.jpg)
ឧកញ៉ា ស្រី ចន្ធូ ថ្លែងក្នុងសន្និសីទសារព័ត៌មាននាពេលកន្លងមក។ CPC News
ភ្នំពេញៈ លោក កូយ សៅ ចៅក្រមស៊ើបសួរ និងជាអនុប្រធានសាលាដំបូងរាជធានីភ្នំពេញបានចេញដីកាបង្គាប់ឲ្យឧកញ៉ា ស្រី សុធា និងឧកញ៉ា ស្រី ចន្ធូ ចូលបំភ្លឺនៅរសៀលថ្ងៃពុធនេះពាក់ព័ន្ធនឹងករណីលក់ដីគ្មានទីតាំងច្បាស់លាស់ទំហំ ១ ហិកតា ស្ថិតនៅភូមិព្រែកចាស់ ឃុំវិហារសួគ៌ ស្រុកខ្សាច់កណ្តាល ខេត្តកណ្តាល ទៅតាមពាក្យបណ្តឹងរបស់អតិថិជនអ្នកស្រី ឈុន ណាវី។
លោក គុជ គឹមឡុង អ្នកនាំពាក្យអយ្យការអមសាលាដំបូងរាជធានីភ្នំពេញ បានប្រាប់ភ្នំពេញប៉ុស្តិ៍កាលពីម្សិលមិញថា តុលាការបានធ្វើការកោះហៅឧកញ៉ាទាំង ២ នាក់ ដើម្បីឲ្យចូលមកបំភ្លឺនៅតុលាការនៅរសៀលថ្ងៃពុធពាក់ព័ន្ធនឹងការចោទប្រកាន់។ លោក គឹមឡុង បន្តថាដីកាកោះហៅក៏ត្រូវបានបញ្ចូនទៅជនសង្ស័យទាំង ២ រួចអស់ហើយដែរ។
លោកបញ្ជាក់ថា៖ «យើងបានទទួលដំណឹងពីចៅក្រមបញ្ជាក់មកថា តុលាការបានកោះហៅឲ្យចូលខ្លួនមកបំភ្លឺពាក់ព័ន្ធនឹងរឿងលក់ដីទំហំ ១ ហិកតាហ្នឹង។ គាត់ជាប់បណ្តឹងរឿងលក់ដីច្រើនករណី ដូច្នេះតុលាការនឹងសិក្សាមើល ព្រោះរឿងផ្សេងៗគ្នា តុលាការមិនអាចបញ្ចូលគ្នាបានទេ គ្រាន់តែលោកចៅក្រមបញ្ជាក់មកថាមានការកោះហៅ (រឿងលក់ដីទំហំ ១ ហិកតា)»។
ការកោះហៅនេះបានធ្វើឡើងបន្ទាប់ពីមានពាក្យបណ្តឹងរបស់អ្នកស្រី ឈុន ណាវី ដែលជាភាគីអតិថិជនម្នាក់ក្នុងចំណោម ៣ នាក់ ដែលបានដាក់ពាក្យប្ដឹងទៅសាលាដំបូងរាជធានីភ្នំពេញដើម្បីឲ្យជួយរកយុត្តិធម៌សម្រាប់ពួកគេដែលអតិថិជន ២ នាក់ទៀតនោះ មានឈ្មោះ ស៊ិន សុភ័ក្ត្រ និងឈ្មោះ វ៉ាន់ សាន ក៏បានដាក់ពាក្យបណ្តឹងទៅតុលាការផងដែរ។
លោក ដូង លឿង មេធាវីការពារលោកឧកញ៉ា ស្រី ចន្ធូ បានប្រាប់ភ្នំពេញប៉ុស្តិ៍កាលពីម្សិលមិញថា លោកមិនទាន់អាចអត្ថាធិប្បាយជុំវិញបញ្ហានេះបានទេ ដោយរង់ចាំការសិក្សាលម្អិត ចំពោះករណីនីមួយៗឲ្យបានច្បាស់លាស់ ម្តងមួយៗសិន។ ជាមួយគ្នានេះលោកក៏មិនអាចបញ្ជាក់បានថា កូនក្តីលោកនឹងចូលបំភ្លឺតាមការកំណត់ឬយ៉ាងណានោះដែរ។
លោកបញ្ជាក់ថា៖ «ខ្ញុំកំពុងសិក្សាសំណុំរឿង មិនដឹងថាយ៉ាងម៉េចផង មិនដឹងរឿងអីខ្លះ? មិនដឹងថា រឿងមួយណាជាមួយណាដែលយើងនឹងធ្វើការសិក្សាម្តងមួយៗ មិនដឹងថាទាក់ទងនឹងអ្វីខ្លះ»។
កាលពីខែសីហាលោក កែវ សុធា ព្រះរាជអាជ្ញានៃអយ្យការសាលាដំបូងរាជធានីភ្នំពេញបានសម្រេចចោទប្រកាន់ឧកញ៉ា ស្រី សុធា អាយុ ៦១ ឆ្នាំ ជាប្រធានក្រុមប្រឹក្សាភិបាលក្រុមហ៊ុន 7NG និងឧកញ៉ា ស្រី ចន្ធូ អាយុ ៣៨ ឆ្នាំ ជានាយកក្រុមហ៊ុនដែលជាកូនពីបទឆបោកពាក់ព័ន្ធនឹងការលក់ដីខ្យល់ទំហំ ១ ហិកតា ស្ថិតនៅក្នុងទីតាំងខាងលើតាមមាត្រា ៣៧៧ និង មាត្រា ៣៧៨ នៃក្រមព្រហ្មទណ្ឌ ប្រព្រឹត្តកាលពីអំឡុងឆ្នាំ ២០០៨ ដល់ឆ្នាំ ២០១៩ ពោលគឺមានរយៈពេល ១១ ឆ្នាំ។
ក្រោយទទួលរងការចោទប្រកាន់នេះលោកឧកញ៉ា ស្រី ចន្ធូ អគ្គនាយកក្រុមហ៊ុន 7NG គ្រុបបានប្រកាសប្ដឹងបកទៅលើអ្នកស្រី ឈុន ណាវី ដែលជាអតិថិជនរបស់លោកពីបទ «បរិហារបង្កាច់កេរ្តិ៍» និងទាមទារសំណងជំងឺចិត្ត ៧ ៧៧៧ ៧៧៧ ដុល្លារវិញ។
អ្នកស្រី ឈុន ណាវី ជាដើមបណ្តឹងរដ្ឋប្បវេណីមិនអាចទាក់ទងសុំការអធិប្បាយបានទេកាលពីម្សិលមិញ។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក បាននិយាយពីម្សិលមិញថា ជាទូទៅវិវាទដីធ្លីដែលមានប្លង់កម្មសិទ្ធិកាន់កាប់ត្រឹមត្រូវនោះភាគីជម្លោះមានសិទ្ធិស្វែងរកកិច្ចអន្តរាគមន៍ពីតុលាការ ហើយក្នុងករណីដែលបុគ្គលនៃភាគីណាម្នាក់ មិនគោរពទៅតាមច្បាប់ ឬកិច្ចសន្យាដែលបានព្រមព្រៀង នោះតុលាការមានសិទ្ធិសម្រេចតាមឆន្ទានុសិទ្ធិរបស់តុលាការ។
ចំពោះវិវាទនេះលោក ករុណា រំពឹងថាតុលាការនឹងស្វែងរកយុត្តិធម៌ជូនជនរងគ្រោះ បើទោះជាភាគីម្ខាងទៀតមានងារជាឧកញ៉ាយ៉ាងណាក៏ដោយ បើរកឃើញថាជនជាប់ចោទពិតជាបានប្រព្រឹត្តខុសច្បាប់មែននោះត្រូវតែអនុវត្តទៅតាមច្បាប់ ដោយមិនត្រូវមានការយល់យោគនោះឡើយ។
លោក ករុណា បញ្ជាក់ថា៖ «ករណីនេះកាលណាមានកិច្ចសន្យាមានអីបែបនេះ ភាគីជាក្រុមហ៊ុនទោះឋានៈអ្វីក៏ដោយ មិនត្រូវខ្វល់ថា ជានរណានោះទេ តុលាការត្រូវតែផ្តល់យុត្តិធម៌ដល់ភាគីម្ខាងទៀត ហើយបើសិនជាអ្នកហ្នឹង គាត់រំលោភលើច្បាប់ ប៉ះពាល់ទៅលើភាគីព្រមព្រៀងទាំងអស់ហ្នឹង តុលាការត្រូវមានវិធានការផ្លូវច្បាប់ហើយ»។
លោក ករុណា បានបញ្ជាក់ថា៖ «យើងចង់ឃើញតុលាការរបស់ប្រទេសយើង មិនការពារជនខិលខូចប្រភេទហ្នឹង ព្រោះប្រទេសយើងកំពុងតែធ្វើការកែទម្រង់លើប្រព័ន្ធយុត្តិធម៌ហ្នឹង»៕
