.jpg)
មនុស្ស ៧ នាក់ ពាក់ព័ន្ធនឹងគ្រឿងញៀន ព្រមទាំងគ្រឿងញៀនមួយចំនួនដែលសមត្ថកិច្ចចាប់បាន។ GRK News
សៀមរាបៈ តុលាការខេត្តសៀមរាបបានសម្រេចឃុំខ្លួនមនុស្ស ៧ នាក់ ជាបណ្ដោះអាសន្ននៅក្នុងពន្ធនាគារខេត្តពាក់ព័ន្ធជួញដូរគ្រឿងញៀនប្រភេទមេតំហ្វេតាមីន ទម្ងន់ ៥៣,៧៧ ក្រាម ក្រោយពីពួកគេត្រូវបានចាប់ខ្លួនកាលពីដើមខែសីហា។
លោក យិន ស្រាង អ្នកនាំពាក្យសាលាដំបូងខេត្តសៀមរាប បានប្រាប់កាសែតភ្នំពេញប៉ុស្តិ៍ពីម្សិលមិញថា ការចោទប្រកាន់យ៉ាងណានោះ វាអាស្រ័យទៅនឹងការប្រព្រឹត្តរបស់ពួកគេម្នាក់ៗ តែទោះជាយ៉ាងណាវាស្ថិតនៅក្នុងច្បាប់នៃការត្រួតពិនិត្យគ្រឿងញៀន»។
លោក ខៀវ ចាន់តារា ប្រធានការិយាល័យប្រឆាំងបទល្មើសគ្រឿងញៀននៃបញ្ជាការដ្ឋានអាវុធហត្ថខេត្តសៀមរាប ប្រាប់ពីម្សិលមិញដែរថា ជនត្រូវចោទទាំង ៧ នាក់នោះ មាន ទី១-ឈ្មោះ សេង រស្មី ភេទប្រុស អាយុ ២៨ ឆ្នាំ,ទី២-ឈ្មោះ សំ ដារ៉ា ភេទប្រុស អាយុ ២៩ ឆ្នាំ,ទី៣-ឈ្មោះ ហឹង វិចិត្រ ភេទប្រុស អាយុ ២៤ ឆ្នាំ,ទី៤-ឈ្មោះ ជូន តុលា ភេទប្រុស អាយុ ១៧ ឆ្នាំ,ទី៥-ឈ្មោះ អុិត ប៉ូអុង ភេទប្រុស អាយុ ២៧ ឆ្នាំ, ទី៦-ឈ្មោះ កែវ វិសិដ្ឋ ភេទប្រុស អាយុ ២៦ ឆ្នាំ និងទី៧-ឈ្មោះ ដួង គីម ភេទប្រុស អាយុ ២០ ឆ្នាំ។
លោកប្រាប់ថា ករណីនេះ កម្លាំងអាវុធហត្ថរបស់លោកបានចុះធ្វើប្រតិបត្តិការកាលពីវេលាម៉ោង ១១ ថ្ងៃត្រង់ ថ្ងៃទី ១ ខែ សីហា ឆ្នាំ ២០១៩ នៅចំណុចភូមិតាវៀន សង្កាត់សាលាកំរើក ក្រុង-ខេត្តសៀមរាប។ ដោយកម្លាំងសមត្ថកិច្ចអាវុធហត្ថរបស់លោក ឃាត់ខ្លួនបានជនសង្ស័យចំនួន ៧ នាក់ ពាក់ព័ន្ធករណីចែកចាយ គ្រឿងញៀនដោយខុសច្បាប់។ ពាក់ព័ន្ធការចាប់ខ្លួនក្រុមជនសង្ស័យទាំងនេះ គឺកម្លំាងអាវុធហត្ថបានតាមដានមុខសញ្ញាជួញដូរគ្រឿងញៀននេះជាច្រើនថ្ងៃមកហើយរហូតបើកប្រតិបត្តិការបង្ក្រាបតែម្តង ។
លោក ចាន់តារា ប្រាប់ថា ក្នុងប្រតិបត្តិការនោះក្រុមជនសង្ស័យបានប្រើកាំភ្លើងខ្លីម៉ាក K54 ១ ដើម បាញ់មកលើកម្លាំងសមត្ថកិច្ច ប៉ុន្តែមិនមានសមត្ថកិច្ចណាម្នាក់ត្រូវរបួសទេ។ ក្រោយការចាប់ខ្លួនជនសង្ស័យម្នាក់ដែលជាមេខ្លោងជួញដូរគ្រឿងញៀននោះសមត្ថកិច្ច រឹបអូសរួមមានវត្ថុតាង ម្សៅក្រាម (ម៉ាទឹកកក) ចំនួន ១៤ កញ្ចប់ ស្មើទម្ងន់ ៥៣,៧៧ ក្រាម កាំភ្លើង K54 ចំនួន ១ ដើម មានគ្រាប់ ចំនួន ២៣ គ្រាប់, ទូរស័ព្ទ ៥ គ្រឿង សម្ភារសម្រាប់វេចខ្ចប់គ្រឿងញៀន និងជក់គ្រឿងញៀនមួយចំនួនទៀត។
លោក ចាន់តារា បានឲ្យដឹងទៀតថា៖ «ដំបូងឡើយសមត្ថកិច្ចរបស់យើងចាប់បានមេខ្លោងបានម្នាក់ដែលកំពុងលក់គ្រឿងញៀន ហើយយើងឲ្យជននោះនាំទៅចង្អុលប្រាប់បក្ខពួកគេទៀត តែនៅពេលនោះគេបាញ់តដៃមកលើសមត្ថកិច្ចរបស់យើង»៕
