.jpg)
លោក ហ៊ុន ជា ជនជាប់ចោទរឿងបាញ់រះកាលពីឆ្នាំ ២០១៨ តែតុលាការព្យួរទោស ១២ ខែ។ ហ្វេសប៊ុក
ភ្នំពេញៈ បន្ទាប់ពីដំណើរការសវនាការប្រមាណ ១៥ នាទីកាលពីម្សិលមិញលើបណ្ដឹងសារទុក្ខដែលប្ដឹងដោយលោក ហ៊ុន ជា តុលាការកំពូល បានសម្រេចលើកពេលទៅប្រកាសសាលក្រមនៅដើមខែមេសា។
សវនាការជំនុំជម្រះនេះបានប្រព្រឹត្តទៅដោយពុំមានវត្តមានលោក ហ៊ុន ជា នោះទេ ប៉ុន្តែមានតែតំណាងមេធាវីរបស់លោក ហ៊ុន ជា និងព្រះរាជអាជ្ញាតែប៉ុណ្ណោះ។
កាលពីខែ ឧសភា ឆ្នាំ ២០១៨ លោក ហ៊ុន ជា ឧត្តមសេនីយ៍ផ្កាយ ៣ នៃកងកម្លាំងប្រដាប់អាវុធនគរបាលជាតិ ត្រូវបានសាលាដំបូងរាជធានីភ្នំពេញ សម្រេចផ្តន្ទាទោសឲ្យជាប់ពន្ធនាគារចំនួន ១៨ ខែពីបទគំរាមកំហែងសម្លាប់ តាមមាត្រា ២៣៣ និងធ្វើឲ្យខូចខាតដោយចេតនាតាមមាត្រា ៤១០ នៃក្រមព្រហ្មទណ្ឌ។ តែទោសនេះត្រូវអនុវត្តចំនួន ៦ ខែ ចំណែក ១២ ខែទៀតត្រូវបានព្យួរ។
កាលពីយប់ថ្ងៃទី ១ ខែ ឧសភា ឆ្នាំ ២០១៨ លោក ហ៊ុន ជា ត្រូវឃាត់ខ្លួនភ្លាមៗ ក្រោយពីបាញ់រះប្រមាណជាង ១០ គ្រាប់ឡើងលើដោយគ្មានគោលដៅនៅក្នុងសង្កាត់ផ្សារថ្មី ១ ខណ្ឌដូនពេញ ដោយសង្ស័យថាអាចកើតជម្លោះនៅក្នុងគ្រួសារ ឬស្រវឹងស្រា។ នេះបើយោងតាមរបាយការណ៍របស់មន្ត្រីនគរបាល។
លោកស្រី គឹម សត្ថាវី ចៅក្រមជំនុំជម្រះនៅក្នុងសំណុំរឿងនេះបានថ្លែងនៅក្នុងសវនាការថា សំណុំរឿងនេះនឹងត្រូវប្រកាសសាលដីកា នៅថ្ងៃទី ៣ ខែ មេសា ខាងមុខ។
លោក គី ប៊ុនទ្រាន មេធាវីការពារក្តីលោក ហ៊ុន ជា ថ្លែងក្នុងសវនាការថា បណ្តឹងសារទុក្ខនេះ គឺ ស្នើសុំឲ្យតុលាការទម្លាក់បទចោទប្រកាន់ទាំងអស់។
លោកថ្លែងថា៖ «មានភ័ស្តុតាងផ្ទុយជាច្រើន ដែលបានបញ្ជាក់ថា កូនក្តីខ្ញុំគ្មានកំហុស ដូច្នេះតំណាងអយ្យការចោទប្រកាន់ គឺមិនត្រឹមត្រូវទេ។ ការចោទលើកូនក្តីខ្ញុំពីបទធ្វើឲ្យខូចខាតដោយចេតនា គឺយើងមិនបានរកឃើញថា មានអ្នកខាតបង់ទេ ហើយបើទោះជាខាតបង់ ក៏ជាទ្រព្យសម្បត្តិក្នុងផ្ទះរបស់គាត់ដែរ។ ម្យ៉ាងទៀត ការចោទកូនក្តីខ្ញុំ ពីបទគំរាមកំហែងថា សម្លាប់ គឺនៅក្នុងកន្លែងកើតហេតុនោះ គ្មានមនុស្សទេ។ សង្ឃឹមថាតុលាការនឹងពិចារណាទម្លាក់បទចោទប្រកាន់លើកូនក្ដីខ្ញុំ ហើយបើគ្មានការទម្លាក់ការចោទប្រកាន់ ខ្ញុំក៏មិនប្ដឹងទៀតដែរ»។
លោក ច័ន្ទ ដារ៉ារស្មី ព្រះរាជអាជ្ញាអមសាលាកំពូល បានថ្លែងថា៖ «បើទោះបទល្មើសនេះ គ្មានជនរងគ្រោះ តែដើម្បីផលប្រយោជន៍សាធារណៈ និងស្របតាមច្បាប់កម្ពុជា គឺជនជាប់ចោទឈ្មោះ ហ៊ុន ជា ត្រូវតែមានទោស ព្រោះករណីនេះ ពិតជាត្រូវបានរកឃើញថា រូបគេបានប្រព្រឹត្តពិតប្រាកដមែន។ ដូច្នេះសូមឲ្យតុលាការតម្កល់សាលក្រមរបស់សាលាដំបូង និងឧទ្ធរណ៍ទុកជាបានការដដែល ដើម្បីផលប្រយោជន៍សាធារណៈ»។
លោក ស៊ិង សែនករុណា អ្នកនាំសមាគមការពារសិទ្ធិមនុស្ស អាដហុក បានអះអាងថា ចំពោះករណីនេះ គឺសាធារណជនបានដឹងឮអស់ទៅហើយចំពោះការប្រព្រឹត្តរបស់លោក ហ៊ុន ជា ដែលអាងអំណាចបានប្រើប្រាស់កាំភ្លើង និងប្រើហិង្សាតាមទំនើងចិត្ត។ ទោះជាយ៉ាងណាក៏ដោយបើចង់ឲ្យតុលាការលើកបទចោទប្រកាន់ លុះត្រាតែលោក ហ៊ុន ជា មានភ័ស្តុតាងផ្ទុយថាខ្លួនមិនបានប្រព្រឹត្ត។
លោក សែនករុណា បានបញ្ជាក់ថា៖ «ចំណាត់ការលើករណីនេះ គឺបានធ្វើទៅតាមនីតិវិធីត្រឹមត្រូវ ដោយមានការដាក់ទោស មានព្យួរមានអីអ៊ីចឹង ព្រោះមានភ័ស្តុតាងគ្រប់គ្រាន់ ហើយបើមានការទម្លាក់បទចោទមែន ខ្ញុំយល់ថា វាផ្ទុយហើយ ហើយតុកាលារ ច្បាស់ណាស់ពិតជាមានការរិះគន់ពីសាធារណជន ថាគ្មានអព្យាក្រឹតជាដើម ព្រោះគាត់ជាមនុស្សម្នាក់ ដែលមានតំណែងធំ និងល្បីល្បាញ និងត្រូវជាក្មួយប្រមុខរដ្ឋាភិបាលទៀត»។
លោកថ្លែងថា៖ «ខ្ញុំសង្ឃឹមថា តុលាការ នឹងពិចារណាឲ្យបានល្អិតល្អន់ ចៀសវាងទទួលរងការចោទប្រកាន់ជាថ្មីទៀត ជុំវិញករណីនេះ»៕
