ភ្នំពេញៈ មន្រ្តីនគរបាលជាតិម្នាក់ ត្រូវបានចាប់ខ្លួនកាលពីថ្ងៃទី៩ ខែមករា មួយថ្ងៃ បន្ទាប់ពីមន្ត្រីរូបនេះ បានទាត់នគរបាលចរាចរណ៍ម្នាក់ ដោយសារនគរបាលចរាចរណ៍នោះ បានហៅគាត់ឈប់ពីបទបើករថយន្តមិនគោរពភ្លើងក្រហម នៅក្នុងខណ្ឌសែនសុខ រាជធានីភ្នំពេញ។
ឧប្បត្តិហេតុនេះ បានកើតឡើងកាលពីព្រឹកថ្ងៃអង្គារ នៅពេលលោក សៅ បញ្ញា ដែលធ្វើការនៅនាយកដ្ឋានប្រឆាំងបទល្មើសតាមអ៊ីនធឺណិត និងមានឋានន្តរស័ក្តិវរសេនីយ៍ត្រី ត្រូវបានបញ្ឈប់ដោយនគរបាលចរាចរណ៍ឈ្មោះ អឿង ចំណាន ពីបទមិនគោរពភ្លើងចរាចរណ៍ កាលពីថ្ងៃទី៨ ខែមករា។
លោក បញ្ញាបានត្រឡប់ទៅកន្លែងនោះម្តងទៀតនៅថ្ងៃអង្គារ ហើយត្រូវបានគេឃើញទាត់ លោក ចំណាន ហើយគេបានឃើញនគរបាលចរាចរណ៍នោះលត់ជង្គង់និងសំពះហាក់បីដូចជាដើម្បីសុំទោស។ លោក បញ្ញា បានទាត់គាត់ចំទ្រូងនិងប៉ុនប៉ងចូលទៅវាយទៀត ពីមុនពេលគាត់ត្រូវបានបញ្ឈប់ដោយមន្រ្តីនគរបាលម្នាក់ទៀត។
លោក ជាវ ហាក់ ស្នងការរងរាជធានីភ្នំពេញ បានថ្លែងថា លោក ចំណាន គ្រាន់តែចង់ព្យាយាមអប់រំ លោក បញ្ញា អំពីបទល្មើសរបស់គាត់ ប៉ុន្តែលោក បញ្ញា ចង់ឈ្លោះប្រកែកថា មិនបានប្រព្រឹត្តបទល្មើស ហើយបានត្រឡប់ទៅវិញនៅថ្ងៃបន្ទាប់ ដើម្បីជួបលោក ចំណាន ម្តងទៀត។
លោកបន្តថា៖ «នៅថ្ងៃបន្ទាប់[ថ្ងៃទី ៩ ខែមករា] គាត់បានត្រឡប់មកវិញ ហើយបានរកមើលអ្នកដែលបានអប់រំគាត់ ហើយបន្ទាប់មកគាត់បានទាញអាវជនរងគ្រោះនិងទាត់គាត់»។
លោក អេង សុខភា ប្រធាននាយកដ្ឋានបទល្មើសព្រហ្មទណ្ឌ បានថ្លែងថា នៅថ្ងៃទី ១០ ខែមករា លោក បញ្ញា នៅកំពុងត្រូវបានសាកសួរ នៅសាលាដំបូងរាជធានីភ្នំពេញនៅឡើយ ខណៈនគរបាលកំពុងចង់ចោទប្រកាន់គាត់ពីបទ«ហិង្សាដោយចេតនា»។
លោក ចំណាន កាលពីថ្ងៃទី ១០ ខែមករា បានថ្លែងថា លោក បញ្ញា បានបើកហួសភ្លើងក្រហម ហើយមិនព្រមឈប់ឡាន ដូច្នេះលោកបានព្យាយាមបញ្ឈប់អ្នកបើកឡានល្មើសម្នាក់ទៀត ប៉ុន្តែលោក បញ្ញា បានឈប់ឡាន ហើយចាប់ផ្តើមជេររូបលោក។ លោកបន្តថា៖ «គាត់បានជេរខ្ញុំរយៈពេលប្រហែល ១០ នាទីនៅកន្លែងសាធារណៈ»។
បន្ទាប់មក ខ្ញុំខឹងយ៉ាងខ្លាំង ដោយសារគាត់ជេរម៉ែខ្ញុំ ខ្ញុំជេរគាត់វិញ និងបាននិយាយថា «អញ្ញវៃហែងមួយអាយកូមឡូវ» ប៉ុន្តែមិនបានវាយលោក បញ្ញា ទេ។
ដោយឈរនៅកន្លែងដដែលនៅថ្ងៃអង្គារ លោក ចំណាន បានថ្លែងថា លោក បញ្ញា បានត្រឡប់មកវិញ និងបានអូសរូបលោកចូលទៅក្នុងការ៉ាស់មួយ ហើយជំរុញឲ្យរូបលោកសុំទោស ពីមុនពេលបន្តទាត់រូបលោក។ «ខ្ញុំបានលត់ជង្គង់សុំទោសគាត់ភ្លាមៗនោះ។ គាត់បាននិយាយថា គាត់អាចវៃខ្ញុំពេលណាក៏បានឲ្យតែគាត់ចង់ ហើយបន្ទាប់មកគាត់បានចាកចេញ»។
លោក ចំណាន បានថ្លែងថា ខ្ញុំខ្មាសគេដោយសារវីដេអូនេះ ត្រូវបានចែកចាយនៅលើបណ្តាញហ្វេសប៊ុក ប៉ុន្តែលោកនៅតែចង់ឲ្យលោក បញ្ញា ជាប់ពន្ធនាគារ។ លោកបានថ្លែងថា៖ «ខ្ញុំចង់បានយុត្តិធម៌។ ខ្ញុំចង់ឲ្យគាត់ជាប់ពន្ធនាគារចំពោះអ្វីដែលគាត់បានធ្វើដាក់ខ្ញុំ»។
អ្នកនាំពាក្យសាលាដំបូងរាជធានី លោក លី សុផាន់ណា បានថ្លែងថា ព្រះរាជអាជ្ញា លោក សៀង សុខ នៅកំពុងសាកសួរលោក បញ្ញា និងកំពុងពិនិត្យភ័ស្តុតាងនៅឡើយត្រឹមល្ងាចថ្ងៃពុធទី ១០ ខែមករា៕ PS