.jpg)
ជនជាប់ចោទពេលសមត្ថកិច្ចនាំមកតុលាការកំពូលពីម្សិល។ រូប សារុំ
ភ្នំពេញៈ តុលាការកំពូលកាលពីម្សិលមិញបានជំនុំជម្រះជនជាប់ចោទម្នាក់ពាក់ព័ន្ធករណីប្លន់សម្លាប់ស្រ្តីរងគ្រោះម្នាក់នៅភូមិ ៥ ឃុំ ត្រែងត្រយឹង ស្រុកភ្នំស្រួច ខេត្ដកំពង់ស្ពឺ ប្រព្រឹត្តកាលពីឆ្នាំ ២០១៣ ខណៈសំណុំរឿងនេះត្រូវបានតុលាការថ្នាក់ក្រោមផ្តន្ទាទោស ២៥ ឆ្នាំ។
តាមកំណត់ហេតុតុលាការបង្ហាញថា កាលពីទៀបភ្លឺថ្ងៃទី ១៦ ខែ កក្កដា ឆ្នាំ ២០១៣ ស្រ្តីរងគ្រោះឈ្មោះ ទី សុឃឿន អាយុ ៣៦ ឆ្នាំ បានដាស់ប្តីរបស់គាត់ឲ្យទៅកាប់ជ្រូកដូចសព្វមួយដង។ បន្ទាប់ពីប្តីចេញទៅកាប់ជ្រូកបាត់ ស្រាប់តែមានមនុស្សឡើងផ្ទះស្រ្តីរងគ្រោះ ប៉ុន្តែមិនដឹងចំនួនប៉ុន្មាននាក់ទេ ហើយបានប្រើអំពើហិង្សា និងវាយមនុស្សនៅក្នុងផ្ទះនិងរើកកាយប្លន់យកទ្រព្យសម្បត្តិតែម្តង។
កំណត់ហេតុបន្តថា បន្ទាប់ពីក្រុមជនសង្ស័យធ្វើសកម្មភាពប្លន់ហើយ ក៏នាំគ្នារត់គេចខ្លួនបាត់អស់។ រីឯស្រ្តីរងគ្រោះសមត្ថកិច្ចបានពិនិត្យឃើញមានស្នាមចាក់នឹងអាវុធចុងស្រួចនៅលើដងខ្លួនជាច្រើនកន្លែង និងត្រូវក្បាល ហើយត្រូវក្រុមគ្រួសារដឹកទៅសង្គ្រោះតែបានស្លាប់ពេលបញ្ជូនដល់មន្ទីរពេទ្យបង្អែកខេត្តកំពង់ស្ពឺ។
ជាមួយគ្នានោះ កូនស្រ្តីរងគ្រោះ ឈ្មោះ ស៊ឹម ស្រីលក្ខណ៍ អាយុ ១៤ ឆ្នាំ បានប្រាប់សមត្ថកិច្ចថា នៅយប់ទៀបភ្លឺថ្ងៃកើតហេតុនោះ នាងក៏ត្រូវឈ្មោះ ខន សុភា ចាប់បោកនឹងគ្រែ ហើយវាយឲ្យរបួសផងដែរ។ ភ្លាមៗ ក្រោយកើតហេតុ សមត្ថកិច្ចបានចាប់ខ្លួនជនចាប់ចោទដោយសារឃើញនៅលើផ្ទៃមុខរបស់ជនជាប់ចោទមានស្នាមប្រឡាក់ឈាម។
បើតាមកំណត់ហេតុរបស់តុលាការដដែលបង្ហាញថាទ្រព្យសម្បត្តិដែលជនរងគ្រោះបាត់បង់រួមមាន មាស ១០ តម្លឹង, បា្លទីន ៧ តម្លឹង, លុយខ្មែរ ១០ លានរៀល និងលុយដុល្លារចំនួន ៣ ពាន់ដុល្លារទៀត។
ជនជាប់ចោទ ត្រូវបានសាលាដំបូងខេត្តកំពង់ស្ពឺប្រកាសសាលក្រមនៅថ្ងៃទី ១៦ ខែ កញ្ញា ឆ្នាំ ១០១៥ ដោយផ្តន្ទាទោសដាក់ពន្ទនាគារ ២៥ ឆ្នាំ ចោទបទលួចមានស្ថានទម្ងន់ទោសដោយសារមរណភាពនៃជនរងគ្រោះតាមមាត្រា ៣៥៣ និង ៣៦០ នៃក្រមព្រហ្មទណ្ឌ។ ប៉ុន្តែជនជាប់ចោទមិនសុខចិត្តបានប្តឹងទាស់ទៅសាលាឧទ្ធរណ៍ហើយត្រូវបានសាលាឧទ្ធរណ៍ប្រកាសសាលដីកានៅថ្ងៃទី ១៨ ខែ កញ្ញា ឆ្នាំ ២០១៨ ដោយសម្រេចតម្កល់ទណ្ឌកម្មទោស ២៥ ឆ្នាំដដែល។
ជនជាប់ចោទ បាននិយាយថា៖ «ខ្ញុំពិតជាមិនបានប្លន់វាយសម្លាប់ស្រ្តីរងគ្រោះទេហើយមុខខ្ញុំប្រឡាក់ឈាមដោយសារខ្ញុំដឹកស្រ្តីរងគ្រោះទៅមន្ទីរពេទ្យ។ខ្ញុំសុំតុលាការដោះលែងខ្ញុំឲ្យមានសេរីភាពវិញផង»។
លោក ឈួន ចាន់ថា តំណាងមហាអយ្យការសន្និដ្ឋានថាក្រោយពីបានពិនិត្យមើលអង្គហេតុ លោកយល់ឃើញថា ថ្វីដ្បិតតែជនជាប់ចោទបដិសេធក្នុងការប្រព្រឹត្តក្តី ប៉ុន្តែជនជាប់ចោទគ្មានអ្វីជាភ័ស្តុតាងដោះបន្ទុកទេ។ ម៉្យាងក្មេងស្រីម្នាក់ជាកូនស្រ្តីរងគ្រោះដែលជាជនរងគ្រោះនិងជាសាក្សីម្នាក់ដែរនោះថា ពេលនោះ នាងបានឃើញមុខជនជាប់ចោទ ព្រោះនៅក្នុងផ្ទះមានបើកភ្លើង។
លោកថា៖ «ដូច្នេះខ្ញុំស្នើក្រុមប្រឹក្សាជំនុំជម្រះតម្កល់សាលដីការបស់សាលាឧទ្ធរណ៍ទុកជាបានការ»។
លោក ស៊ិន វ៉ាន់នី មេធាវីការពារសិទ្ធិឲ្យជនជាប់ចោទបានសន្និដ្ឋានថា កូនក្តីរបស់លោកត្រូវបានកូនស្រីរបស់ស្រ្តីរងគ្រោះឆ្លើយដាក់ ប៉ុន្តែក្រោយមកបានធ្វើជាសាក្សីដោយប្រាប់តុលាការថា កូនក្តីរបស់លោកមិនបានប្រព្រឹត្តទេហើយនាងក៏មានការសោកស្តាយដែរដែលពីមុនឆ្លើយដាក់កូនក្តីរបស់លោក។
លោកថា៖ «ខ្ញុំសុំឲ្យតុលាការលើកលែងបទចោទ និងដោះលែងកូនក្តីខ្ញុំវិញ»។
ក្រោយជំនុំជម្រះលោក ឃឹម ប៉ុណ្ណ ប្រធានក្រុមប្រឹក្សាជំនុំជម្រះថ្លែងថា សាលដីកានេះនឹងប្រកាសនៅថ្ងៃទី ១ ខែ កក្កដា ខាងមុខ៕
