.jpg)
ភ្នំពេញៈ តុលាការកំពូលពីម្សិលមិញ បានជំនុំជម្រះជនជាប់ចោទម្នាក់ពាក់ព័ន្ធកាប់ជនរងគ្រោះម្នាក់ស្លាប់ក្នុងវង់ផឹកស៊ីនៅម្តុំផ្សារអូឡាំពិកក្នុង អំឡុងឆ្នាំ ២០១៣ ដែលត្រូវបានតុលាការថ្នាក់ក្រោមផ្តន្ទាទោសដាក់ពន្ធនាគារ ៧ ឆ្នាំនិងបង្គាប់ឲ្យសមត្ថកិច្ចតាមចាប់ខ្លួន។
តាមកំណត់ហេតុតុលាការបានបង្ហាញថានៅយប់ថ្ងៃទី ១១ ខែកក្កដាឆ្នាំ ២០១៣ មានមនុស្ស ២ ក្រុមដែលក្នុងមួយក្រុមមានគ្នាប្រមាណពី ៥ ទៅ ៦ នាក់បានជុំគ្នាផឹកស៊ី នៅកន្លែងមួយម្តុំផ្សារអូឡាំពិករាជធានីភ្នំពេញ។ ពេលកំពុងផឹកស៊ីនោះភាគីឈ្មោះសៅ សុផាន់ថង និងជនរងគ្រោះឈ្មោះប៊ុន គីមស៊នអាយុ ២៤ ឆ្នាំបានទាស់សម្តីគ្នាប៉ុន្តែបន្ទាប់ពីឈ្លោះប្រកែកគ្នាហើយក៏បែកគ្នាទៅ។ តែមួយសន្ទុះក្រោយមកស្រាប់តែជនជាប់ចោទ សៅ សុផាន់ថង បានជិះម៉ូតូ ២ គ្រឿង ត្រឡប់មកវិញដោយមនុស្សនៅលើម៉ូតូមានកាន់ដាវនិងកាំបិតកាប់លើជនរងគ្រោះត្រូវក្បាលជាច្រើនកាំបិតបណ្តាលឲ្យរបួសជាទម្ងន់ហើយត្រូវគ្នាគ្នីរបស់ជនរងគ្រោះដឹកទៅសង្គ្រោះនៅមន្ទីរពេទ្យកាល់ម៉ែត។
បើតាមឪពុករបស់ជនរងគ្រោះឈ្មោះ ប៊ុន គឹមសុង ដែលឡើងឆ្លើយបំភ្លឺនៅក្នុងសវនាការពីម្សិលមិញថាបន្ទាប់ពីបានទទួលដំណឹងគាត់បានធ្វើដំណើរពីខេត្តកំពង់ឆ្នាំងមកមើលកូន នៅមន្ទីរពេទ្យកាល់ម៉ែតបាន ១ យប់ ១ ថ្ងៃកូនរបស់គាត់ក៏ស្លាប់ទៅដោយសារស្ថានភាពរបួសធ្ងន់ពេក។បន្ទាប់មកដោយស្គាល់ឈ្មោះជនជាប់ចោទគាត់ក៏បានស្រាវជ្រាវតាមរយៈបណ្តាញទំនាក់ទំនងសង្គមហើយបានឃើញគណនីហ្វេសបុករបស់ជនជាប់ចោទហើយលោកក៏ដាក់ពាក្យបណ្តឹងនៅប៉ុស្តិ៍នគរបាលសង្កាត់អូឡាំពិក។
លោកប្រាប់ចៅក្រមថា៖ «កូនរបស់ខ្ញុំត្រូវជនជាប់ចោទកាប់ត្រូវក្បាលជាច្រើនកាំបិតហើយនៅក្នុងហ្វេសប៊ុកជននេះបានបង្ហោះសារថា យប់មិញក្រុមយើងបានកាប់មនុស្សម្នាក់។ រឿងនេះខ្ញុំសុំឲ្យតុលាការចាត់ការតាមច្បាប់»។
លោកនិយាយថា សំណុំរឿងនេះត្រូវសាលាដំបូងរាជធានីភ្នំពេញប្រកាសសាលក្រមនៅថ្ងៃទី ១២ ខែសីហា ឆ្នាំ ២០១៥ ផ្តន្ទាទោសដាក់ពន្ធនាគារ ៩ ឆ្នាំដោយឲ្យសងសំណង ៦០ លានរៀល ចោទពីបទហិង្សាដោយចេតនាមានស្ថានទម្ងន់ទោសដោយសារមរណភាពនៃជនរងគ្រោះនិងបង្គាប់ឲ្យសមត្ថកិច្ចស្វែងរកចាប់ខ្លួនជនជាប់ចោទ។ដោយមិនសុខចិត្តជនជាប់ចោទបានពឹងមេធាវីប្តឹងទាស់ទៅសាលាឧទ្ធរណ៍ហើយត្រូវសាលាឧទ្ធរណ៍ប្រកាសសាលដីកានៅថ្ងៃទី ២៣ មីនាឆ្នាំ ២០១៧ ផ្តន្ទាទោស ៧ ឆ្នាំវិញ និងបង្គាប់ឲ្យសមត្ថកិច្ចតាមចាប់ខ្លួនជនជាប់ចោទ។
លោក វ៉េង ប៊ុនធឿន ជាតំណាងមហាអយ្យការ បានសន្និដ្ឋានក្នុងសវនាការថា ឆ្លងតាមការពិនិត្យលើអង្គហេតុលោកយល់ថា សំណុំរឿងនេះមានសាក្សីនិងភ័ស្តុតាងគ្រប់គ្រាន់ដែលមានលក្ខណៈស៊ីចង្វាក់គ្នានិងគណនីយហ្វេសប៊ុករបស់ជនជាប់ចោទដែលបង្ហោះសាររៀបរាប់ពីអំពើហិង្សានេះ។
លោកថ្លែងថា៖ «នៅសាលាឧទ្ធរណ៍មេធាវីរបស់ជនជាប់ចោទក៏បានស្នើសុំចៅក្រមឲ្យបន្ថយទោសដល់កូនក្តីដែរដោយលើកឡើងថាអ្នកប្រព្រឹត្តច្រើននាក់ តែតុលាការដាក់ទោសតែកូនក្តីគាត់ម្នាក់។ ខ្ញុំសូមតម្កល់សាលដីការបស់សាលាឧទ្ធរណ៍ទុកជាបានការដដែល»។
លោកស្រីសំផុន សុផារ័ត្ន ជាមេធាវីការពារសិទ្ធិឲ្យជនជាប់ចោទសៅសុផាន់ថងបានសន្និដ្ឋានថារឿងនេះគ្មាននរណាម្នាក់នៅកន្លែងកើតហេតុជាភ័ស្តុតាងដើម្បីបំភ្លឺទេ និងគ្រាន់តែយកសាក្សីមកបំភ្លឺហើយចោទកូនក្តីរបស់លោកស្រីតែម្តងហើយសាក្សីទាំងអស់ សុទ្ធតែមិនស្គាល់អត្តសញ្ញាណជនជាប់ចោទទៀត។
លោកស្រីថា៖ «ខ្ញុំសុំឲ្យតុលាការបង្វិលសំណុំរឿងនេះទៅសាលាឧទ្ធរណ៍ជំនុំជម្រះឡើងវិញ»។
លោកឃឹម ប៉ុណ្ណ ប្រធានក្រុមប្រឹក្សាជំនុំជម្រះថ្លែងថា សាលដីកានៃសំណុំរឿងនេះនឹងប្រកាសនៅថ្ងៃទី ២៤ ខែមិថុនា ខាងមុខ៕
