.jpg)
អ្នកតវ៉ាដីធ្លីឈរឃ្លាំមើលពលរដ្ឋដែលចូលបំភ្លឺតុលាការ។ ហ៊ាន រង្សី
កណ្ដាលៈ ប្រជាពលរដ្ឋចំនួន ១២ នាក់ដែលរស់នៅក្នុងស្រុកកៀនស្វាយ ត្រូវបានតុលាការចេញដីកាកោះឲ្យចូលខ្លួនទៅកាន់សាលាដំបូងខេត្តកណ្ដាល ពាក់ព័ន្ធទំនាស់ដីធ្លីជាង ២ ពាន់ហិកតាដែលលោកនាយករដ្ឋមន្ត្រី ហ៊ុន សែន បានកាត់ទៅឲ្យប្រជាពលរដ្ឋជិត ៥០០ គ្រួសារកាលពីឆ្នាំ ២០១៧។
យោងតាមដីកាកោះហៅរបស់លោក ហោ លីណា តំណាងអយ្យការអមសាលាដំបូងខេត្តកណ្តាលកាលពីថ្ងៃទី ២១ កញ្ញា បានឲ្យដឹងថា ការកោះហៅពលរដ្ឋទាំង ១២ នាក់គឺធ្វើឡើងតាមពាក្យបណ្តឹងរបស់លោក តូច សាហៀង ដែលជាដើមបណ្តឹងប្ដឹងពីបទ «រំលោភលើការកាន់កាប់អចលនវត្ថុដោយសុចរិត និងធ្វើឲ្យខូចខាតដោយចេតនាមានស្ថានទម្ងន់ទោស»។
លោក ញ៉ែម សុខដា ជាពលរដ្ឋម្នាក់ក្នុងចំណោមពលរដ្ឋតវ៉ាជាច្រើនទៀត រស់នៅឃុំបន្ទាយដែកបានប្រាប់ភ្នំពេញ-ប៉ុស្តិ៍ថា ការតវ៉ាក៏ព្រោះតែមិនសុខចិត្ត ចំពោះករណីដីជាង ២ ពាន់ហិកតាដែលលោក ហ៊ុន សែន បានប្រគល់ឲ្យពលរដ្ឋជិត ៥០០ គ្រួសារ តែបែរជាដីទាំងនោះត្រូវបានមន្ត្រីឃុបឃិតគ្នាប្រគល់ទៅឲ្យបុគ្គលមានលុយមានអំណាចជាង ១០ នាក់ធ្វើប្លង់រឹងរំលោភយកទៅវិញ។ បន្ទាប់ពីបានដឹងព័ត៌មានទាំងនេះ ប្រជាពលរដ្ឋបានផ្តិតមេដៃតវ៉ាជាបន្តបន្ទាប់ ដើម្បីទាមទារយុត្តិធម៌ប៉ុន្តែបែរជាមានការប្តឹងផ្តល់ប្រជាពលរដ្ឋ ១២ នាក់ក្នុងចំណោមពលរដ្ឋ ៤៧៣ នាក់ទៅតុលាការទៅវិញ។
លោកថ្លែងថា៖ «មានបុគ្គលមួយចំនួនឃុបឃិតគ្នាមានអំណាចមានលុយ គេបានចេញប្លង់មកឲ្យអ្នកមានលុយមានអំណាចហ្នឹង ហើយប្រជាពលរដ្ឋយើងខ្ញុំកាលហ្នឹងមិនដឹងទេ ព្រោះគេមិនបានប្រកាសក្នុងឃុំយើងទេ។ រួចហើយក្រោយមកទើបយើងដឹងព័ត៌មានតាមបណ្តាញសង្គម ក៏បាននាំគ្នាតវ៉ា តែអាជ្ញាធរ គេថាផុតពេលកំណត់ហើយ។ រឿងហ្នឹងទាល់តែមានការឃុបឃិតពីមន្ត្រីបានអាចចេញជាអ៊ីចឹង ដែលចេញជាប្លង់ចេញជាអីបាន ហើយក្នុងម្នាក់ៗមានដល់ទៅ ៤០ ហិកតា ឬ ៥០ ហិកតាអី»។
ភ្នំពេញប៉ុស្តិ៍មិនអាចស្វែងរកប្រភពដើម្បីទាក់ទងដើមបណ្ដឹងបានទេ។
លោក ទិន សុចិត្រា អ្នកនាំពាក្យអយ្យការអមសាលាដំបូងខេត្តកណ្តាលបានប្រាប់ភ្នំពេញ-ប៉ុស្តិ៍ថា មានពលរដ្ឋចំនួន ២ នាក់បានចូលមកបំភ្លឺ ហើយការសម្រេចយ៉ាងណានោះ គឺតុលាការនឹងធ្វើការស៊ើបអង្កេតបន្តទៀត។ ក្នុងនាមជាស្ថាប័នយុត្តិធម៌ តុលាការនឹងមានចំណាត់ការតាមពាក្យបណ្តឹង ប៉ុន្តែមិនប្រាកដថា តុលាការនឹងសម្រេចចោទប្រកាន់តាមការប្តឹងនោះទេ។
លោកបញ្ជាក់ថា៖ «តុលាការធ្វើការគឺមើលទៅលើអ្នកណា ជាដើមបណ្តឹង ហើយបើកាលណាដើមបណ្តឹងគេប្តឹងតែ ១២ នាក់ ដូច្នេះយើងកោះហៅតែ ១២ នាក់ហ្នឹងទេ។ គ្រាន់តែថា មិនមែនយើងត្រូវដាក់បន្ទុកតាមពាក្យបណ្តឹងទេ។ ដោយការហៅមកនេះគឺគ្រាន់តែត្រូវស្តាប់តាមការបំភ្លឺរបស់គាត់ បើមិនមានជាប់ពាក់ព័ន្ធទេ ក៏ចប់ទៅគ្រាន់តែពេលខ្លះ គាត់ភ័យខ្លួនគាត់»។
យោងតាមប្រជាពលរដ្ឋបានឲ្យដឹងថា ដីដែលកំពុងមានជម្លោះនោះគឺជាដីដែលប្រជាពលរដ្ឋតែងតែបង្កបង្កើនផលដោយការដាំដុះ និងនេសាទ រហូតមកដល់ពេលនេះពលរដ្ឋនៅតែបន្តការដាំដុះដដែល។
លោក អ៊ូ ឈាង អភិបាលស្រុកកៀនស្វាយបានប្រាប់ភ្នំពេញប៉ុស្តិ៍ថា កាលដែលធ្វើការបែងចែកដីតំបន់នេះកាលពីឆ្នាំ ២០១៧ គឺក្រសួងរៀបចំដែនដីបានបិទប្រកាសរយៈពេលដល់ទៅ ៣ ខែ ដើម្បីឲ្យប្រជាពលរដ្ឋដែលពាក់ព័ន្ធចូលរួមតវ៉ា។
លោកបញ្ជាក់ថា៖ «ពលរដ្ឋដែលមកតវ៉ានេះ គឺមិនមែនជាពលរដ្ឋចាស់ទេ គឺក្រុមផ្សេង។ ព្រោះគាត់និយាយថា អាជ្ញាធរមិនបានផ្សព្វផ្សាយឲ្យគាត់គឺមិនត្រូវទេ ព្រោះគេទៅយ៉ាងកុះករ ម៉េចបានពួកគាត់មិនទៅតវ៉ាពេលហ្នឹង។ ភាគច្រើនកាលហ្នឹង ប្រជាពលរដ្ឋបានលក់ដីឲ្យឈ្មួញ ដែលជាអ្នកនៅហ្នឹង ម្នាក់តិចៗហើយក្រោយមកបាននាំគ្នាតវ៉ា»។
លោក ឈាង ក៏បានបញ្ជាក់អំពីការទទួលបានពាក្យបណ្តឹងពីម្ចាស់ដីដែលមានប្លង់កម្មសិទ្ធិស្របច្បាប់ជាង ២០ ក្បាលដី ជុំវិញការរំលោភលើការកាន់កាប់អចលនវត្ថុនេះដែរ៕
