ភ្នំពេញៈ តុលាការកំពូលកាលពីម្សិលមិញបានសម្រេចតម្កល់ទោសចំពោះសកម្មជនអតីតគណបក្សសង្គ្រោះជាតិដែលជាជនជាប់ចោទឈ្មោះ គង់ ម៉ាស់ ឲ្យជាប់ពន្ធនាគារ ១ ឆ្នាំកន្លះដដែល ពាក់ព័ន្ធបទចោទ ប្រមាថ និងញុះញង់ឲ្យប្រព្រឹត្តបទឧក្រិដ្ឋជាអាទិ៍ដែលបានប្រព្រឹត្តនៅរាជធានីភ្នំពេញអំឡុងឆ្នាំ ២០១៩។
លោក ចៅក្រម យូ យុត្ថារ៉ា បានអានសាលដីកាកំបាំងមុខនៅក្នុងសវនាការកាលពីម្សិលមិញចំពោះមុខជនជាប់ចោទ និងមេធាវីការពារសិទ្ធិឲ្យជនជាប់ចោទដោយយោងតាមកំណត់ហេតុរបស់សាលាឧទ្ធរណ៍បានបង្ហាញថា ការសន្និដ្ឋានរបស់តំណាងមហាអយ្យការកាលពីជំនុំជម្រះនៅសាលាឧទ្ធរណ៍ ជនជាប់ចោទបានសរសេរសារហើយថែមទាំងបានទទួលស្គាល់ក្នុងពេលជំនុំជម្រះថាខ្លួនពិតជាបានសរសេរសារបង្ហោះក្នុងបណ្តាញទំនាក់ទំនងសង្គមហ្វេសប៊ុកមែនដោយកុំឲ្យប្រជាពលរដ្ឋទៅបោះឆ្នោតបើគ្មានគណបក្សសង្គ្រោះជាតិ។
លោកចៅក្រមបានថ្លែងទៀតថា៖ «ករណីនេះបង្ហាញពីភ័ស្តុតាងជាក់ស្តែងរបស់ជនជាប់ចោទ។ ចំពោះតំណាងមហាអយ្យការនៅតុលាការកំពូលវិញកាលពីថ្ងៃជំនុំជម្រះក៏បានធ្វើការសន្និដ្ឋានប្រហាក់ប្រហែលដូចគ្នានឹងសេចក្តីសន្និដ្ឋានរបស់តំណាងមហាអយ្យការសាលាឧទ្ធរណ៍ដែរ។ ដូច្នេះជនជាប់ចោទពិតជាមានពិរុទ្ធភាពក្នុងការចោទប្រកាន់ហើយតុលាការកំពូលសម្រេចតម្កល់សាលដីការបស់សាលាឧទ្ធរណ៍ទុកជាបានការដដែល»។
លោក សំ សុគង់ ជាមេធាវីការពារសិទ្ធិឲ្យជនជាប់ចោទ គង់ ម៉ាស់ បានឲ្យដឹងតាមរយៈទូរស័ព្ទកាលពីម្សិលមិញថាការដែលតុលាការកំពូលតម្កល់សាលដីការបស់សាលាឧទ្ធរណ៍នេះគឺមិនអាចទទួលយកបានទេ ព្រោះការសម្រេចរបស់តុលាការកំពូលនេះមិនបានផ្តល់យុត្តិធម៌ដល់ជនជាប់ចោទទេ។
លោក សុគង់ ថ្លែងថា៖ «ប៉ុន្តែដោយសារតុលាការកំពូលជាតុលាការជាន់ខ្ពស់ហើយសាលដីការបស់តុលាការកំពូលគឺជាសាលដីកាបិទផ្លូវតវ៉ាដូច្នេះយើងគ្មានអ្វីតវ៉ាទៀតទេ»។
អ្នកស្រី កុល សាត ជាភរិយាជនជាប់ចោទ គង់ ម៉ាស់ ធ្លាប់បានឲ្យដឹងថា ប្តីរបស់អ្នកស្រីត្រូវសមត្ថកិច្ចឃាត់ខ្លួនកាលពីថ្ងៃទី ១៦ ខែ មករា ឆ្នាំ ២០១៩ នៅរាជធានីភ្នំពេញ។ នៅថ្ងៃទី ១៩ ខែ កក្កដា ឆ្នាំ ២០២០ ប្តីអ្នកស្រីដល់ថ្ងៃកំណត់ចេញពីពន្ធនាគារហើយ។ ប៉ុន្តែដោយហេតុតុលាការខេត្តស្វាយរៀងប្រាប់មកពន្ធនាគារព្រៃសឲ្យបន្តឃុំប្ដីអ្នកស្រីថែម ១៥ ថ្ងៃទៀតរហូតដល់ថ្ងៃទី ៣ សីហា ឆ្នាំ ២០២០ទើបផុតកំណត់ជាប់ឃុំ ព្រោះជាប់បណ្តឹងមួយទៀតពីបទបរិហារកេរ្តិ៍ជាប់ទោស ១៥ ថ្ងៃ និងត្រូវសងសំណង ៤ លានរៀល និងពិន័យ ១ លានរៀល៕