ភ្នំពេញៈ សាលាដំបូងរាជធានីភ្នំពេញកំពុងបន្តសាកសួរបុរសជាជនសង្ស័យម្នាក់ពាក់ព័ន្ធនឹងករណីវាយកូនបង្កើតរបស់ខ្លួនបណ្ដាលឲ្យស្លាប់ បន្ទាប់ពីសមត្ថកិច្ចចាប់បញ្ជូនដល់តុលាការកាលពីថ្ងៃទី ១៦ ខែមីនា ក្រោយពីមានការប្ដឹងពីភរិយារស់នៅភូមិត្រាំកោកសង្កាត់ពងទឹក ខណ្ឌដង្កោ រាជធានីភ្នំពេញ។
លោក អុី រិន្ទ អ្នកនាំពាក្យសាលាដំបូងរាជធានីភ្នំពេញបានប្រាប់ភ្នំពេញប៉ុស្តិ៍កាលពីម្សិលមិញថា ជនសង្ស័យម្នាក់ឈ្មោះ ណៃ រិទ្ធី អាយុ ២២ ឆ្នាំដែលសមត្ថកិច្ចចាប់បញ្ជូនមកកាន់សាលាដំបូងរាជធានីភ្នំពេញនោះ គឺកំពុងស្ថិតនៅក្នុងការសាកសួរតាមនីតិវិធីច្បាប់នៅឡើយ។
លោកបានបញ្ជាក់យ៉ាងខ្លីថា៖ «ជនសង្ស័យតុលាការមិនទាន់សួចប់ទេ»។
ដោយឡែកលោក ជីម ស៊ីថា អធិការនគរបាលខណ្ឌដង្កោបានប្រាប់កាលពីម្សិលមិញថា ក្មេងប្រុសរងគ្រោះអាយុ ៣ ឆ្នាំប៉ុន្តែបើតាមលិខិតពីមន្ទីរពេទ្យគន្ធបុប្ផា បញ្ជាក់ថា ក្មេងនោះមានជំងឺសួតធ្ងន់ធ្ងរ តែមិនបានអះអាងថា ស្លាប់ដោយសារការវាយពីឪពុកទេ។
លោកបានបន្តថា៖ «ក្មេងរងគ្រោះនោះ នៅមុនថ្ងៃកើតហេតុចេះតែយំ ហើយដោយសារស្រ្តីជាម្តាយរវល់ទៅធ្វើការមិននៅផ្ទះ បុរសជាឪពុកហាក់ខឹងក្រពុលមុខហើយក៏វាយកូនទៅ ប៉ុន្តែការស្លាប់មិនមែនមកពីឪពុកវាយកូននោះទេ។ ខាងមន្ទីរពេទ្យគន្ធបុប្ផាបានចេញលិខិតមួយបញ្ជាក់ថា ក្មេងរងគ្រោះមានជំងឺរលាកសួតប្រភេទ EV71 ជាជំងឺធ្ងន់ធ្ងរ» ។
លោកស៊ីថា បានរំឭកប្រាប់តាមសម្ដីសាច់ញាតិក្មេងរងគ្រោះថា នៅមុនស្លាប់គឺនៅថ្ងៃ ១៣ មីនាក្មេងរងគ្រោះមានជំងឺឈឺធ្ងន់ ហើយម្តាយបានយកទៅមន្ទីរពេទ្យគន្ធបុប្ផា។ លុះទៅដល់ក៏បានសម្រាកក្នុងមន្ទីរពេទ្យ ប៉ុន្តែនៅថ្ងៃទី ១៤ មីនាក្មេងរងគ្រោះបានស្លាប់។
លោកប្រាប់បន្តថា ក្រោយយកសពកូនទៅតម្កល់នៅវត្ត ម្តាយបានដោះអាវសពកូនក៏ស្រាប់តែឃើញស្នាមជាំនៅត្រង់ខ្នង បន្ទាប់មកក៏ហៅប្តីសួរហើយបុរសនោះក៏បានប្រាប់តាមដំណើររឿងទៅ។
លោកបានបន្ថែមថា ដោយសារឃើញស្នាមនោះ ស្ត្រីជាប្រពន្ធក៏សង្ស័យថា កូនអាចស្លាប់ដោយសារឪពុកវាយហើយក៏ប្តឹងមកសមត្ថកិច្ចរបស់លោកឲ្យចាប់ខ្លួននៅថ្ងៃទី ១៤ មីនា តែម្ដងទៅ៕