.jpg)
ជនត្រូវចោទពីបទរំលោភលើទំនុកចិត្តឈ្មោះ ធី ឬទ្ធីសី។ រូបថត FN
រតនគិរីៈ សមត្ថកិច្ចខេត្ដរតនគិរីនៅមិនទាន់ចាប់ខ្លួនជនត្រូវចោទម្នាក់ឈ្មោះ ធី ឬទ្ធីសី បាននៅឡើយទេ បើទោះជាចៅក្រមស៊ើបសួរបានចេញដីកាបង្គាប់ឲ្យចាប់ខ្លួនតាំងពីថ្ងៃទី ១២ ខែតុលា ពាក់ព័ន្ធបទចោទ «រំលោភលើទំនុកចិត្ត និងមិនបំពេញកាតព្វកិច្ចចំពោះឧបករណ៍អាចជួញដូរបាននៅពេលដល់ឥណប្រតិទានដោយមានបំណង និងចេតនាធ្វើឲ្យខូចខាតប្រយោជន៍អ្នកដទៃ» ក៏ដោយ។
ដីកាបង្គាប់ឲ្យចាប់ខ្លួនដែលចេញដោយលោក ឡេង វណ្ណារិទ្ធិ ចៅក្រមស៊ើបសួរនៃសាលាដំបូងខេត្ដរតនគិរីបានបង្ហាញថា ក្រោយពីបានពិនិត្យសំណុំរឿងចប់សព្វគ្រប់ តុលាការយល់ឃើញថាជនត្រូវចោទឈ្មោះ ធី ឬទ្ធីសី ភេទប្រុស អាយុ ៣២ ឆ្នាំជនជាតិខ្មែរត្រូវបានព្រះរាជអាជ្ញាអមសាលាដំបូងខេត្ដរតនគិរីផ្ដើមចោទប្រកាន់ជុំវិញបទល្មើសខាងលើ។
ជននេះបានប្រព្រឹត្តនៅភូមិអូរកន្សែង សង្កាត់បឹងកន្សែង ក្រុងបានលុង ខេត្តរតនគិរីកាលពីថ្ងៃ ២៩ ខែមិថុនា ឆ្នាំ ២០១៨ ដែលជាបទល្មើសព្រហ្មទណ្ឌដែលមានចែងឲ្យផ្ដន្ទាទោសតាមបញ្ញតិមាត្រា ៣៩១ នៃក្រមព្រហ្មទណ្ឌ និងបានស្នើសុំឲ្យឃុំខ្លួនបណ្ដោះអាសន្ន។
លោក ឡេង វណ្ណារិទ្ធិ ប្រាប់ពីម្សិលមិញថា៖ «រហូតមកដល់ពេលនេះនៅមិនទាន់ឃើញសមត្ថកិច្ចឃាត់ខ្លួនជនត្រូវចោទបាននៅឡើយទេ។ នីតិវិធីទាំងនេះ ខ្ញុំគ្រាន់តែជាអ្នកចេញដីកាបង្គាប់ទេ ចំណែកខាងតំណាងអយ្យការគាត់ជាអ្នកជំរុញលើការងារទាំងនេះ»។
លោក យិន ចំណាន ស្នងការនគរបាលខេត្តរតនគិរីបានប្រាប់ភ្នំពេញ-ប៉ុស្តិ៍ពីម្សិលមិញថា រហូតដល់ថ្ងៃព្រហស្បតិ៍ម្សិលមិញនេះលោកនៅមិនទាន់ទទួលបានដីកាបង្គាប់ឲ្យចាប់ខ្លួនជនសង្ស័យខាងលើនៅឡើយទេ។
លោកថ្លែងថា៖ «ប្រហែលជាតុលាការគាត់បញ្ជូនទៅឲ្យសមត្ថកិច្ចនៅទីតាំងដែលមុខសញ្ញារស់នៅ។ ប៉ុន្ដែខ្ញុំមិនទាន់ទទួលបានរបាយការណ៍ណាមួយជុំវិញការតាមចាប់ខ្លួនជនសង្ស័យនៅឡើយទេ»។
លោក ឯក វ៉ាន់ដន អធិការស្រុកកំពង់សៀមបានប្រាប់ថា លោកក៏មិនទាន់ទទួលបានដីកាបង្គាប់ឲ្យចាប់ខ្លួនជនត្រូវចោទខាងលើដែរ បច្ចុប្បន្នកំពុងសាកសួរទៅមន្ដ្រីជំនាញបន្ថែមទៀត។
ដីកាបង្គាប់ឲ្យចាប់ខ្លួនខាងលើបានបញ្ជាក់ថា៖ «តុលាការបានចេញដីកាបង្គាប់ឲ្យចូលខ្លួនចំនួន ២ លើកមកហើយ ប៉ុន្ដែមិនឃើញជនត្រូវចោទមកឆ្លើយដោះសារនោះទេ។ តាមភ័ស្ដុតាងមូលប្បទានបត្ររបស់ធនាគារ ABA ឃើញថា សែកនេះពុំមានទឹកប្រាក់នៅក្នុងគណនីទេ។ ដើម្បីសម្រួលដល់នីតិវិធីស៊ើបសួរឲ្យបានពេញលេញគប្បីចេញដីកាបង្គាប់ឲ្យចាប់ខ្លួនជនត្រូវចោទនេះ»។
ដីកាដដែលបញ្ជាក់ថា ហេតុដូច្នេះសម្រេចបង្គាប់ឲ្យភ្នាក់ងារមានសមត្ថកិច្ចគ្រប់ជាន់ថ្នាក់ឲ្យចាប់ និងនាំខ្លួនជនឈ្មោះ ធី ឬទ្ធីសី មានមុខរបរជាអ្នករកស៊ី មានទីលំនៅបច្ចុប្បន្នភូមិថ្មគោល ឃុំរអាង ស្រុកកំពង់សៀម ខេត្ដកំពង់ចាម។ បង្គាប់ឲ្យពន្ធនាគារខេត្ដរតនគិរីទទួលយកជននេះរហូតដល់មានបទបញ្ជាថ្មីសម្រេចផ្សេងពីនេះ៕
