.jpg)
ជនជាប់ចោទពេលនាំមកតុលាការកំពូលពីម្សិលមិញ។ រូបថត គឹម សារុំ
ភ្នំពេញៈ តុលាការកំពូលកាលពីម្សិលមិញបានលើកពេលជំនុំជម្រះលើអតីតមន្ត្រីយោធាម្នាក់ពាក់ព័ន្ធនឹងការសម្លាប់ស្រីកំណាន់រួចដុតក្នុងពាងប្រព្រឹត្តកាលពីឆ្នាំ ២០១៥ នៅរាជធានីភ្នំពេញជាសំណុំរឿងដែលត្រូវតុលាការថ្នាក់ក្រោមផ្តន្ទាទោសដាក់គុក ១ ជីវិត។
លោកស្រី គីម សត្ថាវី ប្រធានក្រុមប្រឹក្សាជំនុំជម្រះបានថ្លែងចំពោះមុខជនជាប់ចោទថា៖ «ជនជាប់ចោទឈ្មោះ សុង ទូច មានវត្តមាន ប៉ុន្តែគាត់គ្មានមេធាវីការពារក្តីឲ្យគាត់ទេនៅថ្ងៃនេះ ហេតុដូច្នេះសំណុំរឿងមួយនេះតុលាការមិនអាចជំនុំជម្រះបានទេ និងត្រូវលើកទៅជំនុំជម្រះទៅថ្ងៃក្រោយវិញ»។
ជនជាប់ចោទ សុង ទូច បាននិយាយនៅក្រៅបន្ទប់សវនាការថា៖ «ស្ត្រីរងគ្រោះនោះមិនមែនជាប្រពន្ធខ្ញុំទេ តែនាងជាស្រីកំណាន់ ហើយខ្ញុំទើបស្គាល់នាងបាន ៣ ខែប៉ុណ្ណោះ។ រឿងនេះខ្ញុំពិតជាសម្លាប់នាងមែន ប៉ុន្តែខ្ញុំគ្មានចេតនាទេ។ ថ្ងៃនោះខ្ញុំជ្រុលដៃធ្វើឲ្យគាត់ស្លាប់។ ខ្ញុំប្តឹងមកតុលាការកំពូលគឺបំណងចង់ឲ្យតុលាការប្តូរបទចោទព្រោះនៅតុលាការថ្នាក់ក្រោមចោទខ្ញុំថា «មនុស្សឃាតគិតទុកជាមុន»។
តាមអង្គហេតុកាលពីថ្ងៃទី ១៤ ខែវិច្ឆិកាឆ្នាំ ២០១៥ ពលរដ្ឋបានប្រទះឃើញសពនារីម្នាក់ត្រូវបានគេសម្លាប់ និងដុតក្នុងពាងនៅផ្ទះលេខ ២៤៧ ភូមិប៉ាយាប សង្កាត់ភ្នំពេញថ្មី ខណ្ឌសែនសុខ។
កាលពីបើកសវនាការនៅតុលាការថ្នាក់ក្រោមជនជាប់ចោទបានប្រាប់តុលាការថារឿងនេះមុនកើតហេតុគឺកាលពីថ្ងៃទី ១២ ខែវិច្ឆិកាឆ្នាំ ២០១៥ គាត់និងស្រីកំណាន់ឈ្មោះ ទឹម សោភា អាយុ ៣៤ ឆ្នាំជាស្ត្រីមេម៉ាយកូន ៣ នាក់ បានទាស់គ្នាព្រោះតែគាត់គិតថានាងលួចមានសាហាយ។ ដូច្នោះហើយគាត់ក៏រៀបចំផែនការសម្លាប់នាងទៅ។ លុះចន្លោះពីម៉ោង ១០ ទៅ ១២ យប់ថ្ងៃខែឆ្នាំដដែល ខណៈនាងកំពុងដេកលក់ក្នុងបន្ទប់គាត់ក៏វាយនឹងខ្នងពូថៅចំសៀតផ្កាពី ៣ ទៅ ៤ ខ្នងពូថៅ។
ជនជាប់ចោទបន្តថា បន្ទាប់ពីវាយរួចដោយខ្លាចនាងមិនទាន់ស្លាប់គាត់បានកាប់បន្ថែមចំបំពង់កពី ៣ ទៅ ៤ ពូថៅទៀតរួចក៏លើកសពចុះមកក្រោមផ្ទះយកទៅដាក់ចូលក្នុងពាងទឹក។ បន្ទាប់មកគាត់បានទិញសាំង ២០ លីត្រមកចាក់ដុតរហូតសពឆេះអស់ ប៉ុន្តែមុខខ្លួនឯងក៏ត្រូវភ្លើងឆាបឆេះដែរ។
ជនជាប់ចោទប្រាប់តុលាការបន្តថា បន្ទាប់ពីសម្លាប់ស្ត្រីរងគ្រោះហើយគាត់យកបានចិញ្ចៀនពេជ្រ ១ វង់ និងម៉ូតូម៉ាកគុបជ្រុង ១ គ្រឿង ជាកម្មសិទ្ធិជនរងគ្រោះរត់គេចទៅដេកនៅផ្ទះសំណាក់នៅទំនប់ទួលគោក។
បន្ទាប់មកក៏គេចខ្លួនទៅទំនប់រលកខេត្តព្រះសីហនុ តែបន្ទាប់ពីស្នាក់នៅបានមួយយប់ក៏ត្រូវអាវុធហត្ថចាប់ខ្លួនតែម្តងគឺនៅថ្ងៃទី ១៦ ខែវិច្ឆិកា ឆ្នាំ ២០១៥។
សំណុំរឿងនេះត្រូវសាលាដំបូងរាជធានីភ្នំពេញបើកសវនាការនៅថ្ងៃទី ១២ ខែកុម្ភៈ និងប្រកាសសាលក្រមនៅថ្ងៃទី ២៥ ខែមីនាឆ្នាំ ២០១៦ ផ្តន្ទាទោសដាក់គុកអស់ ១ ជីវិតតាមបញ្ញត្តិមាត្រា ២០០ នៃក្រមព្រហ្មទណ្ឌ៕
