ក្រចេះ: សាលាដំបូងខេត្តក្រចេះបានសម្រេចឃុំខ្លួនជនសង្ស័យ ២ នាក់ កាលពីថ្ងៃទី ៣១ មករា ពាក់ព័ន្ធករណីជួញដូរគ្រឿងញៀន ខណៈម្នាក់ទៀតត្រូវបានបញ្ជូនទៅមណ្ឌលបន្សាបគ្រឿងញៀនខេត្ត បន្ទាប់ពីសមត្ថកិច្ចនៃអធិការដ្ឋាននគរបាលក្រុងក្រចេះឃាត់ខ្លួនជាមួយនឹងគ្រឿងញៀន ៦ កញ្ចប់តូចនៅសង្កាត់-ក្រុង-ក្រចេះកាលពីថ្ងៃទី ២៩ មករា។
ក៏ប៉ុន្តែពាក់ព័ន្ធនឹងករណីនេះ ភ្នំពេញ-ប៉ុស្តិ៍មិនអាចសុំការបញ្ជាក់ពីលោក ទីវ វុធធេន ដែលជាអ្នកនាំពាក្យចៅក្រមនៃសាលាដំបូងខេត្តក្រចេះបានទេ កាលពីម្សិលមិញដោយលោកប្រាប់ថានៅថ្ងៃសម្រេចនោះលោកបានសុំច្បាប់សម្រាក ។ រីឯ លោក ជា សុភ័ក្រ អ្នកនាំពាក្យផ្នែកអយ្យការ (ផ្នែកព្រះរាជអាជ្ញា) ក៏មិនអាចសុំការអត្ថាធិប្បាយបានដែរ ដោយទូរស័ព្ទរបស់លោកមិនមានអ្នកទទួល។
យ៉ាងណាលោក ស៊ាង សុភ័ក្រ ប្រធានការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តក្រចេះប្រាប់កាលពីម្សិលមិញថា ជនសង្ស័យទាំងនោះទី១ ឈ្មោះ ក្រេង ចាន់រស្មី អាយុ ២៩ ឆ្នាំ របរជាជាងមាសរស់នៅភូមិ ដូនជ្រាំ សង្កាត់-ក្រុង ក្រចេះ ទី២- ឈ្មោះ សុខ អ៊ីឡន អាយុ ២២ ឆ្នាំ។ ពួកគេត្រូវបានចៅក្រមស៊ើបសួរចោទ និងឃុំខ្លួននៅពន្ធនាគារខេត្ត។ ចំណែកឈ្មោះ អែល រដ្ឋា អាយុ ៣៤ ឆ្នាំ ជាមន្ត្រីនៃមន្ទីរសុខាភិបាលខេត្តនេះត្រូវបានតុលាការបង្គាប់ឲ្យនគរបាលប្រគល់ឲ្យមន្ត្រីនៃមណ្ឌលបន្សាបគ្រឿងញៀនខេត្ត។ ជនទាំង ៣ នាក់នេះ ត្រូវបានសមត្ថកិច្ចរបស់លោកតាមដានជាច្រើនថ្ងៃមុនឃាត់ខ្លួន ព្រោះពួកគេជាមុខសញ្ញាចាស់ តែឃាត់ខ្លួនបាននៅទីតាំងផ្សេងគ្នា។
លោកថា៖ «ឈ្មោះ អែល រដ្ឋា តុលាការ បង្គាប់ឲ្យយកគាត់ទៅមណ្ឌលបន្សាបគ្រឿងញៀន ព្រោះតុលាការបញ្ជាក់ថា គាត់គ្រាន់តែប្រើប្រាស់ទេ។ ចំណែក ២ នាក់ទៀតត្រូវតុលាការឃុំខ្លួន និងចោទពីបទជួញដូរគ្រឿងញៀនតាមមាត្រា ៤០ ច្បាប់ស្តីពីការត្រួតពិនិត្យគ្រឿងញៀន»។
លោក ស៊ាង សុភ័ក្រ បានរំឭកប្រាប់ថា ឈ្មោះ អែល រដ្ឋា ក្រោយតុលាការសាកសួររួចក៏សម្រេចឲ្យបញ្ជូនទៅមណ្ឌលបន្សាបគ្រឿងញៀន។ ការឃាត់ខ្លួននេះសមត្ថកិច្ចធ្វើតាមជំនាញពោលគឺពេលចុះប្រតិបត្តិការគឺអ្នកនៅក្នុងដែនសមត្ថកិច្ចត្រូវឃាត់ខ្លួនទាំងអស់ទោះជាអ្នកនោះមិនជាប់ពាក់ព័ន្ធក្ដី។ លុះសួរចម្លើយរួចទើបដឹងថា អ្នកណាជាប់ពាក់ព័ន្ធ ហើយបើអ្នកមិនជាប់ពាក់ព័ន្ធ សមត្ថកិច្ចដោះលែងវិញ។
លោក នេត លីន អធិការនគរបាលក្រុងក្រចេះប្រាប់កាលពីម្សិលមិញដែរថា មុនចាប់ខ្លួនជនសង្ស័យទាំង ៣ នាក់ខាងលើ គឺកម្លាំងបង្កប់របស់លោកបានស៊ើបអង្កេតអស់ជាច្រើនថ្ងៃ។ លុះដល់ថ្ងៃទី ២៩ មករា កម្លាំងបង្កប់បានប្រើវិធីដោយឲ្យ ឈ្មោះ សុខ អ៊ីឡន និង ឈ្មោះ ក្រេង ចាន់រស្មី រកគ្រឿងញៀនលក់ឲ្យចំនួន ៦ កញ្ចប់តូច។ លុះជនសង្ស័យទាំង ២ យកគ្រឿងញៀនប្រគល់ឲ្យសមត្ថកិច្ចក៏ចាប់ខ្លួនតែម្តង។ បន្ទាប់ពីសាកសួរពួកគេក៏ឈានទៅឃាត់ខ្លួន ឈ្មោះ អែល រដ្ឋា ម្នាក់ទៀត។
លោកបញ្ជាក់ថា ក្នុងចំណោមនោះ ឈ្មោះ សុខ អ៊ីឡន ធ្លាប់បានជាប់ពន្ធនាគារម្តងរួចមកហើយពាក់ព័ន្ធជួញដូរគ្រឿងញៀននេះ តែលោកមិនចាំថា គេត្រូវជាប់អស់ប៉ុន្មានឆ្នាំនោះទេ៕