.jpg)
ក្រុមជនសង្ស័យ (ពាក់ស្លាក) ពេលសមត្ថកិច្ចចាប់ខ្លួនបាន។ រូបថត ប៉ូលិស
ភ្នំពេញ: មន្ត្រីនគរបាលខណ្ឌកំបូលបានឲ្យដឹងថា បុរសជាជនសង្ស័យប្លន់យកម៉ូតូចំនួន ១២ នាក់ កំពុងស្ថិតក្នុងនីតិវិធីសាកសួរពីសាលាដំបូងរាជធានីភ្នំពេញ បន្ទាប់ពីនគរបាលបញ្ជូនខ្លួនដល់តុលាការ ក្រោយឃាត់ខ្លួនជាបន្តបន្ទាប់ ករណីធ្វើសកម្មភាពប្លន់ម៉ូតូតាមផ្លូវជាតិលេខ ៣ ចាប់ពីផ្សារអង្គតាសោមខេត្តតាកែវ និងពីផ្លូវជាតិលេខ ៤ ខេត្តកំពង់ស្ពឺមកដល់ភ្នំពេញ។
លោក ហង្ស មុនី អធិការនគរបាលខណ្ឌកំបូលបានឲ្យដឹងកាលពីម្សិលមិញថា ក្រុមជនសង្ស័យទាំង ១២ នាក់នោះ ត្រូវបានសមត្ថកិច្ចជំនាញខណ្ឌរបស់លោកបញ្ជូនទៅសាលាដំបូងរាជធានីភ្នំពេញកាលពីថ្ងៃទី ២៨ ខែកញ្ញា ហើយបើតាមលោកដឹងគឺតុលាការកំពុងសាកសួរពួកគេ ជុំវិញករណីប្លន់ទ្រព្យសម្បត្តិពលរដ្ឋដែលធ្វើដំណើរតាមផ្លូវ។
លោកបន្តថា ការចាប់ខ្លួនជាបន្តបន្ទាប់នេះ ក្រោយពីពួកគេបានធ្វើសកម្មភាពដោយធាក់ផ្ដួលប្លន់ម៉ូតូពីជនរងគ្រោះនៅតាមផ្លូវជាតិលេខ ៣ ចាប់ពីផ្សារអង្គតាសោម ខេត្តតាកែវ មកភ្នំពេញ និងផ្លូវជាតិលេខ ៤ ចាប់ពីខេត្តកំពង់ស្ពឺ មកដល់ភ្នំពេញ។ ពួកគេបានដាក់ពង្រាយគ្នាតាមបណ្ដោយផ្លូវជាតិលេខ ៣ និងលេខ ៤ ប៉ុន្ដែមានបក្ខពួកខ្លះស្នាក់នៅខណ្ឌកំបូល រាជធានីភ្នំពេញ។
លោក ហង្ស មុនី បញ្ជាក់ថា៖ «ដោយមានការរាយការណ៍ និងទទួលពាក្យបណ្ដឹងពីជនរងគ្រោះ សមត្ថកិច្ចយើងក៏ចុះចាប់ខ្លួនបានជាបន្តបន្ទាប់ តាំងពីដើមសប្ដាហ៍មុនដោយបានដកហូតម៉ូតូចំនួន ៥ គ្រឿង ដែលជាមធ្យោបាយជិះចេញប្លន់ និងជាម៉ូតូដែលពួកគេប្លន់បានកន្លងទៅ។ បន្ទាប់មកយើងបានសាកសួរបក្ខពួកគេ ប៉ុន្ដែនៅមិនទាន់អស់នៅឡើយទេ យើងកំពុងបន្តស្រាវជ្រាវតាមចាប់ខ្លួន ៣ នាក់ទៀត»។
យ៉ាងណាក្ដី ភ្នំពេញ ប៉ុស្ដិ៍ មិនអាចទាក់ទងសុំការបញ្ជាក់បន្ថែមពីដំណើរការនីតិវិធីនៃសំណុំរឿងនេះ ពីលោក គុជ គឹមឡុង ព្រះរាជអាជ្ញារង និងជាអ្នកនាំពាក្យសាលាដំបូងរាជធានីភ្នំពេញបាននៅឡើយទេកាលពីម្សិលមិញ។
បើតាមរបាយការណ៍របស់អធិការដ្ឋាននគរបាលខណ្ឌកំបូល បុរសជាជនសង្ស័យទាំង ១២ នាក់នោះ រួមមានៈ ទី១- ឈ្មោះ ឌី សុវណ្ណារ៉ា អាយុ ១៨ ឆ្នាំ ទី២- ឈ្មោះ រ៉េត សុវណ្ណារ៉ា អាយុ ២៤ ឆ្នាំ ទី៣- ឈ្មោះ ទន់ សុភារិទ្ធ ហៅ អ៊ូក អាយុ ២០ ឆ្នាំ ទី៤- ឈ្មោះ ឡុង បញ្ញាហៅ ភ័ក្រ អាយុ ២៣ ឆ្នាំ ទី៥- ឈ្មោះ ម៉ៅ សុវណ្ណារ៉ា ហៅ រ៉ា អាយុ ១៨ ឆ្នាំ ទី៦- ឈ្មោះ តារា វី ហៅ វី អាយុ ២០ ឆ្នាំ ទី៧- ឈ្មោះ ឡេង គឹមលុយ អាយុ ១៨ ឆ្នាំ ទី៨- ឈ្មោះ សាវុធ ពិសី ហៅ សី អាយុ ១៨ ឆ្នាំ ទី៩- ឈ្មោះ ណយ សុផាន់ ហៅ ប៉ាន់អាយុ ២១ ឆ្នាំ ទី១០- ឈ្មោះ នួន សំណាង ហៅ អេត អាយុ ២០ ឆ្នាំ ទី១១- ឈ្មោះ ជុន សុជាតិ អាយុ ២២ ឆ្នាំ និងទី១២- ឈ្មោះ ឡុង វណ្ណដេវីត អាយុ ២៣ ឆ្នាំ។
របាយការណ៍ដដែលបន្តថា ប្រតិបត្តិការនេះដឹកនាំដោយលោក ហង្ស មុនី អធិការនគរបាលខណ្ឌកំបូល និងលោក ឈឹម សាវុទ្ធ អធិការរងដោយមានកិច្ចសហការពីសំណាក់សមត្ថកិច្ចការិយាល័យព្រហ្មទណ្ឌកម្រិតធ្ងន់នៃស្នងការដ្ឋានរាជធានីភ្នំពេញ និងស្រុក/ខណ្ឌជាប់ព្រំប្រទល់ រួមមាន ខេត្តកណ្តាល កំពង់ស្ពឺ និងបាត់ដំបង រហូតឈានដល់ការបង្ក្រាបក្រុមជនសង្ស័យខាងលើនេះបានដើម្បីយកមកផ្ដន្ទាទោស៕
វីដេអូ៖
