.jpg)
អតីតអ្នកកាសែតអាស៊ីសេរី លោក អ៊ួន ឈិន និងលោក យាង សុធារិន។ ហ៊ាន រង្សី
ភ្នំពេញៈតុលាការកំពូលបានបើកសវនាការកាលពីពីម្សិលមិញ ដោយបានប្រកាសសាលដីកាសម្រេចតម្កល់សាលដីកា តាមការសម្រេចរបស់តុលាការថ្នាក់ក្រោមដែលអនុញ្ញាតឲ្យមានការស៊ើបអង្កេតឡើងវិញលើករណីអតីតអ្នកកាសែតវិទ្យុអាស៊ីសេរី ២ នាក់ ក្នុងសំណុំរឿងក្នុងសំណុំរឿងផលិត និងកាន់កាប់រូបភាពអាសអាភាស។
លោកស្រីចៅក្រម គិម សត្ថាវី បានអានសាលដីការកាលពីម្សិលមិញនៅក្នុងបន្ទប់សវនាការតុលាការកំពូលនៅចំពោះមុខមេធាវី និងនៅចំពោះមុខ លោក អ៊ួន ឈិន និង លោក យាង សុធារិន អតីតបុគ្គលិកវិទ្យុអាស៊ីសេរីថាជនត្រូវចោទទាំង ២ នាក់ បានប្តឹងសារទុក្ខមកតុលាការកំពូលប្រឆាំងនឹងសាលក្រមចាត់របៀប (ឲ្យមានការស៊ើបអង្កេតឡើងវិញ)។
លោកស្រីចៅក្រមថ្លែងថា៖ «ករណីនេះក្រោយពីតុលាការកំពូលបើកសវនាការមក ក្រុមប្រឹក្សាជំនុំជម្រះយល់ឃើញថាសម្រេចតម្កល់សាលដីការបស់សាលាឧទ្ធរណ៍ទុកជាបានការដដែល។ សំណុំរឿងនេះតុលាការកំពូលរក្សាតាមសាលដីការបស់សាលាឧទ្ធរណ៍ដដែល»។
លោក សំ ចំរើន មេធាវី ការពារសិទ្ធិឲ្យជនត្រូវចោទទាំង ២ នាក់ប្រាប់ភ្នំពេញប៉ុស្តិ៍នៅក្រៅបន្ទប់សវនាការថា ការសម្រេចសេចក្តីរបស់តុលាការកំពូលពេលនេះជារឿងអយុត្តិធម៌ចំពោះកូនក្តីលោក។
លោក ចំរើន ថ្លែងថា៖ «ខ្ញុំយល់ថានេះជាការអនុវត្តច្បាប់មួយនៅមានកម្រិតដែលមិនតាមគោលបំណងរបស់ច្បាប់ទេ»។
លោកឲ្យដឹងថា តាមពិតកូនក្តីលោកត្រូវសាលាដំបូងរាជធានីភ្នំពេញចោទ ២ បទល្មើស គឺផ្តល់ព័ត៌មានឲ្យរដ្ឋបរទេស និងផលិតរូបភាពអាសអាភាស ហើយក្រោយមកសាលារាជធានីភ្នំពេញបានបើកសវនាការជំនុំជម្រះរឿងក្តីទាំង២បទចោទនេះតែត្រូវបានលើកពេលប្រកាសសាលក្រមហើយតុលាការបែរជាចេញសាលក្រមចាត់របៀបឲ្យស៊ើបអង្កេតរឿងនេះឡើងវិញ។
បន្ទាប់មកកូនក្តីរបស់លោកបានដាក់ពាក្យប្តឹងប្រឆាំងនឹងសាលក្រមចាត់របៀបនៅសាលាដំបូងរាជធានីភ្នំពេញតែត្រូវមិនចាត់ការ។ បន្ទាប់មកកូនក្តីលោកបានប្តឹងទាស់មកសាលាឧទ្ធរណ៍ហើយត្រូវសាលាឧទ្ធរណ៍ប្រកាសសាលដីកាតម្កល់សាលក្រមរបស់សាលាដំបូងរាជធានីភ្នំពេញដដែល។
លោក ចំរើន ថ្លែងថា៖ «រឿងនេះកូនក្តីខ្ញុំតុលាការមិនទាន់កំណត់ទោសថាជាប់ប៉ុន្មានឆ្នាំទេ ហើយពេលនេះពួកគាត់ប្តឹងពាក់ព័ន្ធនឹងសាលក្រមចាត់របៀបតែប៉ុណ្ណោះ»៕
