.jpg)
ជនជាប់ចោទ ចៅ វាសនា នៅតុលាការកំពូល។ រូបថត គឹម សារុំ
ភ្នំពេញៈ តុលាការកំពូលកាលពីម្សិលមិញបានសម្រេចតម្កល់សាលដីការបស់តុលាការថ្នាក់ក្រោមឲ្យជាប់ពន្ធនាគារ ៥ ឆ្នាំដដែលចំពោះជនជាប់ចោទ ចៅ វាសនា ចៅសង្កាត់រងទី ២ នៃអតីតគណបក្សសង្គ្រោះជាតិពាក់ព័ន្ធការចូលរួមធ្វើបាតុកម្មបំផ្លាញស្នាក់ការគយនៅក្រុងប៉ោយប៉ែតកាលពីឆ្នាំ ២០១៥។
លោក សឹង បញ្ញាវុឌ្ឍ ចៅក្រមនៃតុលាការកំពូលនៅក្នុងសវនាការកាលពីម្សិលមិញបានអានសាលដីកាដោយកំបាំងមុខ ជនជាប់ចោទក្នុងសំណុំរឿងដែលមានឈ្មោះ ចៅ វាសនា អាយុ ៥៥ ឆ្នាំដោយយោងតាមអង្គហេតុនៃសំណុំរឿងនេះបញ្ជាក់ថា ជនជាប់ចោទពិតជាបានប្រព្រឹត្តដូចការចោទប្រកាន់របស់តុលាការថ្នាក់ក្រោមមែន។
លោក ចៅក្រម ថ្លែងថា៖ «ក្រោយពីបានស្តាប់ការសន្និដ្ឋានរបស់មេធាវីការពារសិទ្ធិជនជាប់ចោទ ក្រោយពីបានស្តាប់ការសន្និដ្ឋានរបស់តំណាងមហាអយ្យការ និងក្រោយពីបានពិភាក្សាគ្នាមក ក្រុមប្រឹក្សាជំនុំជម្រះយល់ឃើញថា ការសម្រេចរបស់សាលាឧទ្ធរណ៍ជាការត្រឹមត្រូវ។ តុលាការកំពូលប្រកាសតម្កល់សាលដីការបស់សាលាឧទ្ធរណ៍ទុកជាបានការដដែល និងបន្តឃុំខ្លួនជនជាប់ចោទបន្តទៀត»។
លោក ជូង ជូងី មេធាវី ការពារសិទ្ធិឲ្យលោក ចៅវាសនា បានថ្លែងឲ្យដឹងតាមទូរស័ព្ទកាលពីម្សិលមិញដោយសម្ដែងការសោកស្តាយដែលតុលាការកំពូលតម្កល់សាលដីការបស់សាលាឧទ្ធរណ៍ពីការផ្តន្ទាទោសលោក ចៅ វាសនា ដដែល។
លោក មេធាវី ថ្លែងថា៖ «អ្វីដែលតុលាការកំពូលប្រកាសសាលដីកាតម្កល់ទោសកូនក្តីរបស់ខ្ញុំនេះ ខ្ញុំនៅតែមានការសោកស្តាយ។ តាមការសិក្សារឿងក្តីនេះឃើញថា លោក ចៅ វាសនា គាត់គ្មានចេតនាទៅផ្តើមឲ្យគេប្រើអំពើហិង្សាបំផ្លិចបំផ្លាញអីនោះគឺអត់មានទេ»។
លោក មេធាវី បានអះអាងថានៅពេលនោះគឺលោក ចៅ វាសនា មានបំណងសម្រុះសម្រួលក្នុងហេតុការណ៍ដែលបានកើតឡើងកន្លងមក គាត់បានចូលរួមសម្រុះសម្រួលបានជោគជ័យច្រើនលើកមកហើយ។ រីឯចៅសង្កាត់ប៉ោយប៉ែតកន្លងមកនៅពេលដែលលោក ចៅ វាសនា ចូលរួមសម្រុះសម្រួលនៅពេលមានបាតុកម្មម្តងៗបានជោគជ័យគឺចៅសង្កាត់ប៉ោយប៉ែតនោះតែងតែធ្វើរបាយការណ៍ទៅថ្នាក់ខេត្ត។
ប៉ុន្តែនៅថ្ងៃនោះគាត់ចូលរួមសម្រុះសម្រួលមិនបានជោគជ័យ ហើយសមត្ថកិច្ច និងតុលាការបែរជាដាក់កំហុសចោទគាត់ថា ជាអ្នកផ្តើមគំនិតក្នុងការធ្វើបាតុកម្មទៅវិញ។
តាមកំណត់ហេតុរបស់តុលាការបានបញ្ជាក់ថាកាលនៅថ្ងៃទី ២៥ ខែ ឧសភា ឆ្នាំ ២០១៥ មានក្រុមកម្មករអូសរទេះផ្ទុះការតវ៉ានៅមុខការិយាល័យគយក្នុងក្រុងប៉ោយប៉ែត។ នៅពេលនោះមានក្រុមកម្មករអូសរទេះជាច្រើននាក់បានប្រមូលផ្តុំគ្នា និងមានវត្តមានលោកចៅវាសនានៅទីនោះផង។
កំណត់ហេតុបង្ហាញបន្តថានៅពេលនោះលោកចៅ វាសនា បានស្រែកថា លោក ម៉ៅ ស៊ុន (កម្មករអូសរទេះ) ត្រូវសមត្ថកិច្ចអាវុធហត្ថវាយរហូតសន្លប់ ហើយត្រូវក្រុមកម្មករដូចគ្នាដឹកយកទៅសង្គ្រោះនៅមន្ទីរពេទ្យក្បែរនោះ។ បន្ទាប់មកលោក ចៅ វាសនា ស្រែកថាលោក ម៉ៅ ស៊ុន បានស្លាប់ហើយ។
កំណត់ហេតុបង្ហាញទៀតថាដោយសារតែគេឮសំឡេងជនជាប់ចោទស្រែកថា លោក ម៉ៅ ស៊ុន ស្លាប់ដូច្នេះទើបធ្វើឲ្យក្រុមកម្មករផ្ទុះកំហឹង ហើយបានសម្រុកចូលវាយកម្ទេចការិយាល័យគយ និងទ្រព្យសម្បត្តិក្នុងនោះផង។
លោក ចៅ វាសនា ត្រូវតុលាការខេត្តបន្ទាយមានជ័យកាលពីថ្ងៃទី ៧ ខែមិថុនា ឆ្នាំ ២០១៨ ផ្តន្ទាទោសដាក់ពន្ធនាគារ ៥ ឆ្នាំ និងបង្គាប់ឲ្យសងការខូចខាតការិយាល័យគយ ១ ម៉ឺនដុល្លារសងលោក គង់ សាអែម ជាមន្ត្រីគយ ៥០០ ដុល្លារ ថ្លៃព្យាបាល ម្ចាស់រថយន្ត ៨ គ្រឿង មានពី ៣០០ ដល់ ៧០០ ដុល្លារផង។ ដោយមិនសុខចិត្តលោក វាសនា បានប្តឹងទៅសាលាឧទ្ធរណ៍ ហើយត្រូវសាលាឧទ្ធរណ៍កាលពីថ្ងៃទី ១៣ ខែ មីនា ឆ្នាំ ២០១៩ តម្កល់សាលក្រមរបស់សាលាដំបូងឲ្យនៅដដែល៕
