តីនេះ គឺកំពុងស្ថិតនៅក្នុងដៃរបស់ចៅក្រមស៊ើបអង្កេត៕ NS
