.jpg)
បុរសអ្នកលក់ដូងជិះម៉ូតូកាត់មុខអតីតស្នាក់ការបក្សសង្គ្រោះជាតិ នៅសង្កាត់ចាក់អង្រែលើ។ ហុង មិនា
ភ្នំពេញៈ តុលាការកំពូលពីម្សិលមិញបានប្រកាសតម្កល់សាលដីកាមិនប្រគល់ទីតាំងស្នាក់ការដែលគណបក្សភ្លើងទៀនជួលឲ្យអតីតគណបក្សសង្គ្រោះជាតិនោះទៅឲ្យបក្សភ្លើងទៀនវិញឡើយ ដោយថា ទីតាំងស្នាក់ការដែលបក្សសង្គ្រោះជាតិជួលនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញនោះមានជាប់ពាក់ព័ន្ធនឹងបទល្មើសឧក្រិដ្ឋស្មុគស្មាញ។
តាមកំណត់ហេតុរបស់តុលាការកំពូលបង្ហាញថា សំណុំរឿងនេះមានភ្ជាប់ឈ្មោះជនត្រូវចោទចំនួន ១០ នាក់ដែលមានទី១- ឈ្មោះ ជួន សុផល ទី២- ឈ្មោះ ង៉ុក សំអូន ទី៣- ឈ្មោះ ថន ប៊ុនធឿន ទី៤- ឈ្មោះ ហុក សំអាង ទី៥- ឈ្មោះ ស្រង់ ឡាយ ទី៦- ឈ្មោះ ប៊ុន គឹមអ៊ា ទី៧- ឈ្មោះ ពួក ចន្តា ទី៨- ឈ្មោះ សួ តារា ទី៩- ឈ្មោះ ស៊ី ដារ៉ា និងឈ្មោះ ទឹម សាម៉េត ដែលពួកគេមានមេធាវីការពារសិទ្ធិ ឈ្មោះ សំ សុគង់។ លោក ទាវ វណ្ណុល ប្រធានគណបក្សភ្លើងទៀនជាដើមបណ្តឹងដែលមានលោកមេធាវី សំ សុគង់ ជាតំណាងនោះបានប្តឹងទាមទារយកស្នាក់ការដែលជួលទៅឲ្យគណបក្សសង្គ្រោះជាតិយកមកគ្រប់គ្រងវិញ។
ការប្តឹងទាមទារនេះបានកើតឡើងបន្ទាប់ពីគណបក្សសង្គ្រោះជាតិត្រូវបានរំលាយ ហើយសន្តិសុខយាមស្នាក់ការចំនួន ១០ នាក់ ក៏ត្រូវបានសមត្ថកិច្ចឃាត់ខ្លួនផងដែរកាលពីឆ្នាំ ២០១៩។ ប៉ុន្តែក្រោយឃាត់ខ្លួនប្រមាណ ២ សប្តាហ៍ត្រូវបានតុលាការដោះលែងឲ្យនៅក្រៅឃុំបណ្តោះអាសន្នដោយដាក់ឲ្យពួកគេស្ថិតនៅក្រោមការត្រួតពិនិត្យរបស់តុលាការ។ ដូច្នេះសំណុំរឿងប្តឹងទាមទារស្នាក់ការបក្សនេះក៏មានជាប់ពាក់ព័ន្ធនឹងជនត្រូវចោទទាំង ១០ នាក់នោះដែរ។
លោក និល ណុន អនុប្រធានតុលាការកំពូល និងជាចៅក្រមជំនុំជម្រះពីម្សិលមិញបានអានសាលដីកានៅក្នុងបន្ទប់សវនាការដោយកំបាំងមុខមេធាវីថា ក្រោយពីតុលាការបានបើកសវនាការជំនុំជម្រះកាលពីថ្ងៃទី ៦ កក្កដា ឆ្នាំ ២០២០ និងស្តាប់សេចក្តីសន្និដ្ឋានរបស់តំណាងមហាអយ្យការមកក្រុមប្រឹក្សាជំនុំជម្រះយល់ឃើញថា ស្នាក់ការរបស់អតីតគណបក្សសង្គ្រោះជាតិដែលមានទីតាំងនៅផ្ទះលេខ ៥៧៦ ផ្លូវជាតិលេខ ២ ក្រុមទី ១៣ ភូមិព្រែកតាគង់២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ គឺជាកម្មសិទ្ធិរបស់គណបក្សភ្លើងទៀនហើយបានជួលឲ្យគណបក្សសង្គ្រោះជាតិដើម្បីធ្វើការ។ លោក ទាវ វណ្ណុល បានប្តឹងទាមទារយកស្នាក់ការគណបក្សដើម្បីបើកស្នាក់ការឡើងវិញ។
លោក និល ណុន ថា៖ «សាលាឧទ្ធរណ៍សម្រេចតម្កល់មិនអនុញ្ញាតប្រគល់ស្នាក់ការគណបក្សសង្គ្រោះជាតិឲ្យគណបក្សភ្លើងទៀនជាការត្រឹមត្រូវ។ ព្រោះស្នាក់ការគណបក្សមួយនេះមានជាប់ពាក់ព័ន្ធបទឧក្រិដ្ឋដែលមានចរិតស្មុគស្មាញហើយកំពុងស្ថិតក្នុងចំណាត់ការរបស់តុលាការ»។
លោកបញ្ជាក់ថា៖ «តុលាការកំពូលសម្រេចតម្កល់សាលដីកាតាមសាលាឧទ្ធរណ៍ និងយល់ថា សាលាឧទ្ធរណ៍មិនចាត់ការនេះជាការត្រឹមត្រូវតាមច្បាប់ហើយ»។
លោក សំ សុគង់ មេធាវីការពារសិទ្ធិឲ្យដើមបណ្តឹងគឺលោក ទាវ វណ្ណុល មិនធ្វើអត្ថាធិប្បាយច្រើនទៅលើការសម្រេចនេះទេ ដោយលោកគ្រាន់តែប្រាប់នៅក្រៅបន្ទប់សវនាការពីម្សិលមិញថា តុលាការកំពូលបដិសេធផ្តល់ស្នាក់ការគណបក្សភ្លើងទៀននេះជាឆន្ទានុសិទ្ធិរបស់តុលាការកំពូល។ ចំពោះជនត្រូវចោទ ១០ នាក់ដែលជាអតីតសន្តិសុខយាមស្នាក់ការគណបក្សសង្គ្រោះជាតិនោះត្រូវបានសាលាដំបូងរាជធានីភ្នំពេញដោះលែងពួកគាត់ឲ្យនៅក្រៅឃុំអស់ហើយ៕
