.jpg)
បេក្ខជននិស្សិតចៅក្រមពេលប្រឡងកន្លងមក។ រូបថត ក្រសួងយុត្តិធម៌
ភ្នំពេញៈ បេក្ខជនប្រឡងជាប់សិស្សចៅក្រមជំនាន់ទី ១០ ចំនួន ៥៥ រូបស្នើឲ្យរដ្ឋមន្ត្រីក្រសួងយុត្តិធម៌ចាត់វិធានការលើបេក្ខជនម្នាក់ ខណៈបេក្ខជនរូបនោះក៏ត្រូវបានតុលាការកោះហៅឲ្យចូលបំភ្លឺជុំវិញបទចោទចំនួន ៣ ករណីក្រោយបង្ហោះវីដេអូមួយទាក់ទងនឹងភាពមិនប្រក្រតីនៃការប្រឡងសិស្សចៅក្រមជំនាន់ទី ១០ ដែលប្រព្រឹត្តទៅកាលពីអំឡុងខែវិច្ឆិកា។
ញត្តិដែលដាក់ជូនរដ្ឋមន្ត្រីក្រសួងយុត្តិធម៌លោក អង្គវង្ស វឌ្ឍានា ភ្ជាប់ជាមួយស្នាមមេដៃបេក្ខជនប្រឡងជាប់ចំនួន ៥៥ រូបកាលពីថ្ងៃទី ៣ ខែកុម្ភៈ បានឲ្យដឹងថាក្នុងនាមពួកគេជាសិស្សចៅក្រមជំនាន់ទី ១០ នៃរាជបណ្ឌិត្យសភាវិជ្ជាជីវៈតុលាការសូមបង្ហាញការគាំទ្រទាំងស្រុង ចំពោះកិច្ចដំណើរការ និងលទ្ធផលនៃការប្រឡងប្រជែងជ្រើសរើសសិស្សចៅក្រមនេះ។ ការប្រកាសគាំទ្រនេះត្រូវពួកគេអះអាងថា ដោយសារពួកគេទាំង ៥៥ រូបបានចូលរួមប្រឡងដោយប្រើប្រាស់សមត្ថភាពផ្ទាល់ខ្លួនក្នុងគ្រប់ដំណាក់កាលនៃការប្រឡងទាំងវិញ្ញាសាសរសេរ និងវិញ្ញាសាផ្ទាល់មាត់ដោយគ្មានការស៊ីសំណូកសូកប៉ាន់ ដើម្បីជាប់ក្នុងការប្រឡងជ្រើសរើសសិស្សចៅក្រមនោះឡើយ ដោយក្នុងនោះអ្នកមានសមត្ថភាពចំណេះដឹងលើសគេ គឺជាប់។
បេក្ខជនទាំងនោះបញ្ជាក់ក្នុងញត្តិថា៖ «ដើម្បីបញ្ជាក់អំពីភាពស្អាតស្អំ និងយុត្តិធម៌ យើងខ្ញុំទាំងអស់គ្នាជាសិស្សចៅក្រមជំនាន់ទី ១០ នៃរាជបណ្ឌិត្យសភាវិជ្ជាជីវៈតុលាការសូមគោរពស្នើសុំឯកឧត្តម អង្គវង្ស វឌ្ឍានា រដ្ឋមន្ត្រីក្រសួងយុត្តិធម៌មេត្តាចាត់វិធានការចំពោះបុគ្គលឈ្មោះ គង់ ប៊ុនរិទ្ធិ និងបក្ខពួកទៅតាមនីតិវិធីច្បាប់ជាធរមាន»។
ក្រៅពីបញ្ជាក់យ៉ាងដូច្នេះបេក្ខជនទាំងនោះក៏បានច្រានចោលព័ត៌មានទាំងអស់ ជុំវិញការបង្ហោះនៅលើគណនីហេ្វសប៊ុករបស់ឈ្មោះថា Bunrith Kong ផងដែរដោយអះអាងថា ការបង្ហោះរបស់បុគ្គលរូបនេះ គ្មានការពិត និងមានចេតនាធ្វើឲ្យប៉ះពាល់ដល់សេចក្តីថ្លៃថ្នូររបស់ពួកគេ និងស្ថាប័នទាំងមូល។
វីដេអូឃ្លីបដែលមានរយៈពេល ៧ នាទី ដែលបង្ហោះនៅលើគណនីហ្វេសប៊ុករបស់ឈ្មោះ Bunrith Kong កាលពីថ្ងៃទី ២៦ ខែមករា បានរៀបរាប់ពីសកម្មភាព និងនីតិវិធីនៃការប្រមូលលុយពីបេក្ខជនចំនួន ៥០ រូប ដោយធ្វើយ៉ាងណាឲ្យបានគ្រប់ចំនួន ៣ លានដុល្លារ ដោយក្នុងនោះមានបេក្ខជនខ្លះត្រូវចំណាយប្រាក់ដល់ទៅ ១៥ ម៉ឺនដុល្លារ ដើម្បីបានជាប់ក្នុងការប្រឡងនេះ។ វីដេអូដដែលនោះក៏បានរៀបរាប់ពីឈ្មោះមន្ត្រីជាន់ខ្ពស់របស់ក្រសួងយុត្តិធម៌ជាច្រើនរូបដែលជាប់ពាក់ព័ន្ធនឹងការប្រមូលលុយនេះផងដែរ។
នៅក្រោយការបង្ហោះនេះ សាលាដំបូងរាជធានីភ្នំពេញបានចេញលិខិតកោះហៅចំនួន ២ ច្បាប់ដាច់ដោយឡែកពីគ្នាដោយបានកោះហៅបុគ្គលរូបនេះក្នុងនាមជាជនសង្ស័យឲ្យចូលបំភ្លឺនៅថ្ងៃទី ១៤ ខែកុម្ភៈពីបទចោទចំនួន ៣ គឺបទបរិហារកេរ្តិ៍ជាសាធារណៈ បទប្តឹងបរិហារបង្កាច់កេរ្តិ៍ និងបទញុះញង់ឲ្យមានការរើសអើង។
លោក គង់ ប៊ុនរិទ្ធិ បេក្ខជនដែលត្រូវបានតុលាការកោះហៅបានប្រាប់ភ្នំពេញប៉ុស្តិ៍ពីម្សិលមិញថា អ្វីដែលលោកបានលើកឡើងនៅក្នុងវីដេអូនោះគឺលោកទទួលបានពីគណនីហ្វេសប៊ុកមួយដែលបានសរសេររៀបរាប់ពីនីតិវិធី និងសកម្មភាពនៃអំពើពុករលួយទាំងនេះ។
លោកបន្តថា ការដែលលើកឡើងក្នុងវីដេអូនេះគឺលោកគ្រាន់តែអានតាមអ្វីដែលគណនីនោះបានសរសេរផ្ញើមកប៉ុណ្ណោះ ដោយរំពឹងថានឹងមានការបើកការស៊ើបអង្កេតស្វែងរកការពិតចំពោះតម្រុយទាំងនេះ។ លោកបញ្ជាក់៖ «អ្វីទាំងនេះគឺគ្រាន់ជាតម្រុយមួយដែលបង្ហាញពីភាពមិនប្រក្រតីនៃការប្រឡងចៅក្រម។ អ្វីដែលខ្ញុំបានដឹងខ្លះៗទើបខ្ញុំសម្រេចចិត្តអានសារដែលគេផ្ញើមកនេះ។ ដូចអ្វីដែលខ្ញុំបានអានអ៊ីចឹង ខ្ញុំអានសារនេះគឺមិនដឹងថា សារដែលរៀបរាប់ពីអំពើពុករលួយនេះជាការពិតឬយ៉ាងណា?»។
លោក គង់ ប៊ុនរិទ្ធិ បានអះអាងបន្ថែមថា លោកនឹងចូលខ្លួនទៅបំភ្លឺតាមការកោះហៅរបស់តុលាការ ហើយការដែលបេក្ខជនប្រឡងជាប់ទាំង ៥៥ រូបនោះចេញមុខប្រតិកម្មនេះសម្រាប់លោកយល់ថា ពួកគេក៏ចង់ឲ្យមានការស៊ើបអង្កេតមួយឲ្យបានត្រឹមត្រូវនៃអំពើពុករលួយនេះដែរ។
លោក សុខ សុវណ្ណវឌ្ឍនាសាប៊ុង សមាជិកឧត្តមក្រុមប្រឹក្សាពិគ្រោះ និងផ្តល់យោបល់ដែលបានដាក់របាយការណ៍ជុំវិញករណីនេះទៅលោកនាយករដ្ឋមន្ត្រី ហ៊ុន សែន បានលើកឡើងថា រូបលោកនឹងបន្តតាមដានករណីនេះបន្តទៀត។ លោកចាត់ទុកករណីនេះថា គឺជាការគាបសង្កត់ និងបិទសេរីភាពរបស់ពលរដ្ឋខណៈដែលបុគ្គលរូបនោះបានលើកឡើងពីតម្រុយនៃអំពើពុករលួយដែលគួរណាស់តែស្ថាប័នពាក់ព័ន្ធបើកការស៊ើបអង្កេតឲ្យបានត្រឹមត្រូវមិនគួរណាមកចោទប្រកាន់អ្នករាយការណ៍ពីអំពើពុករលួយនោះទេ។
លោកបញ្ជាក់ថា៖ «ភាពមិនប្រក្រតីកន្លងមកយើងបានដាក់ជូនសម្ដេចតេជោហើយ។ ឯការប្ដឹងលើបុគ្គលឈ្មោះ គង់ ប៊ុនរិទ្ធិ នេះខ្ញុំចាត់ទុកថា វាមិនត្រឹមត្រូវ ព្រោះគាត់បញ្ចេញមតិគ្រាន់តែរកការអន្តរាគមន៍ប៉ុណ្ណោះ។ ដោយឡែកយើងបន្តការតាមដានបន្ថែម ព្រោះត្រឹមកោះហៅទេមិនទាន់ដល់ការចោទប្រកាន់ចាប់អីនោះទេ។ យ៉ាងណាមិញខ្ញុំនឹងតាមដានបន្ត ព្រោះមិនទាន់ដឹងថា តើនរណាជាអ្នកប្ដឹងគាត់?»៕
វីដេអូ៖
