.jpg)
ឃុំខ្លួនយុវជន ៣ នាក់ ពាក់ព័ន្ធនឹងករណីលួចខ្សែភ្លើងនៅតាមផ្លូវ។ រូបថត សហការី
សៀមរាបៈ តុលាការខេត្តសៀមរាបបានឃុំយុវជន ៣ នាក់ក្នុងពន្ធនាគារខេត្តកាលពីម្សិលមិញ បន្ទាប់ពីសមត្ថកិច្ចចាប់ខ្លួនពាក់ព័ន្ធករណីលួចខ្សែភ្លើងនៅតាមផ្លូវ កាលពីរំលងអធ្រាត្រឈានចូលថ្ងៃទី ២៧ មេសា នៅភូមិវត្តដំណាក់ សង្កាត់សាលាកំរើក ក្រុងសៀមរាប។
លោក ភឹង ចិន្តារ៉េត ស្នងការរងទទួលបន្ទុកផែនព្រហ្មទណ្ឌប្រាប់ភ្នំពេញប៉ុស្តិ៍នៅរសៀលថ្ងៃទី ២៩ មេសានេះថា ជនសង្ស័យទាំង ៣នាក់នេះ ឈ្មោះសេង ជល់ ភេទប្រុស អាយុ១៧ឆ្នាំ, ទី២-ឈ្មោះ ទេព ឆដា ភេទស្រី អាយុ១៧ឆ្នាំ និងឈ្មោះ ពេស បូរី ភេទ ប្រុស អាយុ២១ឆ្នាំ។ ពួកគេត្រូវបានចៅក្រមស៊ើបសួរចេញដីកាឃុំក្នុងពន្ធនាគារហើយកាលពីរសៀលថ្ងៃទី២៨ មេសា។
លោកបានបញ្ជាក់ថា៖ «ជនប្រុសស្រីទាំង ៣ នាក់នោះត្រូវតុលាការចោទបទអំពើលួចមានស្ថានទម្ងន់ទោស លួចដោយសហចារី»។
លោកបានរំឭកប្រាប់ថា កាលពីព្រឹកថ្ងៃទី ២៧ មេសា ក្រោយពីមានការរាយការណ៍ពីតំណាង អគ្គិសនីខេត្តសៀមរាប ឈ្មោះ យាវ វុទ្ធី ភេទប្រុស អាយុ ៤៨ឆ្នាំ កម្លាំងសមត្ថកិច្ចរបស់លោកក៏បានស្រាវជ្រាវ និង ឃាត់ខ្លួនពួកគេបានតែម្តង។
ចំណែកវត្ថុតាងដែលរកឃើញរួមមាន ស្ពាន់ខ្សែភ្លើង ចំនួន ៨ កំណាត់, សម្បកជ័រខ្សែភ្លើងចំនួន ៦ដុំ ,កាំបិតចិតបន្លែ ចំនួន ១២ដើម , កាំបិតប៉័ងតោ ចំនួន៣, ដាវ កែច្នៃ ចំនួន៣ដើម , កាំបិតព្រា ចំនួន២ដើម , ញញួរ ចំនួន២ដើម , កន្ត្រៃ ចំនួន៣។ ជាមួយនេះ ជនសង្ស័យទាំង ៣នាក់ ក៏ត្រូវបានធ្វើតេស្តរកឃើញមានសារធាតុញៀនក្នុងខ្លួនផងដែរ។
លោកបានឱ្យដឹងដែរថា ចាប់ពីដើមឆ្នាំ ២០២១ រហូតដល់ខែមេសានេះ រាល់បទល្មើសលួចឆក់មានការថយចុះស្ទើរតែគ្មាន នៅក្នុងខេត្តសៀមរាប ពិសេសក្នុងក្រុង។ នេះដោយសារអាជ្ញាធរគ្រប់លំដាប់ថ្នាក់នៅក្នុងមូលដ្ឋានរួមទាំងកម្លាំងសមត្ថកិច្ចផងបានសហការគ្នាល្អ៕
