.jpg)
ជនសង្ស័យទាំង ៣ នាក់ត្រូវសមត្ថកិច្ចឃាត់ខ្លួន ករណីលួចជីករ៉ែមាសនៅក្នុងរណ្ដៅដីរ៉ែមាសមួយកន្លែងក្នុងតំបន់អូរត្រូន នៃឃុំក្បាលដំរី។ រូបថត ប៉ូលិស
ក្រចេះ៖ តុលាការខេត្តក្រចេះនៅរសៀលថ្ងៃទី ២៧ ខែ មេសា ឆ្នាំ ២០២៧ បានសម្រេចឃុំខ្លួនបុរស ៣ នាក់ ដែលបានលួចជីករ៉ែមាសនៅក្នុងរណ្ដៅដីរ៉ែមាសមួយកន្លែងក្នុងតំបន់អូរត្រូន នៃឃុំក្បាលដំរី ស្រុកសំបូរ ដោយចោទប្រកាន់ពីបទ «លួច»។ នេះបើតាមការអះអាងរបស់អ្នកនាំពាក្យសាលាដំបូងខេត្តក្រចេះ។
លោក ទីវ វុធធេន អ្នកនាំពាក្យសាលាដំបូងខេត្តក្រចេះ បានប្រាប់ ភ្នំពេញ ប៉ុស្តិ៍ នៅរសៀលថ្ងៃទី ២៧ ខែមេសាថា ជនត្រូវចោទក្នុងបទល្មើសខាងលើនេះ រួមមានឈ្មោះ ស៊ិន សុខេត អាយុ ៥២ ឆ្នាំ មានទីលំនៅភូមិអូរពោធិ៍ ឃុំក្បាលដំរី ស្រុកសំបូរ ខេត្តក្រចេះ និងបក្ខពួក ២ នាក់ទៀត ដែលរស់នៅក្នុងភូមិជាមួយគ្នារួមមានឈ្មោះ អាន រ៉ាវី អាយុ ២៩ ឆ្នាំ និងឈ្មោះ ជឹម សុឡា អាយុ ២៤ ឆ្នាំ។
លោកបានបន្តថា យោងតាមសំណុំរឿងដែលសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តក្រចេះបញ្ជូនមកនារសៀលថ្ងៃទី ២៧ ខែមេសា ជនត្រូវចោទត្រូវបានកម្លាំងសមត្ថកិច្ចនគរបាលស្រុកសំបូរ ចាប់ឃាត់ខ្លួននៅយប់ថ្ងៃទី ២៥ ខែ មេសា ឆ្នាំ ២០២១ ខណៈកំពុងនាំគ្នាលួចជីកយករ៉ែមាសនៅក្នុងរណ្ដៅដីអាជីវកម្មរ៉ែមាសមួយកន្លែងរបស់ក្រុមហ៊ុន [ចិន] ស៊ីង យ័ងគ័ងយិ ដែលមានទីតាំងស្ថិតនៅក្នុងតំបន់ អូរត្រូន នៃឃុំក្បាលរមាស។ បន្ទាប់មកពួកគេត្រូវបានបញ្ជូនទៅកាន់ស្នងការដ្ឋាននគរបាលខេត្តក្រចេះនៅរសៀលថ្ងៃទី ២៦ ខែមេសា ។
លោក វុធ ធេន បានបញ្ជាក់ថា៖ «ក្រោយបញ្ចប់ការស៊ើបសួរ លោកស្រី ទេព សុធាវី ចៅក្រមស៊ើបសួរលើសំណុំរឿងនេះ បានសម្រេចចោទប្រកាន់ពីបទលួច តាមបញ្ញតិមាត្រា ៣៥៦ នៃក្រមព្រហ្មទណ្ឌ និងបង្គាប់ឲ្យសមត្ថកិច្ចនគរបាលយុតិ្តធម៌នាំខ្លួនពួកគេទាំង ៣ នាក់ ទៅឃុំខ្លួនជាបណ្ដោះអាសន្ន នៅពន្ធនាគារខេត្តក្រចេះ ដើម្បីរង់ចាំការជំនុំជម្រះទោសនៅពេលក្រោយ»។
យោងតាមបទចោទ និងមាត្រា ៣៥៦ នៃក្រមព្រហ្មទណ្ឌខាងលើនេះ ជនសង្ស័យទាំង ៣ នាក់ នឹងត្រូវប្រឈមការផ្ដន្ទាទោសជាប់ពន្ធនាគារពី ៦ ខែទៅ ៣ ឆ្នាំ និងពិន័យជាប្រាក់ពី ១ លានរៀល ដល់ ៦ លានរៀល។
ការលួចធ្វើអាជីវកម្មរ៉ែមាសខុសច្បាប់នៅក្នុងតំបន់អូរត្រូននៃឃុំក្បាលដំរី ស្រុកសំបូរ ខេត្តក្រចេះ ក្នុងរយៈពេលប៉ុន្មានឆ្នាំចុងក្រោយនេះ បានធ្វើឲ្យមនុស្សប្រមាណ ១០ នាក់បានស្លាប់ ដោយករណីបាក់ដីនៃរណ្ដៅរ៉ែមាសសង្កត់លើ និងជាច្រើននាក់ទៀត ត្រូវបានកម្លាំងសមត្ថកិច្ចចាប់ខ្លួនកសាងសំណុំរឿងបញ្ជូនទៅកាន់តុលាការចាត់វិធានការជាបន្តបន្ទាប់ទៅតាមនីតិវិធីច្បាប់។ ទន្ទឹមនឹងនេះ អាជ្ញាធរខេត្តក៏ធ្លាប់បានចុះធ្វើការផ្សព្វផ្សាយណែនាំអប់រំ និងបង្ក្រាបជាច្រើនដងរួចមកហើយដែរ ជុំវិញការលួចធ្វើអាជីវកម្មរ៉ែមាសខុសច្បាប់នៅក្នុងតំបន់ដីសម្បទានសេដ្ឋកិច្ចដែលត្រូវបានរាជរដ្ឋាភិបាលកម្ពុជាផ្ដល់សិទ្ធិទៅឲ្យក្រុមហ៊ុនចិនឈ្មោះ ស៊ីង យ័ងគ័ងយិ នេះផងដែរ៕
