.jpg)
សាលាដំបូងខេត្តកំពង់ឆ្នាំង។ រូបថត សហការី
កំពង់ឆ្នាំងៈ តុលាការខេត្ដកំពង់ឆ្នាំងនឹងកោះហៅមន្ត្រីនៃមន្ទីរកសិកម្ម និងនេសាទ មន្ដ្រីជលផល និងរដ្ឋបាលស្រុកជលគិរីឲ្យទៅឆ្លើយបំភ្លឺ ករណីដោះលែងពលរដ្ឋ ៣ នាក់កាលពីថ្ងៃទី ១៩ ខែមេសា បន្ទាប់ពីឃាត់ខ្លួននៅក្នុងថ្ងៃដដែលនោះពាក់ព័ន្ធនឹងការឈូសឆាយដីព្រៃលិចទឹកស្ថិតនៅភូមិក្បាលកន្លង់ ឃុំពាមឆ្កោក ស្រុកជលគិរី។
លោក ឈួន ស៊ីវិន អ្នកនាំពាក្យសាលាដំបូងខេត្តកំពង់ឆ្នាំងបានប្រាប់ភ្នំពេញប៉ុស្ដិ៍ពីថ្ងៃម្សិលមិញថា ករណីឃាត់ខ្លួនពលរដ្ឋទាំង ៣ នាក់នេះ លោកព្រះរាជអាជ្ញារង ឡុង ស៊ីថា ដោយបានសហការជាមួយកម្លាំងអាវុធហត្ថ និងកងកម្លាំងនគរបាលស្រុកជលគិរីបានឃាត់ខ្លួនពលរដ្ឋ ៣ នាក់ និងត្រាក់ទ័រ ២ គ្រឿងកាលពីថ្ងៃទី ១៩ ខែមេសា ឆ្នាំ ២០២០។
លោកបន្តថា ក្រោយឃាត់ខ្លួនពលរដ្ឋទាំង ៣ នាក់ ព្រះរាជអាជ្ញា បានសួរចម្លើយរួចហើយក៏ប្រគល់ឯកសារ និងពលរដ្ឋទាំង ៣ នាក់នោះទៅឲ្យមន្ត្រីជលផលដើម្បីកសាងសំណុំរឿងបន្តតាមនីតិវិធីច្បាប់ទើបបញ្ជូនមកតុលាការវិញព្រោះករណីនេះជាបទល្មើសជលផល។
លោក ស៊ីវិន ថ្លែងថា៖ «មិនដឹងយ៉ាងម៉េចខាងជលផលបានដោះលែងមនុស្សទាំង ៣ នាក់នោះទៅដោយអត់មានឆ្លងព្រះរាជអាជ្ញា។ ក្រោយមកលោកព្រះរាជអាជ្ញាឲ្យខាងមន្ដ្រីជលផល ហើយមន្ទីរកសិកម្មខេត្ដកំពង់ឆ្នាំងបំភ្លឺ។ តាមការបំភ្លឺរបស់គាត់ (មន្ទីរកសិកម្ម និងរដ្ឋបាលស្រុកជលគិរី) ការដោះលែងដោយសារតែដីដែលឈូសឆាយនោះជាដីរបស់ប្រជាពលរដ្ឋទេ»។
លោកបន្តថា៖ «បច្ចុប្បន្នតុលាការកំពុងតែស៊ើបសួរបន្តលើរឿងនេះមិនទាន់បានសម្រេចថាយ៉ាងម៉េចទេ។ តុលាការនឹងត្រៀមហៅខាងមន្ត្រីជលផល និងស្រុកមកឆ្លើយបំភ្លឺ»។ «ព្រះរាជអាជ្ញានឹងចុះទៅពិនិត្យនៅទីតាំងដីនោះម្ដងទៀត។ ពលរដ្ឋទាំង ៣ នាក់ដែលឈូសឆាយដីនោះ គឺជាពលរដ្ឋរស់នៅស្រុកជលគីរី»។
លោក ងិន ហ៊ុន ប្រធានមន្ទីរកសិកម្ម ខេត្ដកំពង់ឆ្នាំងបដិសេធថា មន្ត្រីរបស់លោក មិនមែនជាអ្នកដោះលែងពលរដ្ឋទាំង ៣ នាក់នោះទេ។ «គ្មាននរណាមានសិទ្ធិទៅដោះលែងមនុស្សទេ។ ពាក់ព័ន្ធនឹងមន្ដ្រីជំនាញរបស់ខ្ញុំ គាត់បានទៅទទួលតែកំណត់ហេតុទេ គាត់អត់បានទៅប្រគល់ទទួលមនុស្ស និងវត្ថុតាងទេ។ អ៊ីចឹង មនុស្ស និងវត្ថុតាងនៅកន្លែងប៉ូលិស ហើយវារត់នៅកន្លែងប៉ូលិសនោះទេ។ មិនមែនខាងជំនាញខ្ញុំអ្នកដោះលែងទេ។ ករណីនេះខ្ញុំបានធ្វើរបាយការណ៍ជូនលោកព្រះរាជអាជ្ញារួចរាល់ហើយ»។
បើតាមលោក ហ៊ុន ពាក់ព័ន្ធនឹងកន្លែងដែលពលរដ្ឋឈូសឆាយនោះក្រោយពេលមន្ដ្រីពាក់ព័ន្ធបានចុះទៅពិនិត្យមើល គឺពលរដ្ឋបានភ្ជួរដីស្រែប៉ុណ្ណោះ។ លោកថា៖ «អ៊ីចឹងកាលណាភ្ជួរដីស្រែរបស់ពលរដ្ឋ សំណុំរឿងដែលយើងបានពិនិត្យមើលឃើញថា គាត់អត់មានទោសទណ្ឌអីទេ។ អ៊ីចឹងយើងមិនបានដាក់ទោសទណ្ឌគាត់ទេ។ ដោយសារគាត់ភ្ជួរដីស្រែរបស់គាត់»។
លោក ឃឹម យ៉ុង អធិការនគរបាលស្រុកជលគិរីមិនអាចទាក់ទងសុំការបញ្ជាក់បន្ថែមលើករណីនេះបានទេពីម្សិលមិញ។
កាលពីថ្ងៃទី ១៩ ខែមេសា ក្រោមការដឹកនាំដោយព្រះរាជអាជ្ញារងនៃអយ្យការអមសាលាដំបូងខេត្តកំពង់ឆ្នាំងលោក ឡុង ស៊ីថាបានសហការជាមួយកម្លាំងសមត្ថកិច្ចពាក់ព័ន្ធឃាត់ខ្លួនពលរដ្ឋ ៣ នាក់ និងត្រាក់ទ័រ ២ គ្រឿងដែលកំពុងឈូសឆាយដីស្ថិតនៅភូមិក្បាលកន្លង់ ឃុំពាមឆ្កោក ស្រុកជលគីរី៕
