.jpg)
ជនជាប់ចោទត្រូវបាននាំខ្លួនកាលជម្រះនៅឧទ្ធរណ៍។ រូបថត គឹម សារុំ
ភ្នំពេញៈ តុលាការកំពូលពីម្សិលមិញបានជំនុំជម្រះក្រុមចោរប្លន់ប្រដាប់អាវុធ ៣ នាក់ ក្នុងនោះម្នាក់ឈឺស្លាប់ ដែលក្រុមនេះមានប្រវត្តិប្លន់ចំនួន ១១ លើកដោយម្នាក់ៗត្រូវបានតុលាការថ្នាក់ក្រោមផ្តន្ទាទោសដាក់ពន្ធនាគារ ៣០ ឆ្នាំប្រព្រឹត្តនៅខេត្តបាត់ដំបងកាលពីឆ្នាំ ២០១១។
តាមកំណត់ហេតុរបស់នគរបាលខេត្តបាត់ដំបងបានបង្ហាញថា កាលពីថ្ងៃទី ២៣ ឧសភា ឆ្នាំ ២០១១ ជន ៣ នាក់ ឈ្មោះ នឹម ចិត្ត ហៅ ចិត្ត អាយុ ៣១ ឆ្នាំ, ទី២- ឈ្មោះ នាង ស៊ីណាត ហៅ ណាត អាយុ ៣០ ឆ្នាំ និងឈ្មោះ ភិន ភន អាយុ ៥៤ ឆ្នាំ បាននាំគ្នាផឹកស្រាក្លែមសាច់ឆ្កែនៅផ្ទះជនរងគ្រោះ។ បន្ទាប់ពីផឹកស្រាក្លែមសាច់ឆ្កែហើយក៏នាំគ្នាត្រឡប់ទៅវិញ។
លុះប្រហែលជាម៉ោង ១០ យប់ថ្ងៃខែឆ្នាំដដែល ខណៈម្ចាស់ផ្ទះលក់សាច់ឆ្កែរៀបចំបិទទ្វារផ្ទះក៏ត្រូវក្រុមជនទាំង ៣ នាក់ ពាក់ម៉ាស់មុខប្រដាប់ដោយកាំភ្លើង AK ១ ដើម និងកាំភ្លើងខ្លីម៉ាក K54 ១ ដើមបាញ់សម្រុកចូលផ្ទះជនរងគ្រោះ។ ក្រុមចោរប្លន់បានបាញ់ជាង ១០ គ្រាប់ បណ្តាលឱ្យត្រូវចំដើមទ្រូងឈ្មោះ សឿម ចាន់ ភេទប្រុសអាយុ ២៤ ឆ្នាំ និងឈ្មោះ គឿន ធារី ភេទស្រីអាយុ ៣១ ឆ្នាំ ជាកូនម្ចាស់ផ្ទះស្លាប់នៅកន្លែង និងឈ្មោះ សឿម ផល្លី រងរបួសធ្ងន់។ ឯក្រុមចោរយកបានលុយជិត ៣០ ម៉ឺនរៀល និងខ្សែកប្លាទីនចំនួន ៣ ជីហើយរត់គេចបាត់។
ក្រោយធ្វើសកម្មភាពក្រុមជនជាប់ចោទបានគេចខ្លួនបានជាង ៣ ឆ្នាំទើបឆ្នាំ ២០១៤ សមត្ថកិច្ចស្រាវជ្រាវចាប់ឈ្មោះ ភិន ភន នៅ ខេត្តបាត់ដំបង និងឈ្មោះ នឹម ចិត្ត និង នាង ស៊ីណាត ត្រូវសមត្ថកិច្ចចាប់បាននៅរាជធានីភ្នំពេញ។
ក្រោយឃាត់ខ្លួនឈ្មោះ នឹម ចិត្ត បានសារភាពប្រាប់សមត្ថកិច្ចថា គាត់ និងបក្ខពួកធ្លាប់ធ្វើសកម្មភាពប្លន់បាន ១១ លើក និងធ្វើឱ្យជនរងគ្រោះស្លាប់ ៣ នាក់ និងរបួសធ្ងន់ស្រាល ៩ នាក់ នៅខេត្តបន្ទាយមានជ័យ, ពោធិ៍សាត់ និងខេត្តបាត់ដំបង។ សំណុំរឿងនេះត្រូវសាលាដំបូងខេត្តបាត់ដំបងបើកសវនាការ និងប្រកាសសាលក្រមនៅថ្ងៃទី ១៧ កុម្ភៈ ឆ្នាំ ២០១៥ សម្រេចផ្តន្ទាទោសក្នុងម្នាក់ៗ ៣០ ឆ្នាំ ចោទពីបទឃាតកម្មគិតទុកជាមុនតាមមាត្រា ២០០ នៃក្រមព្រហ្មទណ្ឌរីឯឈ្មោះ ភិន ភន ចោទបទសមគំនិតក្នុងអំពើឃាតកម្ម។
នៅក្នុងបន្ទប់សវនាការពីម្សិលមិញជនជាប់ចោទឈ្មោះ នឹម ចិត្តបានឆ្លើយប្រាប់ចៅក្រមថា នៅយប់ថ្ងៃកើតហេតុនោះគាត់មានគ្នាតែ ២ នាក់ទេ ដោយម្នាក់ទៀតឈ្មោះ ភិន ភន ជាអ្នកកាន់កាំភ្លើង AK ព្រោះជាអតីតយោធា។ ចំណែកឈ្មោះ នាង ស៊ីណាត មិនបានចូលរួមប្លន់ទេ។ ឈ្មោះ នាង ស៊ីណាត ជាមិត្តភកិ្តរបស់គាត់ទើបមកពីធ្វើកម្មករនៅប្រទេសថៃហើយគាត់បានហៅមកលេងបន្ទប់ជួលរបស់គាត់ក៏ត្រូវសមត្ថកិច្ចចាប់ខ្លួន។
ជនជាប់ចោទថា៖ «ខ្ញុំបានសារភាពតាំងពីនៅឧទ្ធរណ៍ថាខ្ញុំធ្វើសកម្មភាពជាមួយតែឈ្មោះភិន ភន ទេ ចំណែកឈ្មោះ នាង ស៊ីណាត គឺគាត់មិនបានចូលរួមទេ។ ខ្ញុំសុំតុលាការឱ្យខ្ញុំជាប់ទោស ២០ ឆ្នាំក៏សុខចិត្តដែរ»។
រីឯឈ្មោះ នាង ស៊ីណាត និយាយប្រាប់ចៅក្រមថា គាត់មិនបានចូលរួមប្លន់សម្លាប់ជនរងគ្រោះទេគាត់ទៅធ្វើការជាកម្មករនៅប្រទេសថៃហើយគាត់មករាជធានីភ្នំពេញ និងចូលលេង ឈ្មោះ នឹម ចិត្ត ក៏ត្រូវសមត្ថកិច្ចចាប់ខ្លួនតែម្តង។ ខ្ញុំសូមឱ្យតុលាការដោះលែងខ្ញុំវិញ»។
លោក អ៊ុក គឹមសិទ្ធ តំណាងមហាអយ្យការសន្និដ្ឋានថា តាមកំណត់ហេតុសមត្ថកិច្ចបង្ហាញថា ក្រុមជនជាប់ចោទពិតជាបានធ្វើសកម្មភាពដូចការចោទរបស់សាលាឧទ្ធរណ៍។ «ហេតុដូច្នេះខ្ញុំសូមតម្កល់សាលដីកាឧទ្ធរណ៍ដដែល»។
លោក ឆែ វិបុល ជាមេធាវីការពារសិទ្ធិឱ្យជនជាប់ចោទទាំង ២ នាក់សន្និដ្ឋានថាកូនក្តីរបស់លោកឈ្មោះ នឹម ចិត្ត ពិតជាបានប្រព្រឹត្តបទល្មើសមែន។ តែកូនក្តីឈ្មោះ នាង ស៊ីណាត គឺគាត់ប្រាប់តុលាការហើយថា គាត់មិនបានចូលរួមទេ។
លោកថ្លែងថា សូមតុលាការបន្ថយទោសដល់កូនក្តីលោក និងឈ្មោះ នាង ស៊ីណាត សុំតុលាការដោះលែងឱ្យមានសេរីភាពផង។
ក្រោយជំនុំជម្រះលោក ឃឹម ប៉ុណ្ណ ប្រធានក្រុមប្រឹក្សាជំនុំជម្រះបានថ្លែងថាសាលដីកានៃសំណុំរឿងនេះនឹងប្រកាសនៅថ្ងៃទី ១៨ មករា៕
