សៀមរាបៈ បុរសវ័យចំណាស់ម្នាក់ត្រូវបានចៅក្រមសាលាដំបូងខេត្តសៀមរាប ចេញដីកាឃុំខ្លួនក្នុងពន្ធនាគារខេត្តកាលពីថ្ងៃទី ៤ មេសា ពាក់ព័ន្ធករណីចាប់រំលោភចៅស្រីបង្កើត ប្រព្រឹត្តកាលពីខែកុម្ភៈ នៅសង្កាត់ស្រងែក្រុង-ខេត្តសៀមរាប ហើយត្រូវសមត្ថកិច្ចចាប់ខ្លួនពីថ្ងៃទី ៣ មេសា តាមបណ្តឹងរបស់អ៊ំស្រីបង្កើតរបស់ក្មេងស្រីរងគ្រោះ។
លោក យិន ស្រាង អ្នកនាំពាក្យសាលាដំបូងខេត្តសៀមរាបប្រាប់នៅថ្ងៃនេះថា ជនសង្ស័យឈ្មោះ លាក់ លាង អាយុ ៥២ ឆ្នាំ ។រីឯក្មេងស្រីរងគ្រោះឈ្មោះ ទ.ប អាយុ ៤ ឆ្នាំ រស់នៅជាមួយជនសង្ស័យក្នុងសង្កាត់-ក្រុង-ខេត្តសៀមរាប។
លោកថ្លែងថា៖ «ជនសង្ស័យត្រូវតំណាងអយ្យការចោទបទរួមភេទជាមួយអនីតិជនក្រោមអាយុ ១៥ ឆ្នាំ មាត្រា ៤២ ច្បាប់ស្តីពីការបង្ក្រាបអំពើជួញដូរមនុស្ស និងបញ្ជូនដីកាដំណោះស្រាយទៅចៅក្រមស៊ើបសួរ។ រឿងនេះលោកស្រី លិ ស៊ីវទាន ចៅក្រមស៊ើបសួរសម្រេចចេញដីកាឃុំខ្លួននៅពន្ធនាគារខេត្តហើយ»។
យោងមាត្រា ៤២ នៃច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទនេះ ប្រសិនបើតុលាការរកឃើញថាបានប្រព្រឹត្តដូចការចោទមែននោះ ជនសង្ស័យពិតត្រូវប្រឈមនឹងការផ្តន្ទាទោសដាក់ពន្ធនាគារពី ៥ ទៅ ១០ ឆ្នាំ។
លោកស្រី ដួង ថាវរី ស្នងការរងនគរបាលខេត្តសៀមរាបប្រាប់តាមសម្តីស្ត្រីជាម្តាយធំបង្កើតរបស់ក្មេងស្រីរងគ្រោះថា ក្មេងស្រីរងគ្រោះត្រូវឪពុកស្លាប់ចោល ហើយម្តាយនាងក៏បានទៅយកប្តីថ្មី។ ប៉ុន្តែដោយសារម្តាយនាងទៅរស់នៅតាមប្តីក្រោយ និងគ្មានអ្នកមើលថៃកូនក៏បានយកក្មេងរងគ្រោះទៅផ្ញើឱ្យរស់នៅជាមួយជនសង្ស័យ (ជាជីតាបង្កើតខាងម្ដាយ)។
លោកស្រីបន្តថា មុនថ្ងៃសមត្ថកិច្ចចាប់ជនសង្ស័យ គឺក្មេងស្រីរងគ្រោះបានប្រាប់អ៊ុំស្រីនាងថា លោកតាឈ្មោះ លាក់ លាង បានចាប់នាងរំលោភសេពសន្ថវៈក្នុងអំឡុងខែកុម្ភៈ កន្លងមក។ ក្រោយពីដឹងរឿងនេះស្ត្រីជាម្តាយធំក្មេងរងគ្រោះក៏បានទៅដាក់ពាក្យបណ្តឹងនៅការិយាល័យប្រឆាំងការជួញដូរមនុស្សរបស់លោកស្រីនៅថ្ងៃទី ៣ មេសា។
លោកស្រីបន្ថែមថា បន្ទាប់ពីទទួលបានបណ្តឹងភ្លាម លោកស្រីក៏បានឲ្យមន្ត្រីជំនាញចុះដល់លំនៅឋានជនសង្ស័យ និងបាននាំខ្លួនមកសួរនៅការិយាល័យប្រឆាំងការជួញដូរមនុស្សខេត្តសៀមរាប ហើយជនសង្ស័យបានសារភាពតែម្ដង។
បើតាមលោកស្រី ថាវរី «រឿងនេះមុននឹងសមត្ថកិច្ចខ្ញុំឃាត់ខ្លួនជនសង្ស័យ គឺយើងបានអង្កេតល្អិតល្អន់ណាស់។ យើងធ្វើការផ្ទៀងផ្ទាត់ចម្លើយក្មេងរងគ្រោះ និងចម្លើយជនសង្ស័យមានលក្ខណៈស៊ីចង្វាក់គ្នាទើបយើងឃាត់គាត់។ ដូច្នេះខ្ញុំមិនបាច់រៀបរាប់ថា ជនសង្ស័យរំលោភក្មេងប៉ុន្មានដងទេ»។
ទោះយ៉ាងណា លោកស្រី ថាវរី ប្រាប់ថា តាមចម្លើយរបស់ជនសង្ស័យថាគាត់ពិតជាបានចាប់ចៅបង្កើតរបស់គាត់រំលោភពិតប្រាកដមែនតែមិនបានច្រើនដងទេ ហើយគាត់រំលោភនាងក្នុងអំឡុងខែកុម្ភៈ កន្លងមកនេះទេ៕