ភ្នំពេញៈ តុលាការកំពូលកាលពីម្សិលមិញបានបើកសវនាការជម្រះក្ដីកំបាំងមុខលើសំណុំរឿងសុំនៅក្រៅឃុំរបស់ជនត្រូវចោទ ១០ នាក់ ដែលជាសមាជិកអតីតគណបក្សសង្គ្រោះជាតិដែលបានជាប់ចោទពីបទរួមគំនិតក្បត់ និងញុះញង់ឲ្យប្រព្រឹត្តបទឧក្រិដ្ឋជាអាទិ៍កាលពីចុងឆ្នាំ ២០១៩ ខណៈដែលពួកគេកំពុងនៅក្រៅឃុំ។
លោកស្រី ក្រឡាបញ្ជីឈ្មោះ ជួន អាលីហ្សា បានឲ្យដឹងក្រោយពីសវនាការថា៖ «សំណុំរឿងនេះតុលាការកំពូលនឹងសម្រេចលើកទៅប្រកាសសាលដីកានៅថ្ងៃទី ១៣ កក្កដា ខាងមុខនេះ»។
លោក សំ សុគង់ មេធាវី ការពារសិទ្ធិឲ្យជនត្រូវចោទទាំង ១០ នាក់នោះបានឲ្យដឹងកាលពីម្សិលមិញតាមរយៈទូរស័ព្ទថា លោកមិនបានចូលរួមក្នុងសវនាការទេ។
លោក សុគង់ ថ្លែងថា៖ «ពួកគាត់ទាំង ១០ នាក់នោះកំពុងរស់នៅក្រៅឃុំទេ ហើយតុលាការកំពូលជម្រះនេះទាក់ទងនឹងសំណុំរឿងសុំនៅក្រៅឃុំទេ»។
លោក មេធាវី សំ សុគង់ ឲ្យដឹងថាទាក់ទងបញ្ហាដែលពួកគាត់នៅក្រៅឃុំហើយសំណុំរឿងសុំនៅក្រៅឃុំទើបតែលើកមកជំនុំជម្រះពេលនេះគឺដោយសារកាលនោះតុលាការរាជធានីភ្នំពេញបានបដិសេធបណ្តឹងសុំនៅក្រៅឃុំរបស់ពួកគាត់ម្តងហើយ ហើយលោកបានប្តឹងទាស់ទៅសាលាឧទ្ធរណ៍។ ក្រោយមកសាលាដំបូងរាជធានីភ្នំពេញប្រកាសឲ្យដោះលែងពួកគាត់វិញ។
គួររំឭកថា កាលនោះជនត្រូវចោទទាំង ១០ នាក់ ត្រូវបានសមត្ថកិច្ចនគរបាលឃាត់ខ្លួនកាលពីថ្ងៃទី ៥ ខែវិច្ឆិកា ឆ្នាំ ២០១៩ ស្ថិតនៅស្នាក់ការរបស់គណបក្សសង្គ្រោះជាតិ ផ្ទះលេខ ៥៧៦ ផ្លូវជាតិលេខ ២ ក្រុមទី ១៣ ភូមិព្រែកតាគង់ ២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញក្រោយពីមានការប្រកាសវិលចូលប្រទេសវិញរបស់លោក សម រង្ស៊ី។
ជនត្រូវចោទទាំង ១០ នាក់ ត្រូវបានចៅក្រមសាលាដំបូងរាជធានីភ្នំពេញចោទប្រកាន់ពីបទរួមគំនិតក្បត់ និង ញុះញង់ឲ្យប្រព្រឹត្តបទឧក្រិដ្ឋជាអាទិ៍។ ក្រោយមកនៅថ្ងៃទី ១៤ ខែវិច្ឆិកា ឆ្នាំ ២០១៩ ត្រូវបានលោក កូយ សៅ ចៅក្រមស៊ើបសួរនៃសាលាដំបូងរាជធានីភ្នំពេញចេញដីកាដោះលែងឲ្យជនទាំង ១០ នាក់ នៅក្រៅឃុំបណ្តោះអាសន្ន៕