.jpg)
ជនត្រូវចោទ ហែន លីណា មន្ត្រីនគរបាល។ រូបថត សហការី
កណ្ដាលៈ ចៅក្រមស៊ើបសួរសាលាដំបូងខេត្តកណ្ដាលបានចេញដីកាបង្គាប់ឲ្យឃុំខ្លួនមន្ត្រីនគរបាលស័ក្ដិ ៣ ម្នាក់ នៃស្នងការដ្ឋាននគរបាលខេត្តកណ្ដាល ក្រោយពីបានជិះរថយន្តបុក និងវាយពលរដ្ឋឲ្យរងរបួសធ្ងន់។
យោងតាមដីកាបង្គាប់របស់ចៅក្រមស៊ើបសួរលោក រស់ ផុន ចាន់និមល ចេញកាលពីថ្ងៃទី ៣១ ខែមករា បានឲ្យដឹងថា ជនត្រូវចោទឈ្មោះ ហែន លីណា អាយុ ៣១ ឆ្នាំ ឋានន្តរស័ក្ដិអនុសេនីយ៍ឯក (ស័ក្ដិ ៣) បម្រើការនៅការិយាល័យចាត់តាំងបុគ្គលិកនៃស្នងការដ្ឋាននគរបាលខេត្តកណ្ដាលត្រូវបានចោទប្រកាន់ពីបទហិង្សាដោយចេតនា និងបទធ្វើឲ្យខូចខាតដោយចេតនាយោងតាមមាត្រា ២១៧ និងមាត្រា ៤១០ នៃក្រមព្រហ្មទណ្ឌ។
លោក ឡាក់ ម៉េងធី នាយការិយាល័យព្រហ្មទណ្ឌកម្រិតស្រាល ខេត្តកណ្តាលបានថ្លែងឲ្យដឹងថា មន្ត្រីជំនាញ និងព្រះរាជអាជ្ញារងខេត្តកណ្តាលបានសាកសួរទៅលើឈ្មោះ ហែន លីណា ពាក់ព័ន្ធនឹងកណីចោទប្រកាន់រឿងគាត់ បើកថយរថយន្ដ Honda CRV មកបុករថយន្ដជនរងគ្រោះ និងចុះពីលើរថយន្ដវាយមកលើជនរងគ្រោះឈ្មោះ អាន វៃ កាលពីយប់ថ្ងៃទី ២៥ ខែ មករា ឆ្នាំ ២០២០ នៅចំណុចផ្លូវស្អាងភ្នំស្ថិតក្នុងស្រុកស្អាង ខេត្តកណ្ដាល។
យោងតាមវីដេអូដែលបង្ហាញដោយកាមេរ៉ាសុវត្ថិភាពបានបង្ហាញថា មន្ដ្រីនគរបាលរូបនោះបើករថយន្ដម៉ាក Honda CRV ទៅកាក់ពីមុខរថយន្ដជនរងគ្រោះម៉ាក Lexus RX330 ដើម្បីឲ្យឈប់។ បន្ទាប់មកមន្ដ្រីនគរបាលនោះបានបើកបុក រថយន្ដជនរងគ្រោះ និងចុះពីលើរថយន្ដវាយទាំងកំរោលមកលើជនរងគ្រោះតែម្ដង។
លោក លន ចន្ថា អធិការរងស្រុកស្អាងទទួលផែនព្រហ្មទណ្ឌបានឱ្យដឹងថា រឿងនេះផ្តើមចេញពីគ្រោះថ្នាក់ចរាចរណ៍បន្តិចបន្តួចប៉ុណ្ណោះ តែគ្មានការយល់យោគគ្នា ទើបឈានដល់អំពើហិង្សាតែម្តង។ តាមការពិនិត្យកាមេរ៉ាសុវត្ថិភាពនៅកន្លែងកើតហេតុដំបូងបញ្ជាក់ថា ជនត្រូវចោទពិតជាបានបើកឡានថយក្រោយបុកឡាន និងធាក់ទ្វារឡាន និងវាយតប់លើជនរងគ្រោះ៕
