ភ្នំពេញៈ តុលាការកំពូលកាលពីម្សិលមិញបានបើកសវនាការជម្រះក្ដីលើសំណុំរឿងយុវជនត្រូវចោទ ៣ នាក់ដែលជាប់ពាក់ព័ន្ធឈូសឆាយដីព្រៃលិចទឹកនៅក្នុងស្រុកបារាយណ៍ខេត្តកំពង់ធំកាលពីអំឡុងខែមេសា ឆ្នាំ ២០១៩។
នៅក្នុងសវនាការ ចៅក្រមប្រឹក្សាជំនុំជម្រះលោកស្រី ចាង ស៊ីណាត បានឲ្យដឹងថា ជនត្រូវចោទទាំង ៣ នាក់ថា យុវជនត្រូវចោទដែលបានដាក់បណ្តឹងសារទុក្ខសុំនៅក្រៅឃុំមានឈ្មោះ ប៊ី វុទ្ធី អាយុ ២១ ឆ្នាំ,ទី ២- ឈ្មោះ ប៊ី សំណាង អាយុ ២៧ ឆ្នាំ និងទី ៣- ឈ្មោះ ហេង ហ៊ាត ហៅ ហាត់ អាយុ ១៩ ឆ្នាំ។ ពួកគេរស់នៅក្នុងឃុំកំពង់ថ្ម ស្រុកសន្ទុក ខេត្តកំពង់ធំ។
នៅចំពោះមុខអង្គជំនុះជម្រះ ជនត្រូវចោទឈ្មោះ ប៊ី វុទ្ធី បានថ្លែងចំពោះមុខចៅក្រមថា ដើមហេតុដែលនាំឲ្យមានការចោទប្រកាន់មកលើរូបគេទាំង ៣ នាក់នោះ ដោយសារថាពួកគេជាអ្នកបើក គ្រឿងចក្រ ភ្ជួររាស់ដី។ គ្រានោះមានបុរសម្នាក់ឈ្មោះ ប៉ាង បានអះអាងថាជាម្ចាស់ដីនៅតំបន់ខាងលើបានឲ្យឈ្មោះ ឡៃ ហៀង ដែលជាមេការមកជួលពួកគេឲ្យទៅភ្ជួររាស់ដីចំនួន ១ ហិកតានៅក្នុងភូមិបឹងល្វា ស្រុកសន្ទុកដោយឲ្យតម្លៃឈ្នួល ៣ នាក់ចំនួន ១៤ ម៉ឺនរៀលក្នុងមួយថ្ងៃ។
យុវជន ប៊ី វុទ្ធី អះអាងថាដីនៅតំបន់នោះជាដីស្រែដែលគេធ្វើស្រែរាល់ឆ្នាំហើយ ព្រៃលិចទឹកមិនមែនជាដីដែលជារបស់រដ្ឋទេ និងមានទីតាំងនៅជាប់ទន្លេសាបផង។ ពួកគេត្រូវឈ្មោះ ឡៃ ហៀង ជួលទៅឲ្យបើកគ្រឿងចក្រភ្ជួរដីទើបតែបាន ៣ ថ្ងៃក៏ត្រូវសមត្ថកិច្ចចាប់ខ្លួនតែម្តង។
ជនត្រូវចោទ ប៊ី វុទ្ធី ឆ្លើយប្រាប់ចៅក្រមថា៖ «ខ្ញុំប្តឹងសារទុក្ខមកតុលាការកំពូលពេលនេះគឺសុំឲ្យតុលាការកំពូលដោះលែងពួកខ្ញុំបាននៅក្រៅឃុំវិញ»។
ទោះជាយ៉ាងណាក៏ដោយលោក ស្រី ចៅក្រម ស៊ីណាត បានអះអាងទៅលើអង្គហេតុថា ជនត្រូវចោទទាំង ៣ នាក់ត្រូវបានសមត្ថកិច្ចចាប់ខ្លួនកាលពីថ្ងៃទី ១៩ ខែមេសាឆ្នាំ ២០១៩ នៅក្នុងភូមិសាស្ត្រ ភូមិបឹងល្វា ក្នុងស្រុកសន្ទុក ខេត្តកំពង់ធំ ពាក់ព័ន្ធភ្ជួររាស់ព្រៃលិចទឹក។ សំណុំរឿងនេះត្រូវបានចៅក្រមស៊ើបសួរនៃសាលាដំបូងខេត្តកំពង់ធំចេញដីកាសម្រេចឃុំខ្លួនបណ្តោះអាសន្នពួកគេទាំង ៣ នាក់នៅថ្ងៃទី ២៧ ខែមេសា ឆ្នាំ ២០១៩ ចោទបទកាប់ឆ្ការ រាន ឈួសឆាយព្រៃលិចទឹក។ ដោយមិនសុខចិត្ត ជនត្រូវចោទទាំង ៣ នាក់ប្តឹងទាស់ចូលសាលាឧទ្ធរណ៍ ហើយត្រូវសាលាឧទ្ធរណ៍តម្កល់សាលដីកាតាមសាលក្រមរបស់សាលាដំបូង ខេត្តកំពង់ធំដដែល។
លោក ឈួន ចាន់ថា តំណាងមហាអយ្យការសន្និដ្ឋានថា តាមការពិនិត្យលើអង្គហេតុឃើញថា ជនត្រូវចោទទាំង ៣ នាក់ត្រូវបានចៅក្រមស៊ើបសួរនៃសាលាដំបូងខេត្តកំពង់ធំចោទប្រកាន់ពីបទកាប់ឆ្ការ រាន ឈួសឆាយព្រៃលិចទឹកតាមបញ្ញត្តិមាត្រា ៩៨ ច្បាប់ស្តីពីជលផល។ ជាមួយគ្នានេះដែរជនត្រូវចោទទាំង ៣ នាក់ក៏ត្រូវសភាព្រហ្មទណ្ឌសាលាឧទ្ធរណ៍បានសម្រេចតម្កល់ដីការបស់ចៅក្រមស៊ើបសួររបស់តុលាការខេត្តកំពង់ធំទៀត។
លោកតំណាងអយ្យការបានថ្លែងថា៖ «ក្នុងរឿងនេះសូមក្រុមប្រឹក្សាជំនុំជម្រះពិចារណា និងសម្រេចតាមច្បាប់»។
លោក មេធាវី ខៀវ សុផល ការពារសិទ្ធិឲ្យជនទាំង ៣ នាក់បានសន្និដ្ឋានថា កូនក្តីរបស់លោកត្រូវបានឈ្មោះឡៃដែលជាមេការបានជួល ពួកគេឲ្យទៅភ្ជួរដី ហើយដីដែលកូនក្តីរបស់លោកភ្ជួររាស់នោះក៏ជាដីធ្វើស្រែដែរ។ សមត្ថកិច្ចបានចាប់ខ្លួនកូនក្តីរបស់លោកក្រោយពេលពួកគេឈប់សម្រាកពីការងារហើយ ដូច្នេះមិនមែនជាបទល្មើសជាក់ស្តែងទេ។
លោកបានថ្លែងបន្តថា ពួកគេបានបញ្ឈប់សកម្មភាពដោយស្ម័គ្រចិត្តហើយបើពិនិត្យលើបទចោទវិញក៏ជាបទល្មើសមជ្ឈិមទៀត។ ចំពោះការឃុំខ្លួនរបស់តុលាការវិញបើយោងតាមមាត្រា ២០៣ នៃក្រមនីតិវិធីព្រហ្មទណ្ឌបានកំណត់រយៈពេលតែ ៤ ខែទេ លើសពីរយៈពេលនេះត្រូវដោះលែងជននោះឲ្យមានសេរីភាពវិញ ព្រោះពួកគេបានអនុវត្តទោសក្នុងពន្ធនាគារបានជាង ៤ ខែហើយ។
លោកបន្តថាកូនក្តីរបស់លោកបើត្រូវដោះលែងនោះគឺពួកគាត់មិនអាចទៅគាបសង្កត់សាក្សី ឬ ក៏ទៅបង្កបទល្មើសអ្វីដែលនាំឲ្យប៉ះពាល់ដល់សន្តិសុខសង្គមទេ។
លោកមេធាវីថ្លែងថា៖ «ដូច្នេះកូនក្តីរបស់ខ្ញុំត្រូវតែដោះលែងឲ្យមានសេរីភាពវិញ។ កូនក្តីខ្ញុំសន្យាថា នឹងចូលខ្លួនតាមការកោះហៅរបស់តុលាការជានិច្ច»។
ក្រោយជំនុំជម្រះលោក ឃឹម ប៉ុណ្ណប្រធានក្រុមប្រឹក្សាជំនុំជម្រះថ្លែងថា សាលដីការឿងនេះនឹងត្រូវប្រកាសនៅថ្ងៃទី ២៦ ខែកញ្ញាឆ្នាំ ២០១៩៕