.jpg)
នគរបាលនាំ ជួប សម្លាប់ ចេញពីតុលាការកំពូល។ ហេង ជីវ័ន
ភ្នំពេញៈ កាលពីម្សិលមិញតុលាការកំពូលបានប្រកាសលើកពេលសវនាការដោយមិនកំណត់ថ្ងៃដល់ជនជាប់ចោទឈ្មោះ អឿត អាង ហៅ ជួប សម្លាប់ ដោយសារតែគ្មានមេធាវីការពារសិទ្ធិ ពាក់ព័ន្ធការបាញ់សម្លាប់លោក កែម ឡី កាលពីឆ្នាំ ២០១៦ នៅរាជធានីភ្នំពេញខណៈជនជាប់ចោទរូបនេះត្រូវតុលាការថ្នាក់ក្រោមផ្តន្ទាទោសដាក់ពន្ធនាគារអស់ ១ ជីវិត។
លោកចៅក្រម គង់ ស្រុីម បានថ្លែងនៅក្នុងអង្គសវនាការថា សំណុំរឿងរបស់ជនជាប់ចោទឈ្មោះ អឿត អាង តាមការគ្រោងទុកគឺត្រូវបើកសវនាការជំនុំជម្រះនៅថ្ងៃទី ២០ ខែ មីនា ប៉ុន្តែបែរជាគ្មានមេធាវីការពារសិទ្ធិឲ្យជនជាប់ចោទទៅវិញ។
លោកចៅក្រម គង់ ស្រុីម ថ្លែងនៅចំពោះមុខជនជាប់ចោទថា សំណុំរឿងនេះមានលោកមេធាវី ឡោ គីមហ្គិច ជាអ្នកប្តឹងសារទុក្ខមកតុលាការកំពូល ប៉ុន្តែមេធាវីរូបនេះមិនមែនជាអ្នកការពារសិទ្ធិឲ្យជនជាប់ចោទទេក្នុងការជំនុំជម្រះពេលនេះ ហើយរឿងក្តីនេះជារឿងឧក្រិដ្ឋត្រូវតែមានវត្តមានមេធាវីជាចាំបាច់ដើម្បីការពារសិទ្ធិឲ្យជនជាប់ចោទ។
ប៉ុន្តែនៅក្នុងសវនាការជនជាប់បានអះអាងនៅចំពោះមុខចៅក្រមដោយគ្មានលទ្ធភាពក្នុងការពឹងពាក់មេធាវីនោះទេ ដោយបានស្នើឲ្យតុលាការចាត់តាំងមេធាវីឲ្យចុះ។
ដោយឡែកលោកមេធាវី ឡោ គីមហ្គិច បានប្រាប់ភ្នំពេញប៉ុស្តិ៍តាមទូរស័ព្ទពីថ្ងៃទី ២០ មីនា បានថ្លែងថា សំណុំរឿងរបស់ជនជាប់ចោទឈ្មោះ អឿត អាង ហៅ ជួប សម្លាប់ នេះកាលពីនៅសាលាឧទ្ធរណ៍គឺរូបលោកជាមេធាវីការពារសិទ្ធិឲ្យជនជាប់ចោទហើយបន្ទាប់ពីត្រូវសាលាឧទ្ធរណ៍ប្រកាសសាលដីកាសម្រេចតម្កល់ទោសឲ្យគាត់ជាប់ពន្ធនាគារអស់ ១ ជីវិតតាមអំណាចសាលក្រមរបស់សាលាដំបូងរាជធានីភ្នំពេញតាំងពីនោះមកជនជាប់ចោទមិនបានពឹងពាក់លោកទៀតទេ។
លោកប្រាប់ថា៖ «ក្រោយពីត្រូវសាលាឧទ្ធរណ៍ប្រកាសសាលដីកាតម្កល់ទោសមកគឺគាត់ផ្ទេរសិទ្ធិឲ្យខ្ញុំប្តឹងសារទុក្ខមកតុលាការកំពូលឲ្យ ប៉ុន្តែនៅតុលាការកំពូលខ្ញុំមិនមែនជាមេធាវីរបស់គាត់ទេ»។
លោក កែម ឡី ជាអ្នកវិភាគបញ្ហាសង្គមត្រូវបានគេបាញ់សម្លាប់កាលពីព្រឹកព្រលឹមថ្ងៃទី ១០ ខែ កក្កដា ឆ្នាំ ២០១៦ នៅក្នុងស្តារម៉ាតមួយក្បែរស្ថានីយចាក់ប្រេងកាល់តិច។ ក្នុងពេលនោះសមត្ថកិច្ចបានចាប់ខ្លួនជនជាប់ចោទភ្លាមៗ៕
