.jpg)
តុលាការខេត្តបាត់ដំបងបង្គាប់ឱ្យឃុំខ្លួនបុរសម្នាក់ ពាក់ព័ន្ធនឹងករណីរក្សាទុកអាវុធ និងគ្រាប់រំសេវខុសច្បាប់ កាលពីថ្ងៃទី ៨ ឧសភា។ រូបថត កងរាជអាវុធហត្ថខេត្តបាត់ដំបង
បាត់ដំបង៖ សាលាដំបូងខេត្តបាត់ដំបងនៅរសៀលថ្ងៃទី ១១ ឧសភានេះ បានចេញដីកាបង្គាប់ឱ្យសមត្ថកិច្ចកងរាជអាវុធហត្ថនាំបុរសម្នាក់ទៅឃុំខ្លួនក្នុងពន្ធនាគារខេត្ត ពាក់ព័ន្ធនឹងករណីរក្សាទុកអាវុធ និងគ្រាប់រំសេវដោយខុសច្បាប់។
លោកស្រី ជា ចាន់រស្មី អ្នកនាំពាក្យសាលាដំបូងខេត្តបាត់ដំបងប្រាប់ ភ្នំពេញ ប៉ុស្ដិ៍ នៅរសៀលថ្ងៃទី ១១ ឧសភានេះថា ជនត្រូវចោទឈ្មោះ សាំ សុបញ្ញាវ័ន្ត អាយុ ២៥ ឆ្នាំ ត្រូវបានចៅក្រមចេញដីកាឃុំខ្លួននៅក្នុងពន្ធនាគារខេត្តហើយ។
លោកស្រីបានថ្លែងថា៖ «លោកចៅក្រមស៊ើបសួរ គឹម ហេង ជាអ្នកចេញដីកាឃុំ។ ជននេះត្រូវចោទពីបទរក្សាទុកកាន់កាប់ ឬដឹកជញ្ជូនអាវុធដោយគ្មានការអនុញ្ញាតតាមមាត្រា ២០ នៃច្បាប់ស្តីពីការគ្រប់គ្រងអាវុធគ្រឿងផ្ទុះ និងគ្រាប់រំសេវ»។
តាមច្បាប់នេះ ប្រសិនបើតុលាការរកឃើញមានកំហុសដូចការចោទប្រកាន់មែននោះ គឺជនសង្ស័យនឹងត្រូវប្រឈមមុខការផ្តន្ទាទោសដាក់ពន្ធនាគារពី ៦ ខែ ទៅ ២ ឆ្នាំ និងពិន័យប្រាក់ចូលថវិការដ្ឋពី ៥០ ម៉ឺនរៀល ទៅ ២ លានរៀល។
លោក ឡាច វ៉ាន់ ប្រធានការិយាល័យប្រឆាំងបទល្មើសនៃបញ្ជាការដ្ឋានកងរាជអាវុធហត្ថខេត្តបាត់ដំបងបានប្រាប់នៅថ្ងៃទី ១១ ឧសភានេះថា ជនសង្ស័យរូបនេះជាជាងដែក រស់នៅភូមិចម្ការឫស្សី សង្កាត់ព្រែកព្រះស្ដេច ក្រុងបាត់ដំបង ខេត្តបាត់ដំបង។
លោករំឭកឱ្យដឹងថា ជនត្រូវចោទម្នាក់នេះធ្លាប់មានឪពុកធ្វើជាយោធា ហើយបានយកអាវុធប្រភេទ M16 ចំនួន ១ ដើម និងសម្ភារសម្លៀកបំពាក់យោធាមកទុកនៅក្នុងផ្ទះ។ ប៉ុន្តែក្រោយពីឪពុករបស់ខ្លួនស្លាប់ទៅ គឺជនសង្ស័យនៅតែបន្តរក្សាទុកអាវុធ និងសម្ភារយោធានោះនៅក្នុងផ្ទះដដែល។
លោក វ៉ាន់ បានបញ្ជាក់ថា៖ «ជនសង្ស័យគាត់ខុស ព្រោះគាត់មិនយកកាំភ្លើងទៅប្រគល់ឱ្យអាជ្ញាធរសង្កាត់ក្រុងគ្រប់គ្រង។ តែគាត់មិនបានយកកាំភ្លើងនោះទៅប្រព្រឹត្តបទល្មើសទេ»។
លោក ឡាច វ៉ាន់ បានឱ្យដឹងដែរថា មូលហេតុដែលសមត្ថកិច្ចរបស់លោកដឹង គឺដោយសារអ្នករស់នៅជិតខាងផ្ទះជនសង្ស័យបានរាយការណ៍ប្រាប់ ទើបសមត្ថកិច្ចរបស់លោកចុះទៅឆែកផ្ទះតែម្ដង។ ចំណែកវត្ថុតាងដែលរកឃើញរួមមាន អាវុធប្រភេទ M16 ចំនួន ១ ដើម, បង់ M16 ចំនួន ១០ បង់, បង់អាវុធ AK47 ចំនួន ៤ បង់, បង់អាវុធប្រភេទម៉ាត់តាយ៉ែតចំនួន ២ បង់, គ្រាប់អាវុធ M16 ចំនួន ២៤២ គ្រាប់, គ្រាប់អាវុធ AK47 ចំនួន ៦៤ គ្រាប់, កិប AK47 ចំនួន ៧ គ្រាប់, មីនថ្មើរជើងចំនួន ៤ គ្រាប់, ទូសៀរចំនួន ១, ស្បែកជើងកវែងយោធាចំនួន ១គូ ឯកសណ្ឋានប៉ារ៉ាចំនួន ១ កំប្លេ និងអាវភ្លៀងយោធាចំនួន ១ ផងដែរ៕
