.jpg)
ជនសង្ស័យ ២ នាក់ប្តីប្រពន្ធត្រូវបានចាប់ខ្លួនទាក់ទងកាប់រានដីព្រៃរដ្ឋ។ ក្រសួងបរិស្ថាន
មណ្ឌលគិរីៈ ចៅក្រមស៊ើបសួរសាលាដំបូងខេត្តមណ្ឌលគិរីកំពុងបន្តសាកសួរជនសង្ស័យ ២ នាក់ប្ដី ប្រពន្ធដែលជាមេខ្លោងខាងកេណ្ឌកម្លាំងប្រជាពលរដ្ឋឲ្យចូលទៅលួចកាប់គាស់ រុករាន និងដុតឆ្ការដីព្រៃរបស់រដ្ឋយកធ្វើជាកម្មសិទ្ធិដោយខុសច្បាប់។
លោក ម៉ម វណ្ណដា អ្នកនាំពាក្យសាលាដំបូងខេត្តមណ្ឌលគិរីបានថ្លែងប្រាប់ភ្នំពេញប៉ុស្ដិ៍ក្រោយពីព្រះរាជអាជ្ញា បញ្ចប់ការសាកសួរកាលពីព្រឹកថ្ងៃពុធថា ជនសង្ស័យទាំង ២ នាក់ប្ដីប្រពន្ធគឺគេចមិនផុតពីការចោទប្រកាន់ពាក់ព័ន្ធនឹងការកាប់គាស់ រុករាន និងដុតឆ្ការដីព្រៃរបស់រដ្ឋយកធ្វើជាកម្មសិទ្ធិនោះទេ។ ប៉ុន្ដែត្រឹមល្ងាចថ្ងៃពុធម្សិលមិញ ចៅក្រមស៊ើបសួរនៅកំពុងបន្តសាកសួរបន្ថែមទៀតដើម្បីស្វែងរកអ្នកពាក់ព័ន្ធ។
លោកថ្លែងថា៖ «យើងបញ្ជូនបន្តទៅចៅក្រមស៊ើបសួរ។ ចំពោះការចោទប្រកាន់នោះគឺមិនមានអ្វីប្រែប្រួលទេ យើងត្រូវចោទប្រកាន់ហើយគ្រាន់តែថា យើងត្រូវការធ្វើទៅតាមនីតិវិធីជាមុនសិន។ ករណីនេះជារឿងពាក់ព័ន្ធនឹងបរិស្ថាន គឺយើងត្រូវចោទប្រកាន់ទៅតាមច្បាប់ ស្ដីពីតំបន់ការពារធម្មជាតិហើយ»។
លោក កែវ សុភគ៌ ប្រធានមន្ទីរបរិស្ថាន ខេត្តមណ្ឌលគិរីឲ្យដឹងថា មន្ត្រីឧទ្យានុរក្ស ដែនជម្រកសត្វព្រៃកែវសីមាកាលពីថ្ងៃទី ២៧ ខែមេសា ឆ្នាំ ២០២០ បានឃាត់ខ្លួនមុខសញ្ញាជាមេខ្លោងដ៏សកម្មក្នុងការលួចកាប់គាស់ រុករាន និងដុតឆ្ការដីព្រៃរបស់រដ្ឋដើម្បីកាន់កាប់ និងគូសវាសពុះចែកដីធ្វើជាកម្មសិទ្ធិ។
លោកថ្លែងថា ការឃាត់ខ្លួនជនសង្ស័យទាំង ២ នាក់ប្ដីប្រពន្ធនេះគឺធ្វើឡើងក្រោយពីមន្ត្រីឧទ្យានុរក្សដែនជម្រកសត្វព្រៃកែវសីមានៃមន្ទីរបរិស្ថានខេត្តមណ្ឌលគិរីធ្វើការស្រាវជ្រាវ និងតាមដានក្នុងករណីបទល្មើសជាច្រើនករណីទើបឈានដល់ការចាប់ឃាត់ខ្លួននៅកន្លែងកើតហេតុត្រង់ចំណុចស្ថិតក្នុងភូមិពូគង់ ឃុំស្រែព្រះ ស្រុកកែវសីមាក្នុងដែនជម្រកសត្វព្រៃកែវសីមាតែម្ដង។
លោកឲ្យដឹងថា ជនសង្ស័យទាំង ២ នាក់ ប្ដីប្រពន្ធ ដែលត្រូវមន្ត្រីឧទ្យានុរក្សចាប់ឃាត់ខ្លួនមានប្តីឈ្មោះ ឡុង សុខុន អាយុ ៤៣ ឆ្នាំ បច្ចុប្បន្នរស់នៅភូមិអូរច្រា ឃុំស្រែព្រះ ស្រុកកែវសីមា និងប្រពន្ធឈ្មោះ សំអាត យ៉ាណូ អាយុ ៤៣ ឆ្នាំ បច្ចុប្បន្នរស់នៅភូមិគ្រញូងសែនជ័យ ឃុំ ២ ធ្នូ ស្រុកស្នួល ខេត្តក្រចេះ។
លោកបញ្ជាក់ថា៖ «ជនសង្ស័យទាំង ២ នាក់មានជំនាញខាងកេណ្ឌកម្លាំងពលកម្មពលរដ្ឋឲ្យមកលួចកាប់គាស់ រុករាន និងដុតឆ្ការដីព្រៃរបស់រដ្ឋដើម្បីទន្ទ្រានកាន់កាប់ និងគូសវាសចែកដីធ្វើជាកម្មសិទ្ធិ។ ពួកគាត់មានសកម្មភាពច្រើនក្នុងការបែងចែកដីរដ្ឋទៅឲ្យតតិយជនផ្សេងទៀត។ ពួកគាត់មានក្រុមការងារក្នុងការកាប់រុករាន ទន្ទ្រានដីរដ្ឋយកធ្វើជាកម្មសិទ្ធិនេះ ហើយពួកគាត់ទាំង ២ ជាមេក្រុម»។
លោក សុភគ៌ បន្តថាកម្លាំងមន្ដ្រីឧទ្យានុរក្សមានការលំបាកក្នុងការតាមឃាត់ខ្លួនជនសង្ស័យជាមេខ្លោងទាំង ២ នាក់នេះ ព្រោះសកម្មភាពកន្លងមកពួកគេតែងតែធ្វើការងារជាក្រុម ធ្វើឲ្យមន្ដ្រីឧទ្យានុរក្សមានការពិបាកបែងចែក។ លោកថាជនសង្ស័យទាំង ២ នាក់គឺមានស្រុកកំណើតនៅខេត្ដក្រចេះ។
លោកបញ្ជាក់ថាក្នុង ២ សប្ដាហ៍ចុងក្រោយនៃខែមេសានេះកម្លាំងមន្ដ្រីឧទ្យានុរក្សនៃមន្ទីរបរិស្ថាន ខេត្តមណ្ឌលគិរី បានឃាត់ខ្លួនជនល្មើសធនធានធម្មជាតិ និងជនល្មើសកាប់រុករាន ទន្ទ្រានដីព្រៃរបស់រដ្ឋយកធ្វើជាកម្មសិទ្ធិបានចំនួន ៨ នាក់៕
