.jpg)
បុរសជាជនជាប់ចោទ ប៉េង វុត្ថា ហៅវុធ ពេលនាំចេញពីតុលាការកំពូលកន្លងមក ។ រូបថតៈ គឹម សារុំ
ភ្នំពេញៈ ជនជាប់ចោទម្នាក់ដែលប្រព្រឹត្តបទល្មើសប្លន់ប្រដាប់អាវុធកាលពីឆ្នាំ ២០១៥ ត្រូវតុលាការកំពូលប្រកាសសាលដីកានៅថ្ងៃទី ៣០ ខែមេសានេះ ដោយតម្កល់ទោស៧ឆ្នាំដដែលបន្ទាប់ពីជំនុំជម្រះ កាលពីថ្ងៃទី ២៥ មេសាកន្លងមក។
លោកចៅក្រម ឃឹម ប៉ុណ្ណ បានអានសាលដីកាកំបាំងមុខជនជាប់ចោទថា ក្រោយពីបានជំនុំជម្រះ និងក្រោយពីបានស្តាប់ការសន្និដ្ឋានរបស់មេធាវីការពារសិទ្ធិជនជាប់ចោទនិងបានស្តាប់តំណាងមហាអយ្យការមកក្រុមប្រឹក្សាយល់ឃើញថា៖«សំណុំរឿងនេះតុលាការសម្រេចតម្កល់សាលដីកាសាលាឧទ្ធរណ៍ទុកជាបានការដដែល។
តាមអង្គហេតុបានបង្ហាញថា ជនជាប់ចោទឈ្មោះ ប៉េង វុត្ថា ហៅវុធ អាយុ៣២ឆ្នាំ និងបក្ខពួកឈ្មោះ សាំង រ៉ាវី អាយុ២២-ឆ្នាំ ,ឈ្មោះ សុខ មេត្ដា អាយុ៣៣ឆ្នាំ និងឈ្មោះ ជា សុខផានិត អាយុ ១៩ ឆ្នាំ បានប្រព្រឹត្តបទល្មើសចាប់ពីថ្ងៃទី៦ដល់ថ្ងៃទី ១៤ ខែ ឧសភា ឆ្នាំ ២០១៦។
អង្គហេតុបន្តថា នៅថ្ងៃកើតហេតុជនជាប់ចោទនិងបក្ខពួកបានបង្កបទល្មើសប្លន់ ភ្ជង់កាំភ្លើង យកម៉ូតូពីអ្នកដំណើរបានសម្រេច១គ្រឿង ហើយបន្ទាប់មកបានចូលក្នុងកុដិព្រះសង្ឃនៅវត្តអង្គតាមិញលួចបានកុំព្យួរទ័រ១គ្រឿងនិងចុងក្រោយ ត្រូវសមត្ថកិច្ចចាប់ខ្លួន ខណៈកំពុងជុំគ្នាប្រើប្រាស់គ្រឿងញៀនហើយសមត្ថកិច្ចបានរកឃើញកាំភ្លើងប្រភេទ K54 ចំនួន ១ ដើមផងដែរ។
សំណុំរឿងនេះ ត្រូវសាលាដំបូងរាជធានីភ្នំពេញបើកសវនាការនិងប្រកាសសាលក្រមនៅថ្ងៃទី២៦ ខែកុម្ភៈ ឆ្នាំ២០១៦ ដោយផ្តន្ទាទោសជនជាប់ចោទទាំង៤នាក់ដាក់គុកម្នាក់ៗ៧ឆ្នាំដោយចោទពីបទលួចមានស្ថាន-ទម្ងន់ទោស ដោយប្រើហិង្សាកាន់កាប់អាវុធខុសច្បាប់ និងប្រើប្រាស់គ្រឿងញៀនតាមបញ្ញត្តិមាត្រា ៣៥៣ និង៣៥៧នៃក្រមព្រហ្មទណ្ឌ។
កាលពីថ្ងៃជំនុំជម្រះ ជនជាប់ចោទបានឆ្លើយប្រាប់ចៅក្រមក្នុងសវនាការថាគាត់ត្រូវតុលាការចោទ៣បទល្មើស ប៉ុន្តែគាត់ទទួលយកតែបទល្មើសកាន់កាប់អាវុធខុសច្បាប់ទេ ហើយក្រៅពីនេះ គាត់មិនដែលទៅចូលរួមជាមួយមនុស្ស៣នាក់ទៀតទេ និងសូមតុលា-ការជួយបន្ថយទោសដល់គាត់ផង។
កាលពីថ្ងៃជំនុំជម្រះនោះដែរ លោកព្រះរាជអាជ្ញា ចាន់ តារារស្មី តំណាងមហាអយ្យការ សន្និដ្ឋានថា រឿងនេះបើតាមអង្គហេតុ និងភ័ស្តុតាងបង្ហាញថា ជនជាប់ចោទនិងបក្ខពួកពិតជាបានប្រព្រឹត្តបទល្មើសមែន។ «ដូច្នេះការចោទប្រកាន់របស់តុលាការថ្នាក់ក្រោមមានលក្ខណៈត្រឹមត្រូវហើយ សូមតម្កល់សាលដីកាទុកជាបានការដដែល»។
លោក ឡោ គីមហ្គិច មេធាវីការពារសិទ្ធិឲ្យជនជាប់ចោទសន្និដ្ឋានថា តុលាការថ្នាក់ក្រោមបានចោទកូនក្តីលោកក្នុង៣បទល្មើស ប៉ុន្តែគាត់បានទទួលយកតែ១បទល្មើសទេ ហើយបទល្មើស២ ទៀត សមត្ថកិច្ចមិនបានចាប់កូនក្តីលោកជាក់ស្តែងឡើយ៕
