.jpg)
ពលរដ្ឋតវ៉ានៅមុខតុលាការខេត្តកោះកុងពីថៃ្ង ១៨ វិច្ឆិកា ខណៈតំណាងពួកគេត្រូវហៅសួរចម្លើយ។ រូប សហការី
កោះកុងៈ សាលាដំបូង និងអយ្យការអមសាលាដំបូងខេត្តកោះកុងបានបកស្រាយថា ការបង្គាប់ឱ្យជនត្រូវចោទចំនួន ៣ នាក់ ដែលជាតំណាងសហគមន៍ចូលបំភ្លឺនៅតុលាការ គឺជាសំណុំរឿងព្រហ្មទណ្ឌ មិនមែនជាសំណុំរឿងពាក់ព័ន្ធនឹងវិវាទកម្មសិទ្ធិដីធ្លីនោះឡើយ។
ការបកស្រាយនេះ បន្ទាប់ពីមានការតវ៉ារយៈពេល ២ ថ្ងៃជាប់គ្នានៅមុខសាលាដំបូងខេត្តកោះកុងកាលពីថ្ងៃទី ១៧ និង ១៨ វិច្ឆិកា របស់ប្រជាពលរដ្ឋរាប់រយនាក់មកពីស្រុកចំនួន ៣ នៃខេត្តនេះរួមមាន ស្រុកស្រែអំបិល ស្រុកបទុមសាគរ និងស្រុកគិរីសាគរ។ ពួកគេតវ៉ានេះ គឺដើម្បីឃ្លាំមើលការចូលបំភ្លឺរបស់តំណាងពួកគេ និងបានស្រែកតវ៉ាថា ពួកគេគឺជាជនរងគ្រោះដីធ្លី។
សេចក្ដីថ្លែងការណ៍របស់សាលាដំបូង និងអយ្យការអមសាលាដំបូងខេត្តកោះកុងចុះថ្ងៃទី ១៨ វិច្ឆិកា បានឱ្យដឹងថា អ្នកស្រី ផាវ ញើង អ្នកស្រី សេង លីន និងអ្នកស្រី ខន ផុន ត្រូវបានតំណាងអយ្យការអមសាលាដំបូងខេត្តកោះកុងធ្វើការចោទប្រកាន់ពីបទញុះញង់ឱ្យប្រព្រឹត្តអំពើបង្កឱ្យមានការវឹកវរដល់សន្តិសុខសង្គម និងបទបរិហារកេរ្តិ៍ជាសាធារណៈដែលមាន ឈ្មោះ ឆាយ វី ជាអតីតតំណាងរបស់ពួកគាត់ ជាដើមបណ្តឹងរដ្ឋប្បវេណី។
សាលាដំបូង និងអយ្យការអះអាងថា នៅថ្ងៃទី ១៨ វិច្ឆិកា សាលាដំបូងបានបង្គាប់ឱ្យជនត្រូវចោទទាំង ៣ ចូលខ្លួននៅចំពោះមុខចៅក្រមស៊ើបសួរ ហើយបែរជាមានប្រជាពលរដ្ឋជាច្រើនរយនាក់ខាងលើបានមកធ្វើការស្រែកតវ៉ានៅមុខសាលាដំបូង សុំឱ្យតុលាការជួយដោះស្រាយរឿងទំនាស់ដីធ្លីទៅវិញ។
សាលាដំបូងខេត្តកោះកុងបញ្ជាក់ថា៖ «ដើម្បីចៀសវាងការភាន់ច្រឡំ សាលាដំបូង និងអយ្យការ សូមបញ្ជាក់ជូនសាធារណជនថា សំណុំរឿងខាងលើនេះគឺជាសំណុំរឿងព្រហ្មទណ្ឌ មិនមែនជាសំណុំរឿងពាក់ព័ន្ធនឹងវិវាទកម្មសិទ្ធិដីធ្លីនោះឡើយ»។
កាលពីថ្ងៃទី ១៨ វិច្ឆិកា បន្ទាប់ពីបញ្ចប់ការស៊ើបសួរ ចៅក្រមស៊ើបសួរបានសម្រេចឱ្យអ្នកស្រី ផាវ ញើង និងអ្នកស្រី សេង លីន ស្ថិតនៅក្រៅឃុំបណ្តោះអាសន្នដោយដាក់នៅក្រោមការត្រួតពិនិត្យរបស់តុលាការ ខណៈតំណាងម្នាក់ទៀតគឺអ្នកស្រី ខន ផុន ត្រូវបានតុលាការសម្រេចឱ្យរួចផុតពីការចោទប្រកាន់។
កាលពីថ្ងៃទី ២៥ ខែ វិច្ឆិកា ឆ្នាំ ២០១៩ តំណាង ៣ នាក់ ដែលជាជនត្រូវចោទខាងលើក្នុងចំណោមពលរដ្ឋ ១៧៥ គ្រួសារនៅឃុំជីខលើ ស្រុកស្រែអំបិល ខេត្តកោះកុង បានប្តឹងទៅរដ្ឋមន្ត្រីក្រសួងមហាផ្ទៃ លោក ស ខេង ដោយចោទប្រកាន់អ្នកស្រី ឆាយ វី អតីតតំណាងពួកគេថា បានញុះញង់ឱ្យប្រជាពលរដ្ឋលក់ដីសេសសល់បម្រុងទុករបស់សហគមន៍។
អ្នកស្រី ផាវ ញើង បានប្រាប់ ភ្នំពេញ ប៉ុស្តិ៍ ពីម្សិលមិញថា ការប្តឹងប្តល់របស់ពួកអ្នកស្រីគឺមានជាប់ពាក់ព័ន្ធនឹងបញ្ហាដីធ្លី ដូច្នេះតុលាការត្រូវតែស្វែងរកយុត្តិធម៌ដល់ពលរដ្ឋមានបញ្ហាដីធ្លីទាំងអស់ ព្រោះថាដើមបណ្តឹងរដ្ឋប្បវេណីគឺមានជាប់ពាក់ព័ន្ធនឹងការលក់ដីរបស់សហគមន៍។
អ្នកស្រីបានបញ្ជាក់ថា៖ «ហេតុអ្វីបានពួកខ្ញុំ ស្រែកដូច្នេះ ដោយសារតែគេរំលោភបំពានដីធ្លីរបស់ខ្ញុំ ហើយពួកខ្ញុំក៏តវ៉ាហើយនៅពេលតវ៉ាមានបណ្តឹងជាបន្តបន្ទាប់បានប្តឹងមកលើពួកខ្ញុំ។ ករណីដែលអ្នកស្រី ឆាយ វី ប្តឹងនេះក៏ពាក់ព័ន្ធនឹងដីធ្លីដែរ ព្រោះគាត់បានបញ្ចុះបញ្ចូលពលរដ្ឋឱ្យលក់ដីរបស់សហគមន៍ ហើយគាត់លក់ដីដែលសេសសល់របស់សហគមន៍»។
កាលពីថ្ងៃទី ១៧ វិច្ឆិកា តំណាងពលរដ្ឋចំនួន ៥ នាក់ផ្សេងទៀតក៏បានចូលទៅឆ្លើយបំភ្លឺនៅតុលាការកោះកុងតាមដីកាបង្គាប់ឱ្យចូលខ្លួនពីបទបរិហារបង្កាច់កេរ្តិ៍ និងញុះញង់ឱ្យប្រព្រឹត្តបទល្មើសបង្កឱ្យវឹកវរដល់សន្តិសុខសង្គមតាមពាក្យបណ្តឹងរបស់ក្រុមហ៊ុន ហេង ហ៊ុយ អ្រេហ្គីខាល់ឆ័រ គ្រុប (Heng Huy Agriculture Group) របស់ឧកញ៉ា ហេង ហ៊ុយ ផងដែរ។ ប៉ុន្តែពួកគេទាំង ៥ នាក់ ត្រូវបានសម្រេចឱ្យនៅក្រៅឃុំជាបណ្ដោះអាសន្ន ក្រោមការត្រួតពិនិត្យរបស់តុលាការដូចគ្នា។
លោក ថោង ច័ន្ទដារ៉ា អ្នកសម្របសម្រួលផ្នែកសិទ្ធិមនុស្សនៃសមាគម អាដហុកប្រចាំខេត្តកោះកុងបានថ្លែងថា តំណាងសហគមន៍ទាំង ៥ នាក់ និងតំណាងសហគមន៍ ២ នាក់នេះ គឺពួកគាត់សុទ្ធតែតវ៉ា និងមានជាប់ពាក់ព័ន្ធទៅនឹងការការពារដីធ្លីរបស់ខ្លួន។
លោកបន្តថា ការចោទប្រកាន់ពួកគាត់ពីបទបរិហារបង្កាច់កេរ្តិ៍ និងញុះញង់ឱ្យប្រព្រឹត្តបទល្មើសបង្កឱ្យវឹកវរនេះគឺហាក់ធ្ងន់ធ្ងរសម្រាប់ពលរដ្ឋមានបញ្ហាដីធ្លីណាស់។ លោកស្នើឱ្យមានការស៊ើបអង្កេតករណីនេះឱ្យបានត្រឹមត្រូវមុននឹងចោទប្រកាន់ពលរដ្ឋ។
លោកបញ្ជាក់ថា៖ «ក្នុងករណីនេះ មានភាគីម្ខាងគឺប្តឹងគាត់ ប៉ុន្តែជាក់ស្តែងយ៉ាងណានោះ គឺគួរតែតុលាការធ្វើការស៊ើបអង្កេតទាក់ទងរឿងនេះឱ្យបានច្បាស់ ហើយការលក់ដីសហគមន៍អី តើមានពិតមែនទេ? តើឈ្មោះដែលប្តឹងប្រជាសហគមន៍ គាត់បានលក់ដីសហគមន៍មែនឬយ៉ាងម៉េច?
សុំឱ្យមានការស៊ើបអង្កេតឱ្យបានស៊ីជម្រៅជាមួយអាជ្ញាធរដែនដី មុននឹងធ្វើការកោះហៅពលរដ្ឋមកបំភ្លឺគឺគួរតែធ្វើឱ្យបានទាំងសងខាង»៕
