ភ្នំពេញៈ សាលាដំបូងរាជធានីភ្នំពេញ កោះហៅប្រធានមន្ទីរពេទ្យ និងវេជ្ជបណ្ឌិតបម្រើការងារនៅមន្ទីរពេទ្យកុមារជាតិ ២ រូប ឲ្យចូលមកបំភ្លឺនៅតុលាការនៅសប្តាហ៍ក្រោយ ក្រោយពីមានបណ្តឹងពីអាណាព្យាបាលកុមាររងគ្រោះម្នាក់ ដែលបានបាត់បង់ជីវិតនៅក្នុងមន្ទីរពេទ្យនេះ បន្ទាប់ពីមកព្យាបាលជំងឺកាលពីពាក់កណ្តាលខែមុន។
កាលពីទី ១៨ ខែ មិថុនា ឆ្នាំ ២០១៩ ឪពុកម្តាយរបស់កុមាររងគ្រោះដែលមានអាយុ ១៦ ខែ ឈ្មោះ ឡុង ឌីណា ភេទប្រុស បានដាក់ពាក្យប្តឹងប្រធានមន្ទីរពេទ្យកុមារជាតិលោកវេជ្ជបណ្ឌិត ញឹប អង្គាបុស្ស និងវេជ្ជបណ្ឌិតម្នាក់ឈ្មោះ សរ ច័ន្ទចិត្រា ទៅតុលាការពីបទធ្វេសប្រហែសឲ្យកុមារស្លាប់។
លោក អ៊ុំ សុភក្តិ តំណាងអយ្យការអមសាលាដំបូងរាជធានីភ្នំពេញ បានចេញដីកាកោះ ២ ដាច់ដោយឡែកពីគ្នា ចុះថ្ងៃទី ១ ខែ កក្កដា ដោយធ្វើការកោះហៅវេជ្ជបណ្ឌិតទាំង ២ រូបនេះ ឲ្យចូលខ្លួនបំភ្លឺនៅព្រឹកថ្ងៃទី ១៧ ខែ កក្កដា ឆ្នាំ ២០១៩ ពាក់ព័ន្ធបណ្តឹងរបស់ឈ្មោះ ហៃ ឡុង និងឈ្មោះ ចោម ស្រីពៅ ជាអាណាព្យាបាលកុមាររងគ្រោះ។
ដីកាកោះទាំង ២ នោះបានបញ្ជាក់ថា៖ «ឲ្យចូលមកកាន់អយ្យការអមសាលាដំបូងរាជធានីភ្នំពេញ នៅថ្ងៃទី ១៧ ខែ កក្កដា ឆ្នាំ ២០១៩ វេលាម៉ោង ៨:៣០ នាទីព្រឹក ដើម្បីមកបំភ្លឺអំពីដំណើររឿងបណ្តឹងរបស់ឈ្មោះ ហៃ ឡុង និងឈ្មោះ ចោម ស្រីពៅ ចុះថ្ងៃទី ១៨ ខែ មិថុនា ឆ្នាំ ២០១៩ ពីបទធ្វេសប្រហែសឲ្យកុមារស្លាប់»។
ភ្នំពេញប៉ុស្តិ៍មិនអាចទាក់ទង លោក ញឹប អង្គាបុស្ស ប្រធានមន្ទីរពេទ្យកុមារជាតិ ដើម្បីបំភ្លឺជុំវិញករណីនេះបានទេ កាលពីម្សិលមិញ ព្រោះលោក មិនលើកទូរស័ព្ទ។
ប៉ុន្តែយ៉ាងណាលោកវេជ្ជបណ្ឌិត អ៊ុង សុផល ប្រធានផ្នែកជំងឺឆ្លង និងជាអនុប្រធានការិយាល័យបចេ្ចកទេសនៃមន្ទីរពេទ្យកុមារជាតិ បានប្រាប់ភ្នំពេញប៉ុស្តិ៍ថា ករណីនេះ គឺជារឿងមួយដែលក្រុមគ្រូពេទ្យបានប្រឹងប្រែងជួយសង្គ្រោះខ្លាំងណាស់ ប៉ុន្តែដោយសារតែស្ថានភាពកុមារ ស្ថិតក្នុងដំណាក់កាលធ្ងន់ធ្ងរ ម្យ៉ាងកុមាររូបនេះ ក៏មានជំងឺដ៏កាចសាហាវដល់ទៅ ២ រួមគ្នា ទើបធ្វើឲ្យអាការជំងឺ មិនអាចជួយសង្គ្រោះបាន។
ជាមួយនឹងការអះអាងយ៉ាងដូច្នេះ លោក មិនអាចបញ្ជាក់បានទេថា ប្រធានមន្ទីរពេទ្យ និងវេជ្ជបណ្ឌិតទាំង ២ រូបនេះ នឹងចូលទៅបំភ្លឺតាមការកោះហៅរបស់តុលាការឬយ៉ាងណា ប៉ុន្តែក្រោយករណីនេះ ភ្លាមៗ គណៈកម្មការខាងមន្ទីរពេទ្យបានចេញសេចក្តីបំភ្លឺម្តងរួចមកហើយ។
លោក សុផល បានបញ្ជាក់ថា៖ «ជាទូទៅមន្ទីរពេទ្យមួយ គេមានគណៈកម្មការរបស់គេ ដូច្នេះគេពិនិត្យមើលពិនិត្យអី និងការព្យាបាលតាមបច្ចេកទេសរបស់គេត្រឹមត្រូវហើយ ព្រោះមិនមែនព្យាបាលកុមារហ្នឹងតែម្នាក់ទេ យើងបានបំភ្លឺជូនសាធារណជនហើយ ប៉ុន្តែជាធម្មតាក្រោយករណីនេះ គឺយើងមានការប្រជុំបច្ចេកទេសដូចជាសព្វដងអ៊ីចឹង»។
យោងតាមពាក្យបណ្តឹងចុះថ្ងៃទី ១៨ ខែ មិថុនា ឆ្នាំ ២០១៩ របស់អាណាព្យាបាលកុមាររងគ្រោះបានរៀបរាប់ថា កាលពីព្រឹកថ្ងៃទី ១៤ ខែ មិថុនា ឆ្នាំ ២០១៩ ពួកគាត់ បានយកកូនប្រុស ដែលក្តៅខ្លួនទៅព្យាបាលនៅមន្ទីរពេទ្យ កុមារជាតិ។ នៅម៉ោង ១ រសៀលថ្ងៃដដែល គ្រូពេទ្យបានចាក់ថ្នាំ និងព្យួរសេរ៉ូម ឲ្យកូនប្រុសពួកគាត់ ព្រោះក្រោយពិនិត្យឈាមទៅឃើញថា ជាជំងឺគ្រុនឈាមកម្រិតស្រាល។ ស្រាប់តែដល់ម៉ោង ៥ និង ៥៥ នាទី ព្រឹកថ្ងៃទី ១៥ ខែមិថុនា ឆ្នាំ ២០១៩ កូនប្រុសពួកគាត់បានស្លាប់។
លោក ហៃ ឡុង ជាឪពុករបស់កុមាររងគ្រោះ បានប្រាប់ភ្នំពេញប៉ុស្តិ៍ពីម្សិលមិញថា ក្រោយពីកូនប្រុសរបស់ខ្លួនស្លាប់ ស្រាប់តែ លោកវេជ្ជបណ្ឌិត សរ ច័ន្ទចិត្រា និងគ្រូពេទ្យចំនួន ៤ នាក់ទៀត មកសម្រួល និងសន្យាថា មន្ទីរពេទ្យនឹងដោះស្រាយ ដូច្នេះទើបពួកគាត់ព្រមយកកូនទៅធ្វើបុណ្យនៅស្រុកកំណើតឯខេត្តព្រៃវែង។
លោក ឡុង បានថ្លែងបន្តទៀតថា នៅពេលក្រោយមក បែរជាគ្មានការទទួលខុសត្រូវទៅវិញ ទើបពួកខ្លួន សម្រេចដាក់បណ្តឹងទៅតុលាការ ដើម្បីស្វែងរកយុត្តិធម៌ ចំពោះករណីនេះ។
លោក ឡុង បញ្ជាក់ថា៖ «ជារួមកូនអ្នកណាក៏យើងមិនចង់ឲ្យស្លាប់ ហើយពេទ្យនេះ ជាការធ្វេសប្រហែសធ្វើឲ្យកូនខ្ញុំស្លាប់ ខ្ញុំមិនអាចទទួលយកបានទេ កូនខ្ញុំ នៅញ៉ាំបាយអីបាន អង្គុយលេងធម្មតា។ ពេលទទួលព្យាបាល យើងគិតថា ពេទ្យធំ យើងទុកចិត្ត ១០០ ភាគរយ បែរជាយកកូនយើងទៅពិសោធ»។
យោងតាមលិខិតបំភ្លឺរបស់គណៈកម្មការមន្ទីរពេទ្យកុមារជាតិ ក្រោយកើតហេតុការណ៍នេះ បានអះអាងថា គណៈកម្មការមន្ទីរពេទ្យ និងគ្រូពេទ្យជំនាញៗ បានធ្វើការស្រាវជ្រាវបន្តទៅលើសំណាកឈាមរបស់អ្នកជំងឺដែលបានរក្សាទុក ជាលទ្ធផល បានរកឃើញថា កុមាររូបនេះមានលទ្ធផលតេស្តជំងឺ EV71 វិជ្ជមាន ដែលជាជំងឺម្យ៉ាងបង្កឲ្យមានពងបែកមាត់ ដៃ ជើង ហើយវាកាន់តែមានសភាពធ្ងន់យ៉ាងឆាប់រហ័សទៅលើកុមារមានអាយុក្រោម ២ ឆ្នាំ ដែលអាចបង្កឲ្យប៉ះពាល់ប្រព័ន្ធប្រសាទ ឬហើមសួត និងខ្សោយបេះដូង បណ្តាលឲ្យបាត់បង់អាយុជីវិតយ៉ាងឆាប់រហ័ស ស្របពេលកុមាររូបនេះកំពុងមានជំងឺគ្រុនឈាមផងដែរ។
លិខិតបំភ្លឺនោះបញ្ជាក់ថា៖ «មូលហេតុដែលបណ្តាលឲ្យកុមារស្លាប់ ដោយមានហើមសួតយ៉ាងឆាប់រហ័សបណ្តាលមកពីកុមារមានជំងឺ ២ រួមគ្នាគឺ ការបង្ករោគគ្រុនឈាម និង EV71។ គណៈកម្មការមន្ទីរពេទ្យកុមារជាតិ ពិតជាសោកស្តាយជាខ្លាំងដែលមិនអាចជួយសង្គ្រោះកុមារនេះបាន ទោះបីយើងបានសង្គ្រោះកុមាររាប់ពាន់នាក់មកហើយក្តី»។
លោក ហៃ ឡុង ដែលត្រូវជាឪពុកកុមាររងគ្រោះបានអះអាងថា ពួកខ្លួនទាមទារឲ្យមន្ទីរពេទ្យទទួលខុសត្រូវចំពោះហេតុការណ៍នេះ និងសងសំណងជំងឺចិត្តដល់ខ្លួនចំនួន ៣២ ០០០ ដុល្លារ ព្រមទាំងសង្ឃឹមថា តុលាការ នឹងផ្តល់យុត្តិធម៌តាមផ្លូវច្បាប់ចំពោះការបាត់បង់អាយុជីវិតរបស់កូនប្រុសខ្លួន ព្រោះតែការធ្វេស ប្រហែសរបស់ក្រុមគ្រូពេទ្យទាំងនោះនៅក្នុងមន្ទីរពេទ្យ៕