ពោធិ៍សាត់ៈ សាលាដំបូងខេត្តពោធិ៍សាត់នៅរសៀលថ្ងៃនេះបានចេញដីកាឃុំខ្លួនបុរសម្នាក់ដាក់ពន្ធនាគារខេត្ត ប៉ុន្មានម៉ោង បន្ទាប់ពីសមត្ថកិច្ចបញ្ជូនដល់តុលាការពាក់ព័ន្ធករណីកាប់ព្រះចៅអធិការវត្តបណ្ដាលឱ្យរបួសធ្ងន់ ប្រព្រឹត្តនៅវត្តបក្សីចាំក្រុងក្នុងភូមិអូរបាក់ត្រា ឃុំព្រងិល ស្រុកភ្នំក្រវាញ កាលពីយប់ថ្ងៃទី ២៦ មេសា។
លោកឧត្តមសេនីយ៍ត្រី ម៉ូ លីដា ស្នងការរងនគរបាលខេត្តទទួលបន្ទុកផែនព្រហ្មទណ្ឌឱ្យដឹងនៅថ្ងៃទី ២៨ មេសានេះថា ជនសង្ស័យរូបនេះឈ្មោះ ឆេង ឆាយ អាយុ ៣៨ ឆ្នាំរស់នៅភូមិអូរបាក់ត្រា ឃុំព្រងិល ស្រុកភ្នំក្រវាញ។ រីឯព្រះចៅអធិការវត្តព្រះនាម ទេព អ៊ូច ព្រះជន្ម ៥៣ ព្រះវស្សា គង់នៅវត្តបក្សីចាំក្រុង ក្នុងភូមិ-ឃុំកើតហេតុខាងលើ។
លោកបានប្រាប់ថា៖ «បុរសម្នាក់នោះត្រូវចោទពីបទហិង្សាដោយមានស្ថានទម្ងន់ទោសនិងបទប្រើប្រាស់គ្រឿងញៀន និងប្រើប្រាស់អាវុធ»។ បើតាមលោក លីដា ព្រះចៅអធិការរងគ្រោះត្រូវជនសង្ស័យកាប់រយះពីស្មារហូតដល់ក្រោមឆ្អឹងជំនីរខាងស្តាំហើយដេរជាង ៦០ ថ្នេរ»។
ដោយឡែកលោក ហ៊ុន ចាន់ធា នាយផ្នែកព្រហ្មទណ្ឌស្រុកភ្នំក្រវាញឱ្យដឹងនៅរសៀលថ្ងៃនេះដែរថា ជនសង្ស័យម្នាក់នេះកន្លងមកធ្លាប់សុំព្រះចៅអធិការចូលបួសរៀនម្តងមកហើយ តែដោយសារកាលនៅជាសង្ឃ ជនសង្ស័យតែងប្រើហិង្សាហើយពេលឆាន់ចង្ហាន់ម្តងៗតែងគប់ចានគប់ស្លាបព្រា ទើបព្រះចៅអធិការវត្តផ្សឹក និងបណ្តេញចេញពីវត្ត។ តែក្រោយមកជនសង្ស័យបានសុំបួសម្ដងទៀតតែព្រះចៅអធិការមិនអនុញ្ញាត។
លោកបន្តថា លុះនៅយប់ថ្ងៃទី ២៦ មេសា ខណៈព្រះចៅអធិការកំពុងអង្គុយសូត្រធម៌តែអង្គឯងនៅថ្ងៃវិសាខបូជា ស្រាប់តែជនសង្ស័យកាន់កាំបិតផ្កាក់លបដើរពីក្រោយខ្នងព្រះអង្គ តែដោយសារព្រះចៅអធិការវត្តឮសូរសម្រិបជើងដើរក៏ស្រែកសួរ ហើយពេលនោះជនសង្ស័យក៏ស្ទុះមកកាប់ព្រះអង្គតែម្តង។
បើតាមលោក ហ៊ុន ចាន់ធា ពេលនោះព្រះចៅអធិការបានស្រែកឮដល់សង្ឃ និងដូនជីក្នុងវត្តហើយក៏បានរត់មកជួយ និងដឹកទៅសង្គ្រោះនៅមន្ទីរពេទ្យបង្អែកស្រុកភ្នំក្រវាញ។ រីឯជនសង្ស័យបានរត់គេចខ្លួន តែរហូតដល់ព្រឹកថ្ងៃទី ២៧ មេសា សមត្ថកិច្ចក៏ចាប់បានវិញ។
លោកបញ្ជាក់ថា៖ «រឿងនេះជនសង្ស័យមានគំនុំជាមួយព្រះចៅអធិការវត្ត ព្រោះគេសុំលោកបួសម្ដងទៀតតែព្រះចៅអធិការមិនព្រម។ ជនសង្ស័យរូបនេះក៏មានប្រើគ្រឿងញៀនផងដែរ»៕