ភ្នំពេញៈ ក្រុមមេធាវីការពារក្ដីលោក កឹម សុខា កាលពីម្សិលមិញបានថ្លែងថា លោក កឹម សុខា បានដឹងពីព្រំដែនដែលលោកអាចដើរបាន ហើយលោកមិនបានបំពានបម្រាមរបស់តុលាការទេ។ ការលើកឡើងរបស់ក្រុមមេធាវី ធ្វើឡើងបន្ទាប់ពីចៅក្រមជំនុំជម្រះនៃសាលាដំបូងរាជធានីភ្នំពេញបានចេញលិខិតជូនដំណឹងមួយ រំឭកលោក កឹម សុខា អំពីលក្ខខណ្ឌនៅក្រៅឃុំដែលចៅក្រមបានអនុញ្ញាត។
លោកស្រី ម៉េង សុភារី មេធាវី ១ រូបរបស់លោក កឹម សុខា បានថ្លែងថា ការធ្វើដំណើរចាកចេញពីផ្ទះរបស់លោក កឹម សុខា មិនបានបំពានលើបម្រាមរបស់តុលាការនោះទេព្រោះលោកមិនបានធ្វើដំណើរទៅក្រៅប្រទេស ឬធ្វើសកម្មភាពនយោបាយអ្វីទេ។ លោកមានសិទ្ធិជួបអ្នកនយោបាយ អតីតសហការី និងប្រជាពលរដ្ឋ ដើម្បីសម្ដែងក្ដីនឹករឭក និងសួរសុខទុក្ខធ្វើដំណើរកម្សាន្ត និងធ្វើបុណ្យទាននៅកន្លែងផ្សេងៗ។
កាលពីថ្ងៃចន្ទលោក កូយ សៅ ប្រធានក្រុមប្រឹក្សាជំនុំជម្រះសំណុំរឿងសន្ទិដ្ឋភាព ជាមួយបរទេសដែលមានលោក កឹម សុខា ជាជនជាប់ចោទបានជូនដំណឹងទៅលោក កឹម សុខា ដោយបញ្ជាក់ថា ក្រុមប្រឹក្សាជំនុំជម្រះ បានទទួលរបាយការណ៍ពីមន្ត្រីនគរបាលយុត្តិធម៌ថា លោក កឹម សុខា បានធ្វើសកម្មភាពមួយចំនួន ជាពិសេសនៅតាមខេត្តដែលក្នុងនោះមានការជួបជាមួយប្រជាពលរដ្ឋ ការប្រមូលផ្ដុំ និងជួបជុំជាមួយអ្នកគាំទ្រក្រោមរូបភាពផ្សេងៗ។
លោក កូយ សៅ បានលើកឡើងថា សេចក្ដីសម្រេចនៃការបញ្ជូនរឿងទៅជម្រះ និងសេចក្ដីសម្រេចកែប្រែការអនុញ្ញាតឲ្យនៅក្រៅឃុំ ក្រោមការត្រួតពិនិត្យរបស់តុលាការបានដាក់ឲ្យជនជាប់ចោទមានកាតព្វកិច្ចជាក់លាក់មួយចំនួន ជាពិសេសហាមជនត្រូវចោទ មិនឲ្យធ្វើសកម្មភាពនយោបាយ។
លិខិតលោក កូយ សៅបញ្ជាក់ដូច្នេះថា៖ «ដើម្បីធានាបាននូវការគោរព ចំពោះកាតព្វកិច្ចនៃការត្រួតពិនិត្យតាមផ្លូវតុលាការក៏ដូចជាសន្តិសុខផ្ទាល់ខ្លួន និងផលប្រយោជន៍ស្របច្បាប់របស់ជនត្រូវចោទសម្រាប់សវនាការបន្តនាពេលខាងមុខ ក្រុមប្រឹក្សាជំនុំជម្រះធ្វើការក្រើនរំឭកជនជាប់ចោទត្រូវមានស្មារតីគោរពឲ្យបានហ្មត់ចត់ ម៉ឺងម៉ាត់ និងត្រូវប្រកាន់ខ្ជាប់នូវកាតព្វកិច្ចដែលតុលាការបានតម្រូវដាក់លើជនជាប់ចោទដូចមាននៅក្នុងដីកាសម្រេចខាងលើនេះ ហើយដែលមានអានុភាពរហូតដល់ពេលសាលក្រមត្រូវបានប្រកាសស្របតាមមាត្រា ៣៥២ នៃក្រមនីតិវិធីព្រហ្មទណ្ឌ»។
លោកស្រី ម៉េង សុភារី ថ្លែងដូច្នេះថា៖ «ឯកឧត្តម កឹម សុខា លោកបានជ្រាបហើយចំពោះបម្រាមរបស់ចៅក្រមស៊ើបសួរនូវចំណុចទី ២ ដែលបានហាមឃាត់សិទ្ធិរបស់គាត់ មិនឲ្យធ្វើនយោបាយ ហើយឯកឧត្តមក៏តែងតែគោរពកាតព្វកិច្ចដែលមាននៅក្នុងដីកាសម្រេចរបស់ចៅក្រមស៊ើបសួរយ៉ាងខ្ជាប់ខ្ជួនទាំងពេលកន្លងមក ទាំងពេលបច្ចុប្បន្ន និងទៅអនាគត។ គាត់ធ្វើអ្វីៗ ដែលគាត់មានសិទ្ធិតែប៉ុណ្ណោះមិនឲ្យហួសបម្រាមរបស់តុលាការឡើយ»។
ស្រដៀងគ្នានេះលោក ចាន់ ចេន មេធាវីម្នាក់ទៀតរបស់លោក កឹម សុខា ថ្លែងថា លោក កឹម សុខា ដឹងអ្វីដែលលោកគួរធ្វើ និងមិនគួរធ្វើ។ ការចុះទៅខេត្តជួបមនុស្ស ឬជួបដោយចៃដន្យ ៤-១០ នាក់ ដោយមានការដើរខ្លះ ឈរខ្លះ អង្គុយខ្លះសួរសុខទុក្ខអ្នកជំងឺ គឺជាការជួបសួរសុខទុក្ខធម្មតា ហើយមិនមែនជាសកម្មភាពនយោបាយទេ។
លោកបញ្ជាក់ថា៖ «វាមិនខុសច្បាប់ដែលហាមនោះទេ បើជួបមនុស្សដែលស្រឡាញ់រាប់អានគាត់ ៤-១០ នាក់ ខុសអាចជាការបិទសិទ្ធិសេរីភាពទៅវិញទេ។ លិខិតនេះ គឺជាការក្រើនរំឭកមែន ក៏ប៉ុន្តែក៏អាចជាការព្រមានភ្លាមៗផងដែរ»។
លោក កឹម សុខា កំពុងស្ថិតក្នុងនីតិវិធីជំនុំជម្រះបទចោទ «សន្ទិដ្ឋភាពជាមួយបរទេស» ឬបទក្បត់ជាតិ ប៉ុន្តែសវនាការត្រូវបានផ្អាកដោយសារការរាតត្បាតនៃជំងឺកូវីដ ១៩។ កាលពីថ្ងៃទី ១០ វិច្ឆិកា ឆ្នាំមុនលោក គី ឫទ្ធី ចៅក្រមស៊ើបសួរនៃសាលាដំបូងរាជធានីភ្នំពេញបានបន្ធូរបន្ថយ លក្ខខណ្ឌនៅក្រៅឃុំ ដោយលោកអនុញ្ញាតឲ្យលោក កឹម សុខា មានសេរីភាពដើរហើរនៅក្នុងប្រទេសកម្ពុជា ប៉ុន្តែហាមមិនឲ្យចាកចេញទៅក្រៅប្រទេស និងមិនឲ្យធ្វើនយោបាយ៕