The Phnom Penh Post Search

Search form

Logo of Phnom Penh Post newspaper Phnom Penh Post - តុលាការ​កំពូល​បដិសេធ​បណ្ដឹង​ចុងក្រោយ​លោក​ ហុង សុខហួរ




តុលាការ​កំពូល​បដិសេធ​បណ្ដឹង​ចុងក្រោយ​លោក​ ហុង សុខហួរ

លោក ហុង សុខហួរ​ ពេល​នាំ​ខ្លួន​ទៅ​សាលា​ដំបូង​រាជធានី​ភ្នំពេញ​កន្លង​មក​។
លោក ហុង សុខហួរ​ ពេល​នាំ​ខ្លួន​ទៅ​សាលា​ដំបូង​រាជធានី​ភ្នំពេញ​កន្លង​មក​។ ហេង ជីវ័ន

តុលាការ​កំពូល​បដិសេធ​បណ្ដឹង​ចុងក្រោយ​លោក​ ហុង សុខហួរ

ភ្នំពេញៈ ពាក្យ​ស្នើ​សុំ​ធានា​នៅ​ក្រៅ​ឃុំ​ចុង​ក្រោយ​របស់​សមាជិក​ព្រឹទ្ធសភា​មកពី​គណបក្ស​ប្រឆាំង​លោក ហុង សុខហួរ ដែល​ផ្អែក​លើ​ស្ថានភាព​សុខភាព​ត្រូវ​បាន​តុលាការ​កំពូល​បដិសេធ​កាលពី​ថ្ងៃ​សុក្រ​ដោយ​ប្រធាន​សភា​ព្រហ្មទណ្ឌ​បាន​លើក​ឡើង​​​ពី​ការ​អង្កេត​ឃើញ​របស់​សាលា​ឧទ្ធរណ៍​ថា​ការ​ដោះលែង​គាត់​អាច​នាំ​ឱ្យ​មាន​ «ភាព​ចលាចល»។

លោក ឃឹម ប៉ុណ្ណ អនុប្រធាន​តុលាការ​កំពូល​បាន​ឲ្យ​ដឹង​ថា​លោក សុខ ហួរ នឹង​បន្ត​ជាប់​ពន្ធនាគារ​ដោយសារ​លោក​​កំពុង​ស្ថិត​ក្នុង​នីតិវិធី​ជំនុំជម្រះ​របស់​សាលា​ដំបូង​នាពេល​បច្ចុប្បន្ន​ហើយ​ច្បាប់​ និង​​សណ្តាប់​ធ្នាប់​អាច​រង​ផលប៉ះពាល់​ដោយសារ​ការ​ដោះលែង​។

លោក​បាន​បន្ត​ថា៖ «យើង​តម្កល់​សេចក្តី​សម្រេច​របស់​សាលា​ឧទ្ធរណ៍​ដែល​​សម្រេច​បន្ត​ឃុំ​ខ្លួន​គាត់​ក្នុង​ពន្ធនាគារ។ ការ​បន្ត​​ឃុំ​ខ្លួន​គាត់​ធានា​ថា​គ្មាន​ភាព​ចលាចល​ និង​អសន្ដិសុខ​ឡើយ»។

កាលពី​ខែ​កញ្ញា​សាលា​ឧទ្ធរណ៍​បាន​បដិសេធ​ការ​សុំ​នៅ​ក្រៅ​ឃុំ​របស់​លោក​បន្ទាប់ពី​បាន​បារម្ភ​ថា​គាត់​អាច​រត់​គេច​ខ្លួន​ហើយ​អាច​បង្ក​ «​អសន្ដិសុខ​សង្គម» ប្រសិន​ជា​ដោះលែង​។

មេធាវី​ការពារ​ក្តី​លោក សុខហួរ លោក ជូង ជូងី កាលពី​ថ្ងៃ​សុក្រ​បាន​ឱ្យ​ដឹង​ថា​ការ​សម្រេច​នេះ​គឺ​ «អយុតិ្តធម៌​» ​ចំពោះ​កូន​ក្តី​លោក​ និង​ថា​គាត់​គួរ​​ត្រូវ​បាន​ដោះលែង​ព្រោះ​ពុំ​ទាន់​បាន​ផ្តន្ទាទោស​ទេ​រហូត​មក​ដល់​ពេល​នេះ​។

លោក ជូងី បាន​លើក​ឡើង​ថា៖ «ខ្ញុំ​សោកស្តាយ​ចំពោះ​​សេចក្តី​​សម្រេច​​នេះ​ដែល​អយុត្តិធម៌​ចំពោះ​កូន​ក្តី​​ខ្ញុំ​ដោយសារ​តែ​គាត់​នៅ​តែ​មាន​អភ័យ​ឯកសិទ្ធិ​ក្នុង​នាម​ជា​សមាជិក​ព្រឹទ្ធសភា​ហើយ​​ព្រឹទ្ធសភា​មិន​បាន​ដក​អភ័យ​ឯកសិទ្ធិ​របស់​គាត់​ទេ​»។

លោក​បាន​បន្ថែម​ថា​សំណើ​ពន្លឿន​នីតិវិធី​ និង​ការ​ដំឡើង​អ៊ីនធឺណិត​នៅ​សាលា​ដំបូង​រាជធានី​ភ្នំពេញ​ពុំ​ត្រូវ​បាន​ឆ្លើយតប​នោះ​ទេ​។

លោក​បាន​បន្ត​ថា៖ «ខ្ញុំ​បាន​ស្នើ​សុំ​តុលាការ​បើក​សវនាការ​លើ​រឿង​ក្តី​លោក​ ហុង ​សុខហួរ ដោយ​សុំ​ឲ្យ​ដំឡើង​ប្រព័ន្ធ​អ៊ីនធឺណិត​ និង​កុំព្យូទ័រ​ដើម្បី​​ឲ្យ​ខ្ញុំ​អាច​​បង្ហាញ​​ភ័ស្តុតាង​លើ​អ៊ីនធឺណិត​ក្នុង​បន្ទប់​សវនាការ»។

ដោយ​បង្ហាញ​ខ្លួន​នៅ​ចំពោះ​មុខ​តុលាការ​កំពូល​នៅ​ថ្ងៃ​ទី ២៦ ​ខែ​កុម្ភៈ​លោក​ សុខហួរ បាន​ឱ្យ​ដឹង​ថា​លោក​មាន​បំណង​តម្កល់​ប្រាក់​ចំនួន ២០ ​លាន​រៀល ($ ៥០០០) និង​លិខិត​ឆ្លងដែន​បារាំង​ និង​កម្ពុជា​របស់​លោក​ក្នុង​គោលបំណង​ដើម្បី​ព្យាបាល​ជំងឺ​លើស​ឈាម​ជំងឺ​ក្រពះ និង​ជំងឺ​ផ្តាសាយ​។

លោក សុខ ហួរ ដែល​មិន​មាន​វត្តមាន​នៅ​ក្នុង​តុលាការ​កំពូល​ត្រូវ​បាន​ចោទប្រកាន់​ពី​បទ​ក្លែងបន្លំ​ឯកសារ​សាធារណៈ​ការ​ប្រើ​ឯកសារ​​ក្លែង​ និង​បទ​ញុះញង់​ជា​សាធារណៈ​ដើម្បី​​បង្ក​ភាព​ចលាចល​ធ្ងន់ធ្ងរ​បន្ទាប់ពី​លោក​បាន​បង្ហោះ​ផ្នែក​ «ក្លែងក្លាយ​» នៃ​សន្ធិ​សញ្ញា​ព្រំដែន​ឆ្នាំ ១៩៧៩ រវាង​កម្ពុជា​ និង​វៀតណាម​លើ​បណ្ដាញ​ហ្វេសប៊ុក​កាលពី​ខែ​សីហា​ឆ្នាំ​មុន៕ TK

អត្ថបទគួរចាប់អារម្មណ៍