.jpg)
អគារមជ្ឈមណ្ឌលជាតិប្រយុទ្ធនឹងជំងឺគ្រុនចាញ់។ រូបថត សហការី
ភ្នំពេញៈ ទិវាជាតិប្រយុទ្ធនឹងជំងឺគ្រុនចាញ់នឹងត្រូវធ្វើឡើងនៅថ្ងៃទី ២៥ ខែមេសា ក្រោមប្រធានបទ «គ្មានជំងឺគ្រុនចាញ់ផ្ដើមចេញពីខ្ញុំ» ខណៈចាប់តាំងពីឆ្នាំ ២០១៨ រហូតដល់បច្ចុប្បន្ន កម្ពុជាមិនមានករណីស្លាប់ដោយសារជំងឺនេះឡើយនឹងបានដាក់ផែនការលុបបំបាត់ឲ្យបានទាំងស្រុងនៅឆ្នាំ ២០២៥។ នេះបើតាមលិខិតរបស់លោកនាយករដ្ឋមន្ដ្រី ហ៊ុន សែន ចេញក្នុងឱកាសនៃការប្រារព្ធទិវានេះ។
លោកនាយករដ្ឋមន្ដ្រីថ្លែងតាមរយៈលិខិតនេះថា ទិវាគ្រុនចាញ់ពិភពលោក ក្រោមប្រធានបទគ្មាន «ជំងឺគ្រុនចាញ់ផ្ដើមចេញពីខ្ញុំ» នេះសមស្របនឹងដំណើរវិវត្ដន៍នៃសភាពការណ៍សង្គមសេដ្ឋកិច្ចរបស់កម្ពុជាដែលកំពុងពង្រីកការអភិវឌ្ឍតាមព្រំដែន និងតំបន់អេកូទេសចរណ៍ធម្មជាតិព្រៃភ្នំដែលនៅប្រឈមនឹងអត្រាឈឺស្លាប់ដោយជំងឺគ្រុនចាញ់នេះនៅឡើយ។
លោកថ្លែងថា កម្ពុជាកំពុងអនុវត្ដអភិក្រមការងារលុបបំបាត់ជំងឺគ្រុនចាញ់ឆ្នាំ ២០១៦-២០២០ ដែលជាផ្នែកមួយនៃផែនការយុទ្ធសាស្ដ្រជាតិ លុបបំបាត់ជំងឺគ្រុនចាញ់ក្នុងព្រះរាជាណាចក្រកម្ពុជាឆ្នាំ ២០១១-២០២៥ ដែលជាផែនទីបង្ហាញផ្លូវ និងបង្កលក្ខណៈងាយស្រួលដល់ការប្រតិបត្ដិជាក់ស្ដែងឈានឆ្ពោះទៅលុបបំបាត់ជំងឺគ្រុនចាញ់ទូទាំងប្រទេស។
លោកនាយករដ្ឋមន្ដ្រីបញ្ជាក់ថា៖ «តាមប្រភពរបាយការណ៍កម្មវិធីជាតិប្រយុទ្ធនឹងជំងឺគ្រុនចាញ់ព្រះរាជាណាចក្រកម្ពុជាបានបង្ហាញថា ប្រទេសកម្ពុជា លែងមានករណីស្លាប់ដោយសារជំងឺគ្រុនចាញ់ចាប់ពីឆ្នាំ ២០១៨ រហូតមកដល់បច្ចុប្បន្ននេះបានន័យថាសម្រេចបានជោគជ័យ ៣ ឆ្នាំមុនគោលដៅគ្រោងទុកឆ្នាំ ២០២០»។
របាយការណ៍កម្មវិធីជាតិប្រយុទ្ធនឹងជំងឺគ្រុនចាញ់បង្ហាញថា កាលពីឆ្នាំ ២០១៩ ករណីឈឺជំងឺគ្រុនចាញ់ប្រភេទហ្វាល់ស៊ីប៉ារ៉ូម (ប្រភេទសន្ធំ) និងចម្រុះ មាន ៤ ៩៩០ ករណី គឺបានថយចុះ ៧២ ភាគរយ បើធៀបនឹងឆ្នាំ ២០១៨ ដែលមានអ្នកឈឺរហូតដល់ ១៨ ០៥៧ ករណី។
លោក ហ៊ុន សែន បញ្ជាក់ថា៖ «សមិទ្ធផលទាំងនេះកំពុងតែបង្ហាញឱ្យឃើញនូវសញ្ញាវិជ្ជមានលើប្រសិទ្ធភាព និងគុណភាពខ្ពស់លើរាល់កិច្ចការអន្តរាគមន៍របស់យើង ឆ្លើយតបការប្រយុទ្ធនឹងជំងឺគ្រុនចាញ់ ដើម្បីឈានទៅសម្រេចជោគជ័យបានទាំងស្រុង លើការលុបបំបាត់ជំងឺគ្រុនចាញ់គ្រប់ប្រភេទនៅឆ្នាំ ២០២៥ និងក៏ជាបុព្វហេតុមួយក្នុងការចូលរួមចំណែកឈានទៅសម្រេចគោលដៅអភិវឌ្ឍន៍សហស្សវត្សរ៍កម្ពុជាយើងផងដែរ»។
លោកបន្ថែមថា រាជរដ្ឋាភិបាលតែងបានផ្ដល់លទ្ធភាព និងលើកទឹកចិត្ដឱ្យមានចលនាកៀរគរប្រមូលប្រភពធនធានដើម្បីជំរុញការងារប្រយុទ្ធនឹងជំងឺគ្រុនចាញ់ឱ្យកាន់តែមានសកម្មភាពខ្លាំងក្លាថែមទៀតឆ្ពោះទៅលុបបំបាត់ជំងឺនេះឱ្យបានតាមផែនការកំណត់ បើទោះបីជាបច្ចុប្បន្នពិភពលោករួមទាំងប្រទេសកម្ពុជាកំពុងប្រឈមនឹងវិបត្ដិជំងឺកូវីដ១៩ ក៏ដោយ។
លោកបន្តថា៖ «ដូច្នេះយើងត្រូវយកចិត្ដទុកដាក់ខ្ពស់ទាំងអស់គ្នាលើចំណុចទាំងនេះដើម្បីលើកកម្ពស់សុខភាពគុណភាពនៃការរស់នៅ និងសេចក្ដីថ្លៃថ្នូររបស់ប្រជាជនយើង»។
លោក ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រនៃក្រសួងសុខាភិបាលថ្លែងកាលពីថ្ងៃអង្គារម្សិលមិញថា ក្នុងរយៈពេល ៣ ឆ្នាំចុងក្រោយនេះគឺកម្ពុជាទទួលបានជោគជ័យរួចជាស្រេចគឺមិនមានអ្នកស្លាប់ដោយសារជំងឺគ្រុនចាញ់នេះទេ។
លោកបន្តថា៖ «ជាគោលដៅដែលរាជរដ្ឋាភិបាលកំពុងកំណត់ក្នុងការឈានទៅលុបបំបាត់ឱ្យបាននោះគឺគ្រុនចាញ់សន្ធំ ឬក៏ហ្វាល់ស៊ីប៉ារ៉ូមនេះដែលជាប្រភេទគ្រុនចាញ់ដែលបានកើតឡើងហើយអាចបណ្ដាលឱ្យមនុស្សស្លាប់បានខណៈគ្រុនចាញ់ប្រភេទនេះក្នុងរយៈពេល ៣ ខែ ឆ្នាំ ២០២០ គឺមានការកើតឡើងប្រមាណតែ ២០០ ករណី ប៉ុន្ដែអាចគ្រប់គ្រងបានទាំងស្រុងមិនបណ្ដាលឱ្យមានអ្នកស្លាប់ឡើយ»។
លោក រ៉េកុល បន្តថានេះជាសញ្ញាមួយដែលបញ្ជាក់ថា កម្ពុជានៅតែបន្ដសកម្មភាពបានយ៉ាងប្រសើរដូចមុនពេលមានវិបត្ដិជំងឺកូវីដ១៩ នៅលើសកលលោកដូចគ្នាដែរ។ សម្រាប់មធ្យោបាយផ្សេងៗក្នុងការលុបបំបាត់ជំងឺនេះទាំងថវិកាធនធានមនុស្ស និងសម្ភារជាពិសេសថ្នាំសម្រាប់សម្លាប់មេរោគគ្រុនចាញ់នេះគឺយើងមាននៅក្នុងដៃអាចធានាសុវត្ថិភាពបានរហូតទៅដល់ពាក់កណ្ដាលឆ្នាំ ២០២១៕
