ភ្នំពេញ៖ ចៅក្រមស៊ើបសួរនៃសាលាដំបូងរាជធានីភ្នំពេញ បាននិងកំពុងសាកសួរបុរសម្នាក់ឈ្មោះ ហ៊ឹម រ៉ាខឆៃយ៉ា ករណីក្លែងបន្លំឋានៈតួនាទី និងឯកសណ្ឋានមន្ត្រីនគរបាលជាតិថ្នាក់ឧត្តមសេនីយ៍ត្រី (ផ្កាយ ១) និង កាន់កាប់អាវុធខុសច្បាប់ហើយដើរបោកលុយពលរដ្ឋ បន្ទាប់ពីសមត្ថកិច្ចឃាត់ខ្លួនតាមបណ្ដឹងជនរងគ្រោះម្នាក់ កាលពីថ្ងៃ ៩ ខែ មីនា។
លោក គុជ គឹមឡុង អ្នកនាំពាក្យសាលាដំបូងរាជធានីភ្នំពេញបានថ្លែងពីម្សិលមិញថា ព្រះរាជអាជ្ញានៃសាលាដំបូងរាជធានីភ្នំពេញ បានបញ្ចប់ការសាកសួរបុរសឈ្មោះ ហ៊ឹម រ៉ាខឆៃយ៉ា អាយុ ២៩ ឆ្នាំ ស្នាក់នៅសង្កាត់ បឹងកេងកង ខណ្ឌ បឹងកេងកង និងបានចោទប្រកាន់បុរសរូបនេះមុនពេលបញ្ជូនទៅឲ្យចៅក្រមស៊ើបសួរ ប៉ុន្ដែ លោកចៅក្រមមិនទាន់សម្រេចយ៉ាងណានៅឡើយទេ ដោយកំពុងបន្តនីតិវិធីសាកសួរ។
លោកបញ្ជាក់ថា៖ «លោកព្រះរាជអាជ្ញាបានសាកសួររួចរាល់ហើយ ដោយបានចោទពីបទប្រើប្រាស់ឯកសារសាធារណៈក្លែង និងបទប្រើប្រាស់អាវុធគ្មានច្បាប់អនុញ្ញាត ហើយបានបញ្ជូនទៅចៅក្រមស៊ើបសួរបន្តទៀតបើមានការសម្រេចយ៉ាងណាទៀត ខ្ញុំនឹងជម្រាបជូននៅពេលក្រោយទៀត»។
មន្ត្រីនៃនាយកដ្ឋាននគរបាលព្រហ្មទណ្ឌក្រសួងមហាផ្ទៃម្នាក់សុំមិនបញ្ចេញឈ្មោះបានថ្លែង កាលពីម្សិលមិញថា សមត្ថកិច្ចលោកបានបញ្ជូនសំណុំរឿងនិងជនសង្ស័យទៅសាលាដំបូងរាជធានីភ្នំពេញ ដោយមន្ត្រីជំនាញត្រូវធ្វើការងារតាមនីតិវិធីច្បាប់ ពីព្រោះអំពើនេះប៉ះពាល់កិត្តិយសមន្ត្រីនគរបាលខ្លាំងណាស់។
លោកបានបន្តថា ការក្លែងឯកសារសាធារណៈ ក្លែងបន្លំ ឋានៈ តួនាទីជាមន្ត្រីនគរបាលជាតិ គឺជាអំពើខុសច្បាប់ ដែលមិនអាចលើកលែងទោសបានទេ។
លោកបានបញ្ជាក់ថា៖ «ខ្ញុំបានបញ្ជូនសំណុំរឿងនេះទៅតុលាការរួចរាល់ហើយ កាលពីថ្ងៃទី ៩ ខែមីនា គឺយើងទុកឲ្យតុលាការចាត់ចែងតាមនីតិវិធីច្បាប់ឲ្យតឹងរ៉ឹងបំផុត ព្រោះវាជាគំរូអាក្រក់ ប៉ះពាល់កិត្តិយសមន្ត្រីសាធារណៈ»។
មន្ត្រីនគរបាលដែលសុំមិនបញ្ចេញឈ្មោះរូបនោះបានអះអាងថា ជនសង្ស័យបានសារភាពប្រាប់ទៅសមត្ថកិច្ចថា ខ្លួនពិតជាផ្តើមគំនិតប្រើប្រាស់ក្លែងឯកសណ្ឋាន ឋានៈតួនាទី ក្របខ័ណ្ឌនគរបាលជាតិ តាំងពីអំឡុងឆ្នាំ ២០១៦ មក ហើយអត្តសញ្ញាណប័ណ្ណនគរបាលជាតិ និងទម្រង់ទាំងអស់គឺខ្លួនបានចម្លងតាមហ្វេសប៊ុក ដែលឃើញគេបង្ហោះ។ ចំណែកស័ក្តិថ្នាក់ឧត្តមសេនីយ៍ត្រីនេះ ខ្លួនបានទិញពីផ្សារមកពាក់ រីឯ អាវុធខ្លី ១ ដើម រូបគេបានទិញពីអ្នកស្គាល់គ្នាម្នាក់។
លោកបន្តថា ជនសង្ស័យរូបនេះ ត្រូវបានសមត្ថកិច្ចការិយាល័យស៊ើបការណ៍នៃនាយកដ្ឋាននគរបាលព្រហ្មទណ្ឌក្រសួង មហាផ្ទៃ ឃាត់ខ្លួនកាលពីព្រឹកថ្ងៃទី ៩ ខែមីនា រួចបញ្ជូនទៅសាលាដំបូងរាជធានីភ្នំពេញភ្លាមៗ ពាក់ព័ន្ធករណីក្លែងឯកសណ្ឋានជាមន្ត្រីនគរបាលជាតិនិងឋានៈតួនាទីជាឧត្តមសេនីយ៍ និងកាន់កាប់អាវុធខ្លីស៊េរីទំនើបខុសច្បាប់ទៅឆបោកប្រាក់ពលរដ្ឋម្នាក់នៅសង្កាត់ បឹងកក់ ២ ខណ្ឌទួលគោកចំនួន ១០៥ ០០០ ដុល្លារ។
លោកបានបន្តថា ជនរងគ្រោះឈ្មោះ ហ៊ុន ចាន់ថុល ភេទស្រី អាយុ ៣៨ ឆ្នាំ បានរៀបរាប់ប្រាប់មន្ត្រីនគរបាលថា អ្នកស្រីបានប្ដឹងជនសង្ស័យឈ្មោះ ហ៊ឹម រ៉ាខឆៃយ៉ា ដែលជាមនុស្សធ្លាប់ស្គាល់គ្នាកន្លងមក។
អ្នកស្រីថា កាលពីថ្ងៃទី ១០ ខែកក្កដា ឆ្នាំ ២០១៩ បុរសរូបនេះ បានទៅនិយាយលួងលោមអ្នកស្រីដល់ផ្ទះនៅភូមិចម្រើនផល សង្កាត់ បឹងកក់ ២ ខណ្ឌទួលគោក ដើម្បីបង្គាប់ឲ្យអ្នកស្រីរកប្រាក់ចំនួន ១០៥ ០០០ ដុល្លារឲ្យគាត់ខ្ចីយកទៅប្រើប្រាស់ក្នុងកិច្ចការដោយជនសង្ស័យបានធានាថា ក្នុងរយៈពេល ១ ខែ នឹងបង្វិលប្រាក់សងឲ្យវិញគ្រប់ចំនួន។
អ្នកស្រីប្រាប់សមត្ថកិច្ចទៀតថា លុះដល់ថ្ងៃកំណត់ ឈ្មោះ ហ៊ឹម រ៉ាខឆៃយ៉ា បានព្យាយាមគេចវេះមិនទទួលខុសត្រូវ ហើយបានបិទទូរស័ព្ទ។ លុះដល់ខែមីនា ឆ្នាំ ២០២០ នេះ អ្នកស្រីបានព្យាយាមទាក់ទងទៅឈ្មោះ ហ៊ឹម រ៉ាខឆៃយ៉ា ម្ដងទៀតឲ្យមកផ្ទះអ្នកស្រីដើម្បីជជែកគ្នាពីរឿងប្រាក់ជាង ១០ ម៉ឺនដុល្លារនោះដោយពេលនោះអ្នកស្រីបានប្ដឹងសមត្ថកិច្ចឲ្យមកឃាត់ខ្លួនតែម្ដង៕