កណ្ដាលៈ បុរសម្នាក់ត្រូវបានតុលាការខេត្តកណ្ដាលសម្រេចឃុំខ្លួនដាក់ពន្ធនាគារខេត្តជាបណ្ដោះអាសន្នដោយចោទប្រកាន់ពីបទ «ប៉ុនប៉ងមនុស្សឃាតដោយចេតនា» ទៅលើស្ត្រីជាសង្សារកាលពីថ្ងៃទី ៩ ខែកុម្ភៈ ឆ្នាំ ២០២០ ហើយបានរត់គេចខ្លួនអស់រយៈពេលជាង ១ ខែទើបកម្លាំងសមត្ថកិច្ច កងរាជអាវុធហត្ថខេត្តកណ្ដាលស្រាវជ្រាវចាប់ខ្លួនបានកាលពីពេលថ្មីៗនេះ។
លោក សម តុលា មេបញ្ជាការកងរាជអាវុធហត្ថខេត្តកណ្ដាលបានប្រាប់ភ្នំពេញប៉ុស្តិ៍នៅថ្ងៃព្រហស្បតិ៍ថា ជនសង្ស័យឈ្មោះ ចក់ ពឿន អាយុ ៣៦ ឆ្នាំ មានលំនៅភូមិព្រែកតានប់ ឃុំកំពង់ស្វាយ ខេត្តកណ្ដាលត្រូវបានកម្លាំងសមត្ថកិច្ច កងរាជអាវុធហត្ថខេត្តកណ្ដាលចាប់ឃាត់ខ្លួនកាលពីថ្ងៃទី ១៥ ខែ មីនា ឆ្នាំ ២០២០ នៅចំណុចផ្ទះជួលមួយស្ថិតក្នុងភូមិ-សង្កាត់កំពង់សំណាញ់ ក្រុងតាខ្មៅ បន្ទាប់ពីជននេះបានប្រព្រឹត្តអំពើហិង្សាយ៉ាងឃោរឃៅទៅលើស្ត្រីជាសង្សារម្នាក់ឈ្មោះ ស្រី ល័ក្ខ អាយុ ២៥ ឆ្នាំ ដែលរស់នៅក្នុងភូមិជាមួយគ្នាកាលពីថ្ងៃទី ៩ ខែ កុម្ភៈ ឆ្នាំ ២០២០ ហើយបានរត់គេចខ្លួនអស់រយៈពេលជាង ១ ខែ។
លោក តុលា បានបន្តថាតាមចម្លើយរបស់ស្ត្រីរងគ្រោះនៅថ្ងៃកើតហេតុ ជនសង្ស័យបានទៅផ្ទះរបស់នាងទាំងយប់ ហើយបានសុំឲ្យនាងបើកទ្វារផ្ទះ ដើម្បីសុំស្នាក់អាស្រ័យនៅផ្ទះនាងមួយយប់ ប៉ុន្តែដោយឪពុកម្ដាយរបស់នាងមិននៅផ្ទះ នាងក៏មិនបើកទ្វារឲ្យបុរសជាសង្សារនោះចូលទេ។ បន្ទាប់ពីដឹងថានាងនៅផ្ទះតែម្នាក់ឯង ជនសង្ស័យក៏បានយកកាំបិតចែត ដែលដាក់ជាប់ខ្លួន ទៅកាប់ទ្វារផ្ទះរបស់នាង ដើម្បីចូលទៅក្នុងផ្ទះរបស់នាងតែស្ត្រីរងគ្រោះបានព្យាយាមរត់ចេញតាមទ្វារក្រោយមកក្រៅផ្ទះហើយក៏ជំពប់ជើងដួលក៏ត្រូវជនសង្ស័យចាប់បាន ហើយនាំទៅកាន់ផ្ទះរបស់ខ្លួនដែលនៅប្រមាណ ២០០ ម៉ែត្រពីផ្ទះរបស់នាង។
លោកបានបញ្ជាក់ថា៖ «ខណៈនោះស្ត្រីរងគ្រោះបានប្រទះឃើញកម្លាំងសមត្ថកិច្ចយើង ដែលចុះល្បាតតាមមូលដ្ឋាន ហើយក៏ស្រែកឲ្យជួយ នៅពេលនោះជនសង្ស័យក៏បានយកកាំបិតអារករបស់នាងតែម្ដង តែត្រូវនាងចាប់កាំបិតនោះជាប់បណ្ដាលឲ្យរបួសដាច់ម្រាមដៃស្ដាំចំនួន ៤ ហើយរើបម្រះខ្លួនពីជនសង្ស័យ ប៉ុន្តែត្រូវជនសង្ស័យកាប់ត្រូវ ២ កាំបិតថែមទៀតត្រូវកំភួនដៃស្តាំ ១ កាំបិតដាច់ដល់ឆ្អឹង និងត្រូវស្លាបប្រចៀវខាងស្តាំ ១ កាំបិត។ បន្ទាប់មកជនសង្ស័យក៏រត់ភៀសខ្លួនបាត់ទៅ»។
លោក តុលា បានបន្តថាដោយគិតពីអាយុជីវិតស្ត្រីរងគ្រោះកម្លាំងសមត្ថកិច្ចមិនបានប្រដេញតាមចាប់ជនសង្ស័យភ្លាមទេគឺបាននាំគ្នាជួយអន្តរាគមន៍នាំស្ត្រីរងគ្រោះទៅមន្ទីរពេទ្យដើម្បីព្យាបាលរបួស ហើយបានចាត់កម្លាំងស្រាវជ្រាវដោយសម្ងាត់ដើម្បីស្វែងរកចាប់ខ្លួនជនសង្ស័យយកមកប្រគល់ឲ្យសមត្ថកិច្ចតុលាការផ្ដន្ទាទោសទៅតាមផ្លូវច្បាប់។
រយៈពេលជាង ១ ខែក្រោយមកគឺនៅថ្ងៃទី ១៥ ខែ មីនា ឆ្នាំ ២០២០ កន្លងទៅនេះកម្លាំងសម្ងាត់របស់លោកក៏បានប្រទះឃើញជនសង្ស័យ ហើយបានស្នើសុំកិច្ចសហការពីតំណាងអយ្យការអមសាលាដំបូងខេត្តកណ្ដាលចុះចាប់ឃាត់ខ្លួនជនសង្ស័យយកមកសាកសួរ ហើយបានកសាងសំណុំរឿងបញ្ជូនទៅតុលាការ ដើម្បីចំណាត់ការបន្តតាមនីតិវិធី។
លោកបានបញ្ជាក់ថា៖ «នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានប្រព្រឹត្តអំពើហិង្សាដូចអ្វីដែលស្ត្រីរងគ្រោះបានរៀបរាប់ប្រាប់សមត្ថកិច្ចពីខាងលើនោះមែន ព្រោះតែខ្លួនប្រចណ្ឌខឹងនឹងស្ត្រីរងគ្រោះបានសុំផ្ដាច់ទំនាក់ទំនងស្នេហាជាមួយខ្លួន ហើយទៅលួចទាក់ទងស្នេហាជាមួយប្រុសថ្មី»។
លោកបានបន្ថែមថា ក្រោយបញ្ចប់ការសាកសួរនៅល្ងាចថ្ងៃទី ១៧ ជនសង្ស័យត្រូវបានបញ្ជូនខ្លួនទៅកាន់តុលាការខេត្តកណ្ដាលហើយតុលាការបានសម្រេចធ្វើការចោទប្រកាន់ពីបទ «ប៉ុនប៉ងមនុស្សឃាតដោយចេតនា» និងបានបង្គាប់ឲ្យកម្លាំងនគរបាលយុត្តិធម៌នាំជនសង្ស័យទៅឃុំខ្លួនក្នុងពន្ធនាគារខេត្តជាបណ្ដោះអាសន្នដើម្បីរង់ចាំការជំនុំជម្រះទោសជាក្រោយ»៕