.jpg)
លោក រ៉ុង ឈុន អតីតគ្រូបង្រៀន។ ហុង មិនា
ភ្នំពេញៈ តុលាការកំពូលពីម្សិលមិញបានប្រកាសសាលដីកាកំបាំងមុខគ្រូបង្រៀនចំនួន១១នាក់ដោយបដិសេធបណ្តឹងសុំសិទ្ធិចូលបម្រើការងារជាគ្រូបង្រៀនរដ្ឋវិញ បន្ទាប់ពីបើកសវនាការជំនុំជម្រះកាលពីថ្ងៃទី២៤សីហាដែលសាលដីកានេះត្រូវបានមេធាវីការពារសិទ្ធិឲ្យគ្រូទាំង ១១ នាក់ យល់ថាជាការសម្រេចដែលមិនអាចទទួលយកបាន។
នៅក្នុងបន្ទប់សវនាការកាលពីម្សិលមិញលោកចៅក្រម និល ណុន បានអានសាលដីកាកំបាំងមុខលោកគ្រូទាំង ១១ នាក់ និងចំពោះមុខលោក មេធាវី ជួង ជូងី ដែលតំណាងឲ្យលោកគ្រូអ្នកគ្រូទាំង ១១ នាក់នោះថា ក្រោយពីបានស្តាប់ការសួរដេញដោលផ្ទាល់មាត់ជាមួយលោកគ្រូអ្នកគ្រូចំនួន ១១ នាក់ និងក្រោយពីបានស្តាប់សេចក្តីសន្និដ្ឋានរបស់មេធាវីការពារសិទ្ធិនិង ស្តាប់សេចក្តីសន្និដ្ឋានរបស់តំណាងមហាអយ្យការកាលពីថ្ងៃជំនុំជម្រះទី ២៤ សីហា មកនោះតុលាការកំពូលយល់ឃើញថាក្រសួងអប់រំចាត់វិធានការទៅតាមច្បាប់រដ្ឋបាលគឺជានីតិវិធីត្រឹមត្រូវហើយ។ ចំពោះលោកគ្រូ អ្នកគ្រូទាំង ១១ នាក់ ដែលបានយកបញ្ហានេះទៅប្តឹងនាយករដ្ឋមន្រ្តីនោះមិនមែនជាការត្រឹមត្រូវទេ។
លោកថ្លែងថា៖«តុលាការកំពូលយល់ឃើញថាការសម្រេចសេចក្តីរបស់សាលាឧទ្ធរណ៍ជាការត្រឹមត្រូវតាមច្បាប់ហើយ។ដូច្នេះតុលាការកំពូលតម្កល់សាលដីកាសាលាឧទ្ធរណ៍ទុកជាបានការដដែល»។
ភ្លាមៗបន្ទប់ពីចូលស្តាប់ការប្រកាសសាលដីកា នេះ លោក ជួង ជូងី មេធាវី ការពារសិទ្ធិឲ្យលោកគ្រូអ្នកគ្រូទាំង ១១ នាក់ បានសម្តែងប្រតិកម្មនៅក្រៅបន្ទប់សវនាការថា បញ្ហានេះគឺលោកមានការសោកស្តាយដែលតុលាការកំពូលនៅតែរក្សាសេចក្តីសម្រេចរបស់សាលាឧទ្ធរណ៍ដដែលដោយមិនបានផ្តល់ក្របខណ្ឌមន្រ្តីរាជការដល់គ្រូទាំង ១១ នាក់វិញ។
លោកថ្លែងថា៖ «មែនទែនទៅពួកគាត់មិនបានបោះបង់ចោលការងារជាមន្រ្តីរាជការនៅក្រសួងអប់រំទេហើយពួកគាត់នៅតែចង់បំពេញការងារនៅក្រសួងអប់រំដដែល»។
លោក មេធាវី បាន រំឮក ប្រាប់ថា គ្រូទាំងអស់មានចំនួន ១៣ នាក់ ដែលខាងក្រសួងអប់រំលុបឈ្មោះចេញមិនឲ្យធ្វើការប៉ុន្តែអ្នកប្តឹងតវ៉ាមានតែ ១១ នាក់ទេ រួមមាន៖ទី១-លោកគ្រូអ្នកគ្រូទាំងអស់មាន ទី១-ឈ្មោះលោកស្រី វង រុន្នី,ទី២-លោក គង់ ស៊ីវង្ស, ទី៣-លោក ជុំ ចាន់ (ជាប់ពន្ធនាគារ), ទី៤-លោកស្រី ហុង សុជា, ទី៥-លោក យិន ឈូនរ័ត្ន, ទី៦-លោក ខែម ស៊ីថា, ទី៧-លោក មុត ផល្លា, ទី៨-លោក លី ឌី, ទី៩-លោក ពៀក ម៉ាប់ (ជាប់ពន្ធនាគារ), ទី១០-លោកលោក រ៉ុង ឈុន (ជាប់ពន្ធនាគារ) និងទី១១-លោក ច័ន្ទ សុភាព។
លោកបន្តថា លោកគ្រូអ្នកគ្រូខាងលើមាន នៅខេត្តសៀមរាបចំនួន ៤ នាក់ នៅខេត្តព្រះសីហនុមាន ២ នាក់ និងក្រៅពីនេះក្នុងមួយខេត្ត-រាជធានីមានម្នាក់ដូចជា ខេត្តកំពត ព្រៃវែង កំពង់ចាម និងនៅខេត្តបាត់ដំបង និងរាជធានីភ្នំពេញមានលោករ៉ុងឈុន។ ពួកគាត់ពេលដែលគណបក្សសង្គ្រោះជាតិបង្កើតឡើងពួកគាត់បានចូលក្របខណ្ឌគណបក្សសង្គ្រោះជាតិហើយពេលសង្គ្រោះជាតិមានសំឡេងឆ្នោតពួកគាត់ខ្លះបានក្លាយជាក្រុមប្រឹក្សាស្រុក និងនៅខេត្តសៀមរាបមានជាប់ធ្វើជាមេឃុំម្នាក់។ ប៉ុន្តែនៅឆ្នាំ ២០១៧ ពួកគាត់ត្រូវបានក្រសួងអប់រំលុបឈ្មោះចោល។
លោកបន្តថា ពេលដែលពួកគាត់ទាំង ១១ នាក់ ទៅធ្វើនយោបាយឲ្យគណបក្សសង្គ្រោះជាតិនោះ គឺខាងក្រសួងអប់រំបានចេញប្រកាសដោយដាក់កូនក្តីរបស់លោកទាំង ១១ នាក់ ឲ្យនៅក្រៅក្របខណ្ឌ។ លុះពេលគណបក្សសង្គ្រោះជាតិត្រូវរំលាយក្នុងឆ្នាំ ២០១៧ ក៏ខាងរដ្ឋមន្រ្តីក្រសួងអប់រំចេញប្រកាសលុបឈ្មោះពួកគាត់ចេញពីក្របខណ្ឌគ្រូបង្រៀនតែម្តង។
លោកបញ្ជាក់ថា៖ «នៅក្នុងសំអាងហេតុសេចក្តីប្រកាសនោះ ថាអ្នកខ្លះអវត្តមានគ្មានច្បាប់ ឯអ្នកខ្លះថាបោះបង់ចោលការងារ។ ពួកគាត់ចាំតែរដ្ឋមន្រ្តីអប់រំហៅចូលធ្វើការទេតែខាងក្រសួងមិនចេញប្រកាសឲ្យពួកគាត់ចូលធ្វើការងារវិញ»។
ដោយឡែក លោក លី ឌី គ្រូបង្រៀននៅវិទ្យាល័យ ក្រុង-ខេត្តព្រះសីហនុ និងជាអតីតក្រុមប្រឹក្សា ខេត្តនៃគណបក្សសង្គ្រោះជាតិក្នុងចំណោមគ្រូ ១១ នាក់ បានប្រាប់តាមទូរស័ព្ទពីម្សិលមិញថា តុលាការកំពូលលើកហេតុផលផ្អែកតាមតុលាការថ្នាក់ក្រោមនិងសម្រេចច្រានចោលបណ្តឹងពួកគាត់គ្មានហេតុផលតែគ្មានការស្រាវជ្រាវឲ្យបានល្អិតល្អន់ទេ។តែបើស្រាវជ្រាវដល់មូលដ្ឋានគឺលោកជឿថា តុលាការកំពូលមិនអាចបដិសេធបណ្តឹងរបស់ពួកគាត់បានទេ។ព្រោះពួកគាត់សុទ្ធតែបញ្ញវ័ន្ត ដែលបង្រៀនមិនតិចជាង ៣០ ឆ្នាំនោះទេ។
រីឯលោក យិន ឈូករ័ត្ន ជាគ្រូបង្រៀននៅសាលាបឋមសិក្សាភូមិត្រពាំងម្នាស់ឃុំដងទង ខេត្តកំពត និងជាអតីតក្រុមប្រឹក្សាខេត្តកំពតនៃអតីតគណបក្សសង្គ្រោះជាតិម្នាក់ដែរនោះបានប្រាប់ពីម្សិលមិញថា ករណីតុលាការកំពូលប្រកាសសាលដីកាតម្កល់បណ្តឹងសុំចូលក្របខណ្ឌវិញនេះ គឺលោកបានដឹងជាមុនរួចទៅហើយតាំងពីពេលជំនុំជម្រះម៉្លេះ។ ហេតុដូច្នេះលោកគ្មានអ្វីភ្ញាក់ផ្អើលទេ។
លោកថា៖ «តុលាការនៅកម្ពុជាយើង គឺគ្មានយុត្តិធម៌សម្រាប់ពួកយើងរួចទៅហើយហើយការលុបឈ្មោះពួកយើងជារឿងនយោបាយ»៕
