.jpg)
ជនជាប់ចោទពេលចាប់ខ្លួនក្នុងឆ្នាំ ២០១៨ ក្រោយគេចខ្លួនបាន ៣ ឆ្នាំ។ រូបថត នគរបាល
ភ្នំពេញៈ តុលាការកំពូលកាលពីម្សិលមិញបានបើកសវនាការជំនុំជម្រះរឿងក្ដីឃាតកម្មកាលពី ៥ ឆ្នាំមុនដែលតុលាការថ្នាក់ក្រោមបានកាត់ទោសដាក់គុក ១ ជីវិត និងបានបន្ថយទោសត្រឹម ៣០ ឆ្នាំក្រោយពីជម្រះនៅសាលាឧទ្ធរណ៍។
នៅក្នុងបន្ទប់សវនាការតុលាការកំពូលជនជាប់ចោទឈ្មោះ ទឹម សារី អាយុ ៣៥ ឆ្នាំបានថ្លែងប្រាប់ចៅក្រមថាគាត់បានសារភាពប្រាប់តុលាការថ្នាក់ក្រោមអស់ហើយពីកំហុសរបស់គាត់ដែលបានប្រព្រឹត្តទៅលើបុរសរងគ្រោះឈ្មោះ ស្រី ចាន់វុទ្ធី ហើយគាត់ស្នើសុំដល់ចៅក្រមដើម្បីបន្ថយទោសដល់គាត់។
ការស្នើសុំបន្ថយទោសនេះកាលពីជំនុំជម្រះនៅសាលាឧទ្ធរណ៍បានបន្ថយទោសឲ្យគាត់ពីជាប់ពន្ធនាគារ ១ ជីវិតមកនៅ ៣០ ឆ្នាំ។ ជនជាប់ចោទ ទឹម សារី ប្រាប់ចៅក្រមថា៖ «ខ្ញុំប្តឹងមកតុលាការកំពូលនេះ ព្រោះតែខ្ញុំមិនចង់ជាប់ទោសដល់ ៣០ ឆ្នាំទេ ដូច្នេះហើយខ្ញុំសុំតុលាការបន្ថយទោសតាមការស្នើសុំរបស់ខ្ញុំផង»។
លោក ឈួន ចាន់ថា តំណាងមហាអយ្យការបានធ្វើសេចក្តីសន្និដ្ឋានថាយោងតាមការពិនិត្យលើអង្គហេតុបង្ហាញថាកាលពីនៅសាលាដំបូងខេត្តកណ្តាលបានផ្តន្ទាទោសជនចាប់ចោទឲ្យជាប់ពន្ធនាគារអស់ ១ ជីវិតតាមមាត្រា ២០០ នៃក្រមព្រហ្មទណ្ឌ។
ដោយមិនសុខចិត្តជនជាប់ចោទបានប្តឹងទាស់ទៅសាលាឧទ្ធរណ៍ហើយត្រូវសាលាឧទ្ធរណ៍បន្ថយទោសពីជាប់ពន្ធនាគារ ១ ជីវិតមកនៅត្រឹម ៣០ ឆ្នាំវិញ និងប្តូរបទចោទពីបទឃាតកម្មគិតទុកជាមុនមកជាបទឃាតកម្មដោយអំពើឃោរឃៅតាមមាត្រា ២០៥ នៃក្រមព្រហ្មទណ្ឌវិញ។
លោក ចាន់ថា ថ្លែងថា៖ «ជនជាប់ចោទបានស្នើសុំបន្ថយទោសឲ្យនៅក្រោម ៣០ ឆ្នាំ ដូច្នេះសូមក្រុមប្រឹក្សាពិចារណាតាមច្បាប់»។
លោកស្រី ស៊ិន សុវ៉ន ជាមេធាវី ការពារសិទ្ធិឲ្យជនជាប់ចោទឈ្មោះ ទឹម សារី ក្នុងសវនាកាក៏បានសុំបន្ថយទោសដល់កូនក្ដីផងដែរ។
លោក ឃឹម ប៉ុណ្ណប្រធាន ក្រុមប្រឹក្សាជំនុំជម្រះថ្លែងថា សាលដីកានេះប្រកាសនៅថ្ងៃទី ២៧ កក្កដា។
តាមកំណត់ហេតុរបស់តុលាការកំពូលបង្ហាញថា ជនជាប់ចោទបានបាញ់ទៅលើជនរងគ្រោះត្រូវ ១៥ កន្លែងក្នុងពិធីខួបកំណើតនៅភូមិគោកពពេល ឃុំលំហាច ស្រុកអង្គស្នួល ខេត្តកណ្ដាលកាលពីថ្ងៃទី ៤ ខែកក្កដា ឆ្នាំ ២០១៥ ហើយត្រូវបានតុលាការខេត្តកាត់ទោសកំបាំងមុខដាក់គុកអស់ ១ ជីវិតមុនការចាប់ខ្លួនបាននៅឆ្នាំ ២០១៨៕
