ភ្នំពេញៈ តុលាការកំពូល បានបដិសេធសំណើសុំនៅក្រៅឃុំរបស់លោក កឹម សុខា អតីតប្រធានគណបក្សសង្គ្រោះជាតិ ដែលជាប់ចោទពីអំពើក្បត់ជាតិ ក្រោយមានការជម្រះជាសាធារណៈ ប្រមាណ ១ ម៉ោងនិង ៣០ នាទីរួចមក ដោយមិនមានវត្តមានជនត្រូវចោទនោះទេ ទោះបីមានការជជែកថា សុខភាពកូនក្តី មានបញ្ហាទ្រុឌទ្រោម អាចឈានដល់ស្លាប់ក៏ដោយ។
ទោះយ៉ាងណា មេធាវី ក្រោយសវនការរួច មិនបាននៅរង់ចាំស្តាប់លទ្ធផលនៃការសម្រេច របស់តុលាការកំពូល ដែលប្រកាសមិនអនុញ្ញាត ឲ្យកូនក្តីនៅក្រៅឃុំនោះទេ។
មេធាវីការពារក្តីចំនួន ៧ នាក់របស់លោក កឹម សុខា បានឡើងថ្លែងទាំងអស់គ្នាការពារ សុំឲ្យកូនក្តី បាននៅក្រៅឃុំ នៅចំពោះមុខក្រុមប្រឹក្សាជំនុំជម្រះ ដែលមានសមាសភាចៅក្រម ចំនួន ៥ នាក់ ដោយពួកគេអះអាងថា ការស្នើសុំដោះលែងកូនក្តីជាបណ្តោះអាសន្ន គឺដើម្បីបានទៅព្យាបាលទៅប្រទេស សិង្ហបុរី។
លោក កឹម សុខា ដែលកំពុងស្ថិតក្នុងពន្ធនាគារត្រពាំងផ្លុង ខេត្តត្បូងឃ្មុំ ត្រូវបានចាប់ខ្លួនកាលពីពាក់កណ្តាលយប់ថ្ងៃទី ៣ ខែកញ្ញា ហើយត្រូវបានចោទប្រកាន់ពីបទ សន្ទិដ្ឋិភាព ជាមួយបរទេស ចំពោះការថ្លែងសុន្ទរកថាជាសាធារណៈរបស់លោក ដែលបានធ្វើឡើង តាំងពី ឆ្នាំ ២០១៣ នៅប្រទេស អូស្ត្រាលី ដែលលោកថា លោកបានទទួលដំបូន្មាន ពីសហរដ្ឋអាមេរិក ក្នុងការធ្វើនយោបាយរបស់លោក។
បើតាមមេធាវីទាំង ៧ រូប ដែលនិយាយក្នុងសវនាការ លោក កឹម សុខា មានជំងឺបីមុខ គឺ លើសឈាម ទឹកនោមផ្អែម និងកៀបសរសៃ ដែលទាមទារការយកចិត្តទុកដាក់ និងពិនិត្យសុខភាពទៀងទាត់។
លោក ចាន់ ចេង មេធាវីម្នាក់ បានលើកឡើងក្នុងអង្គសវនាការថា ដោយប្រៀបធៀបថាកាលពីសម័យមុន ធ្លាប់មានអ្នកទោសនយោបាយស្លាប់ក្នុងពន្ធនាគារ ហើយលោកមិនចង់ឃើញប្រវត្តិសាស្ត្របែបនេះតទៅទៀត ក្នុងសម័យបច្ចុប្បន្ននេះទេ និងស្នើឲ្យដោះលែងកូនក្តីក្រៅឃុំបណ្តោះអាសន្ន ដើម្បីបានទទួលការព្យាបាល។
លោកថា ៖ «ខ្ញុំមានការបារម្ភចំពោះបញ្ហាសុខភាពរបស់កូនក្តី។ ប្រសិនជាគាត់ស្លាប់ក្នុងពន្ធនាគារ…ដូច្នេះប្រវត្តិសាស្ត្រនឹងចារថា ក្រោយឆ្នាំ ៧៩ មានអ្នកទោសនយោបាយដំបូងស្លាប់»។
ទោះយ៉ាងណា តុលាការកំពូល ដែលមានចៅក្រម គិម សត្ថាវី នៅតែប្រកាសតម្កល់សាលដីកា កាលពីដើមខែកុម្ភៈ របស់សភាស៊ើបសួរសាលាឧទ្ធរណ៍ទុកជាបានការដដែល។ លោកស្រីថា ៖ «ការព្យបាលត្រូវពិនិត្យពីលទ្ធភាពជាក់ស្តែងនៃប្រទេស»។
លោកស្រី បានយោងតាមមាត្រា ៣៨ នៃច្បាប់ស្តីពីពន្ធនាគារ បានចែងថា ជនជាប់ឃុំ មានជំងឺ ត្រូវទទួលបានសេវាថែទាំសុខភាពពីមន្ត្រីពេទ្យពន្ធនាគាររួចហើយ៕