.jpg)
លោក William (ស្តាំ) និងលោកយន្ត មីន អភិបាលខេត្តព្រះសីហនុ។ fb William Guang
ភ្នំពេញៈ ប្រតិកម្មនឹងការផ្សព្វផ្សាយថា សាលដីកាតុលាការកំពូលខុសច្បាប់ពាក់ព័ន្ធនឹងការសម្រចលើដីទំនាស់នៅខេត្តព្រះសីហនុ អ្នកនាំពាក្យតុលាការកំពូល ពីម្សិលមិញ បានបញ្ជាក់ថា ខ្លួនរក្សាសិទ្ធិប្តឹងឲ្យចោទប្រកាន់ចំពោះការផ្សាយរបស់ម្ចាស់គណនីឈ្មោះ William Guang ដែលគេដឹងថា ជាប្រធានគណបក្សខ្មែរក្រោក ឈ្មោះ សុខ សុវណ្ណ វឌ្ឍនា សាប៊ុង សមាជិកឧត្តមក្រុមប្រឹក្សាពិគ្រោះ និងផ្តល់យោបល់។
អ្នកនាំពាក្យតុលាការកំពូល លោក នៅ មុនីជោត បានចេញសេចក្តីប្រកាសព័ត៌មានមួយកាលពីថ្ងៃទី ៥ មីនា ដោយចាត់ទុកការផ្សព្វផ្សាយរបស់លោក សុខ សុវណ្ណ វឌ្ឍនា សាប៊ុង ឬ William Guang ថា ជាការចោទប្រកាន់ដោយអសុទ្ធចិត្ត បំភាន់ ញុះញង់។
សេចក្តីប្រកាសព័ត៌មានរបស់តុលាការកំពូល បានលើកឡើងថា ម្ចាស់គណនីឈ្មោះ William Guang មិនបានពន្យល់ ថា «សាលដីកាខុសច្បាប់» កន្លែងណា? ព្រោះអ្វី?នោះទេ។ ផ្ទុយទៅវិញ សាលដីកាតុលាការកំពូល រហូតមកដល់ពេលនេះ នៅតែមានតម្លៃគតិយុត្ត ពីព្រោះមិនទាន់មានស្ថាប័ន ឬសមត្ថកិច្ចណាបដិសេធ ឬទុកជាមោឃៈឡើយ។
សេចក្តីប្រកាសព័ត៌មាន បញ្ជាក់ថា៖ «អ្នកនាំពាក្យតុលាការកំពូលសូមប្រកាសជាឱឡារិកថា តុលាការគ្រប់ជាន់ថ្នាក់ ដែលជាស្ថាប័នតំណាងឲ្យអំណាចទី ៣ នៃព្រះរាជាណាចក្រកម្ពុជាទទួលយកការរិះគន់ស្ថាបនាទាំងអស់ ដែលមានហេតុផលត្រឹមត្រូវ និងហ៊ានទទួលខុសត្រូវតាមច្បាប់នូវរាល់ចំណាត់ការរបស់ខ្លួន តែមិនទទួលយកដាច់ខាតនូវការវាយប្រហារទាំងឡាយណាដែលទុច្ចរិតគ្មានមូលដ្ឋាន ធ្វើឲ្យបាត់ជំនឿដល់តុលាការ និងរក្សាសិទ្ធិប្តឹងឲ្យចោទប្រកាន់តាមមាត្រា ៥២៣ នៃក្រមព្រហ្មទណ្ឌ»។
សេចក្តីប្រកាសព័ត៌មាន បានលើកឡើងពីម្ចាស់គណនី ឈ្មោះ William Guang ដែលបានចោទប្រកាន់ថាតុលាការ បានចេញសេចក្តីសម្រេចខុសបែបបទគតិយុត្ត ប៉ុន្តែឈ្មោះនេះ មិនមានសំអាងហេតុឬពន្យល់អ្វីទាំងអស់។ ផ្ទុយទៅវិញសេចក្តីសម្រេចរបស់តុលាការទាំង ៣ ថ្នាក់ មានសមាសភាពចៅក្រមសរុបរហូតដល់ទៅ ១៣ នាក់ សុទ្ធសឹងជាចៅក្រមអាជីព មានតាំងពីថ្នាក់វរចៅក្រម រហូតដល់ចៅក្រមផុតថ្នាក់។
អ្នកនាំពាក្យតុលាការកំពូល លោក នៅ មុនីជោត បានបញ្ជាក់ក្នុងសេចក្តីប្រកាសព័ត៌មាននោះ ថា៖ «តើបុគ្គល William Guang មានសមត្ថភាព សិទ្ធិ និងអំណាចអ្វី បានជាអាចមកបន្តុះបង្អាប់ការងាររបស់តុលាការយ៉ាងដូច្នេះ?»។
សេចក្តីប្រកាសព័ត៌មានដដែលបន្ថែមថា៖ «ម្ចាស់គណនីឈ្មោះ William Guang បានចោទប្រកាន់បន្ថែមទៀតថា យកដីរដ្ឋមកកាត់ក្តីចែកឯកជន។ នេះ គឺជាការចោទប្រកាន់ដោយអសុទ្ធចិត្ត ព្រមទាំងធ្វើការផ្សព្វផ្សាយជាសាធារណៈ ដោយបំភាន់ ញុះញង់ ក្នុងគោលបំណងធ្វើឲ្យបាត់ជំនឿលើសេចក្តីសម្រេចរបស់តុលាការ ពីព្រោះថា ដីដែលជាកម្មវត្ថុនៃវិវាទ គឺជាដីបានមកពីការទិញលក់ ហើយក្រសួងមានសមត្ថកិច្ចបានចេញប័ណ្ណសម្គាល់សិទ្ធិកាន់កាប់អចលនវត្ថុឲ្យទៀតផងមិនមែនជាដីរដ្ឋទេ»។
អ្នកនាំពាក្យរូបនេះ បានបន្តថា ដូច្នេះ តុលាការ គ្រាន់តែអនុវត្តតួនាទីរបស់ខ្លួន ដើម្បីផ្តល់យុត្តិធម៌ឲ្យគូភាគី នៅពេលមានបណ្តឹង ស្របតាមរដ្ឋធម្មនុញ្ញ និងច្បាប់ជាធរមានតែប៉ុណ្ណោះ។
នៅពេលទាក់ទងសុំការអត្ថាធិប្បាយបន្ថែមលើករណីនេះ អ្នកនាំពាក្យ លោក នៅ មុនីជោត បដិសេធធ្វើអត្ថាធិប្បាយដោយថា លោកបានចេញសេចក្តីប្រកាសព័ត៌មានរួចហើយ។
កាលពីថ្ងៃទី ២ មីនា នៅលើគណនីហ្វេសប៊ុករបស់ខ្លួន លោក William Guang បានសរសេរថា លោក យន្ត មីន អភិបាលខេត្តព្រះសីហនុ «ថ្លើមធំពាសមេឃមើលងាយអនុសាសន៍ណែនាំរបស់សម្ដេចតេជោ ហ៊ានចេញលិខិតអនុញ្ញាតឲ្យឈូសឆាយធ្វើរបងលើដីទំនាស់ភូមិគគីរ ដែលជាដីរបស់រដ្ឋ ហើយស្ថិតក្រោមសាលដីកាខុសច្បាប់នៅឡើយ ខណៈដែលតុលាការបានចេញសេចក្ដីសម្រេចទាំងខុសបែបបទគតិយុត្ត លោក យន្ត មីន កំពុងបំពានលើមតិណែនាំរបស់សម្ដេចតេជោ និងបំពានលើសេចក្ដីជូនដំណឹងរបស់ក្រសួងកសិកម្មលេខ ១០៨២ កសក» ។
ប្រធានគណបក្សខ្មែរក្រោករូបនេះបន្ថែមថា លិខិតរបស់លោក យន្ត មីន ធ្វើមុនមួយថ្ងៃការប្រជុំរបស់ឧត្តមក្រុមប្រឹក្សាពិគ្រោះ និងផ្ដល់យោបល់ជាមួយលោក ហ៊ុន សែន ដែលលោកបានបញ្ជាឲ្យឧបនាយករដ្ឋមន្ត្រី ជា សុផារ៉ា សើរើឡើងវិញហើយចំពោះបញ្ហាដីនេះ។
លោកបញ្ជាក់ថា ជនពាក់ព័ន្ធផលប្រយោជន៍លើការយកដីរដ្ឋមកកាត់ក្ដីចែកឯកជន គឺមិនរួចខ្លួនទេ ដីនេះជាដីរដ្ឋ ហេតុអ្វីឲ្យឯកជនទៅបោះរបងទៅវិញ។ យោងលិខិតនេះលោកថា នឹងធ្វើរបាយការណ៍ដាក់ជូនលោកនាយករដ្ឋមន្ត្រីហ៊ុន សែន ភ្លាមឲ្យលោកមានវិធានការចំពោះអភិបាលខេត្តរូបនេះ។
ជុំវិញសេចក្ដីប្រកាសព័ត៌មាននេះ លោក William Guang ប្រាប់ភ្នំពេញប៉ុស្ដិ៍កាលពីម្សិលមិញថា សេចក្ដីប្រកាសនេះជាសមត្ថកិច្ចរបស់តុលាការ ដូច្នេះតុលាការមានសិទ្ធិធ្វើការងារនេះ ហើយថា លោកមិនមានការព្រួយបារម្ភអ្វីទេ ដោយគ្រាន់តែបានធ្វើការងារទៅតាមច្បាប់តែប៉ុណ្ណោះ។
លោកថ្លែងថា៖ «ចំពោះការងារនេះ វាផុតដែនសមត្ថកិច្ចរបស់ឧត្ដមក្រុមប្រឹក្សាពិគ្រោះ និងផ្តល់យោបល់ ពីគណបក្សខ្មែរក្រោកហើយ។ ហេតុអី ព្រោះយើងបានរកឃើញតម្រុយពីភាពមិនប្រក្រតី។ នៅពេលដែលយើងរកឃើញតម្រុយពីភាពមិនប្រក្រតីជុំវិញបញ្ហានេះ យើងបានដាក់របាយការណ៍មួយដើម្បីស្នើឲ្យប្រមុខរដ្ឋាភិបាលលោកធ្វើការចាត់តាំងអាជ្ញាធរ ដើម្បីប្ដឹងទាស់ទៅលើសាលដីកាហ្នឹង នេះដែលយើងបានធ្វើ»។
លោកបន្ថែមថា ក្នុងកិច្ចប្រជុំឧត្ដមក្រមប្រឹក្សាពិគ្រោះ និងផ្ដល់យោបល់បូកសរុបការងារប្រចាំឆមាសជាមួយលោក ហ៊ុន សែន លោកក៏បានលើកទាក់ទងនឹងសាលដីកាដែលមានភាពមិនប្រក្រតី ដោយឈរលើបទដ្ឋានគតិយុត្តមិនទាន់ត្រឹមត្រូវ និងមួយទៀតលើការប្រើប្រាស់កងកម្លាំងប្រដាប់អាវុធលើសចំនួន និងប្រើកងយោធាទៅបង្រ្កាប។
លោកបានបញ្ជាក់ថា៖ «យើងទទួលបានការឆ្លើយតបទាំង ២ រហូតដល់លោក (ហ៊ុន សែន) បញ្ជាឲ្យសិក្សាដកយោធា និងដកអភិបាលរងខេត្ដ ២ រូបដែលពាក់ព័ន្ធនឹងបញ្ហាដីធ្លី»៕
