.jpg)
លោក គង់ ម៉ាស់ សកម្មជនអតីតគណបក្សសង្គ្រោះជាតិ។ រូបថត គីម សារុំ
ភ្នំពេញៈ តុលាការកំពូលពីម្សិលមិញបានជំនុំជម្រះក្ដីលើសំណុំរឿងសកម្មជនអតីតគណបក្សសង្គ្រោះជាតិម្នាក់គឺ លោក គង់ ម៉ាស់ ពាក់ព័ន្ធបទចោទប្រមាថ និងញុះញង់ឲ្យប្រព្រឹត្តបទឧក្រិដ្ឋជាអាទិ៍ដែលប្រព្រឹត្តនៅរាជធានីភ្នំពេញអំឡុងឆ្នាំ ២០១៩ ដែលតុលាការថ្នាក់ក្រោមទាំង ២ ថ្នាក់ផ្ដន្ទាទោសដាក់ពន្ធនាគារ ១ ឆ្នាំកន្លះ។
លោក គង់ ស្រ៊ីម ចៅក្រមប្រឹក្សាជំនុំជម្រះបានអានកំណត់ហេតុរបស់តុលាការកំពូលនៅក្នុងបន្ទប់សវនាការដោយអវត្តមានជនជាប់ចោទ និងនៅចំពោះមុខលោក សំ សុគង់ ជាមេធាវី ការពារសិទ្ធិឲ្យជនជាប់ចោទថា ជនជាប់ចោទឈ្មោះ គង់ ម៉ាស់ បានសរសេរសារក្នុងន័យរិះគន់ថ្នាក់ដឹកនាំរបស់រាជរដ្ឋាភិបាលកម្ពុជា។ ជនជាប់ចោទត្រូវសមត្ថកិច្ចឃាត់ខ្លួននៅរាជធានីភ្នំពេញអំឡុងឆ្នាំ ២០១៩។
លោកចៅក្រមអានកំណត់ហេតុបន្តថាជនជាប់ចោទ គង់ ម៉ាស់ ត្រូវបានសាលាដំបូងរាជធានីភ្នំពេញបើកសវនាការជំនុំជម្រះ និងប្រកាសសាលក្រមនៅថ្ងៃទី ១៨ ខែតុលា ឆ្នាំ ២០១៩ សម្រេចផ្តន្ទាទោសដាក់ពន្ធនាគាររយៈពេល ១ ឆ្នាំកន្លះចោទបទប្រមាថ និងញុះញង់ឲ្យប្រព្រឹត្តបទឧក្រិដ្ឋជាអាទិ៍តាមបញ្ញត្តិមាត្រា ៤៩៥ និងមាត្រា ៥០២ នៃក្រមព្រហ្មទណ្ឌ។
ប៉ុន្តែជនជាប់ចោទមិនសុខចិត្តនឹងទណ្ឌកម្មទោសនេះប្តឹងទាស់មកសាលាឧទ្ធរណ៍ហើយត្រូវសាលាឧទ្ធរណ៍ប្រកាសសាលដីកានៅថ្ងៃទី ២៣ ខែមីនា ឆ្នាំ ២០២០ សម្រេចតម្កល់សាលក្រមរបស់សាលាដំបូងរាជធានីភ្នំពេញដដែល។
ជនជាប់ចោទមិនសុខចិត្ត ហើយបានប្តឹងសារទុក្ខមកតុលាការកំពូលទៀត។ ក្នុងសេចក្តីសន្និដ្ឋានដោយអវត្តមានរបស់ជនជាប់ចោទនោះលោក ជុំ សំបាន តំណាងមហាអយ្យការថ្លែងថា ជនជាប់ចោទកាលពីជំនុំជម្រះនៅសាលាឧទ្ធរណ៍បានសារភាពដែលពាក់ព័ន្ធនឹងការសរសេរសារនៅលើបណ្តាញទំនាក់ទំនងក្នុងគណនីហ្វេសប៊ុករបស់គាត់ពិតប្រាកដមែន។
លោកថ្លែងថា៖ «ដូច្នេះការដែលសាលាឧទ្ធរណ៍សម្រេចតាមសាលក្រមរបស់សាលាដំបូងរាជធានីភ្នំពេញជាការត្រឹមត្រូវតាមច្បាប់ហើយ។ ខ្ញុំសូមតម្កល់សាលដីការបស់សាលាឧទ្ធរណ៍នៅដដែល»។
លោក សំ សុគង់ ជាមេធាវី ការពារសិទ្ធិឲ្យជនជាប់ចោទបានសន្និដ្ឋានថា មូលហេតុដែលកូនក្តីរបស់លោកប្តឹងសារទុក្ខមកតុលាការកំពូលពេលនេះដោយសារតែគាត់មិនសុខចិត្តនឹងការសម្រេចសេចក្តីរបស់សាលាឧទ្ធរណ៍ទាក់ទងនឹងការផ្តន្ទាទោស ១ ឆ្នាំកន្លះ។ កូនក្តីរបស់លោកយល់ថា ការផ្តន្ទាទោសនេះតុលាការមិនបានផ្តល់យុត្តិធម៌ដល់រូបគាត់ទេ។
លោកមេធាវីថ្លែងថា ចំពោះលោកតំណាងមហាអយ្យការថា កូនក្តីរបស់លោកបានសារភាពនៅសាលាឧទ្ធរណ៍នោះគឺមិនមែនទេ តែកូនក្តីលោកពេលសវនាការនៅសាលាឧទ្ធរណ៍បានឆ្លើយប្រាប់ចៅក្រមថា គាត់ពិតជាបានសរសេររិះគន់ថ្នាក់ដឹកនាំប្រទេសមែន។ ប្រការដែលនាំឲ្យកូនក្តីលោកសរសេរសាររិះគន់រដ្ឋាភិបាលគឺកើតឡើងបន្ទាប់ពីមានការរំលាយគណបក្សសង្គ្រោះជាតិអំឡុងឆ្នាំ ២០១៧។
លោក សុគង់ ថ្លែងថា៖ «គាត់គ្រាន់តែសរសេររិះគន់តែមិនមែនប្រមាថដូចការចោទប្រកាន់របស់តុលាការទេ។ ក្នុងប្រទេសកាន់លទ្ធិប្រជាធិបតេយ្យពលរដ្ឋមានសិទ្ធិបញ្ចេញមតិ។ គាត់ថា សូមប្រជាពលរដ្ឋកុំទៅបោះឆ្នោតបើគ្មានគណបក្សសង្គ្រោះជាតិ»។
លោកមេធាវី សុគង់ សន្និដ្ឋានបន្តទៀតថា កូនក្តីរបស់លោកលើកឡើងក្នុងនាមជាពលរដ្ឋម្នាក់ហើយក៏ជាសិទ្ធិបញ្ចេញមតិ និងសិទ្ធិធ្វើនយោបាយតែប៉ុណ្ណោះ។ ក្នុងនាមលោកជាមេធាវីលោកស្នើសុំតុលាការកំពូលទាត់ចោលសាលដីការបស់សាលាឧទ្ធរណ៍ និងសូមដោះលែងកូនក្តីលោកឲ្យមានសេរីភាពឡើងវិញ។
លោក ចៅក្រម យូ យុត្ថារ៉ា ប្រធានក្រុមប្រឹក្សាជំនុំជម្រះថ្លែងក្រោយបញ្ចប់សវនាការថា សាលដីកានេះប្រកាសនៅថ្ងៃទី ១៥ កក្កដា ខាងមុខ។
អ្នកស្រី កុល សាត អាយុ ៣៥ ឆ្នាំជាប្រពន្ធលោក គង់ម៉ាស់ ប្រាប់នៅក្រៅបន្ទប់សវនាការពីម្សិលមិញដែរថា រឿងនេះអយុត្តិធម៌ណាស់សម្រាប់ស្វាមីរបស់អ្នកស្រី ដោយសារតែស្វាមីរបស់អ្នកស្រីឃើញអ្វីមិនប្រក្រតីក្នុងសង្គមគាត់ក៏រិះគន់ហើយគាត់ត្រូវតែមានសិទ្ធិបញ្ចេញមតិរិះគន់ដើម្បីស្ថាបនាព្រោះគាត់ជាពលរដ្ឋកម្ពុជាម្នាក់ដែរ៕
