ស្វាយរៀងៈ អយ្យការអមសាលាដំបូងបន្តសាកសួរស្ត្រីវៀតណាមម្នាក់ និងបុរសចិនម្នាក់កាលពីម្សិលមិញពាក់ព័ន្ធការជួញដូរគ្រឿងញៀនមេតំហ្វេតាមីន និង អិចស្តាស៊ីជាង ១ គីឡូក្រាមក្រោយចាប់ខ្លួនបន្តគ្នាកាលពីថ្ងៃទី ២ ខែមករា នៅប្រទេសវៀតណាម និងនៅក្រុងបាវិត ខេត្តស្វាយរៀង។
លោក ទេព ផល្លា អ្នកនាំពាក្យសាលាដំបូងខេត្តស្វាយរៀងបានថ្លែងឲ្យដឹងកាលពីម្សិលមិញថា ករណីស្ត្រីវៀតណាមឈ្មោះ Nguyen thingoc bich អាយុ ២៥ ឆ្នាំ និងបុរសជនជាតិចិនឈ្មោះ Wendusu អាយុ ២៥ ឆ្នាំត្រូវអយ្យការអមសាលាដំបូងខេត្ត ស្វាយរៀងកំពុងបន្តសាកសួរនៅឡើយ។
លោកថ្លែងប្រាប់ថា៖ «ជនប្រុស ស្រីទាំង ២ នាក់នោះ តុលាការកំពុងបន្តនីតិវិធីសាកសួរពួកគេនៅមិនទាន់ចប់ទេ»។
លោក កេន កាន ប្រធានការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តស្វាយរៀងបានឲ្យដឹងកាលពីម្សិលមិញដោយយោងតាមសម្តីនគរបាលវៀតណាមថាកាលពីថ្ងៃទី ១ ខែមករា ឆ្នាំ ២០២០ ស្ត្រីវៀតណាមឈ្មោះ Nguyen thingoc bich ត្រូវបានអាជ្ញាធរនៃប្រទេសវៀតណាមចាប់ខ្លួនបានពេលគាត់ជិះម៉ូតូធ្វើដំណើរតាមផ្លូវ ដឹកគ្រឿងញៀន ឆ្លងដែនពីច្រកទ្វារអន្តរជាតិបាវិតចូលទៅប្រទេសវៀតណាម។ ដោយមានការសង្ស័យសមត្ថកិច្ចវៀតណាមបានបញ្ឈប់ការធ្វើដំណើររបស់ស្ត្រីជនជាតិវៀតណាមម្នាក់នោះឲ្យឈប់ហើយឆែកក្នុងកញ្ចប់អីវ៉ាន់ឃើញលាក់គ្រាប់ថ្នាំញៀនប្រភេទអិចស្តាស៊ីចំនួន ១ គីឡូ ២ ខាំ។
លោក កេន កាន បានថ្លែងថា ក្រោយចាប់ខ្លួនស្ត្រីជនជាតិវៀតណាមម្នាក់នោះបានឆ្លើយប្រាប់សមត្ថកិច្ចវៀតណាមថា គាត់មានបក្ខពួកម្នាក់ទៀតជាជនជាតិចិន ហើយកំពុងលាក់ខ្លួននៅក្រុងបាវិត ខេត្តស្វាយរៀងប្រទេសកម្ពុជា។ ភ្លាមៗនោះខាងសមត្ថកិច្ចវៀតណាមបានទំនាក់ទំនងមកសមត្ថកិច្ចខេត្តស្វាយរៀង ហើយសមត្ថកិច្ចរបស់លោកបានស្រាវជ្រាវតាមការចង្អុលប្រាប់ពីសមត្ថកិច្ចវៀតណាមរហូតចាប់បានជនសង្ស័យជាជនជាតិចិនម្នាក់ទៀតឈ្មោះ Wendusu ក្នុងបន្ទប់ជួលមួយស្ថិតនៅភូមិបាវិតកណ្តាល សង្កាត់-ក្រុងបាវិត ខេត្តស្វាយរៀង។ ដោយសារតែស្ត្រីសង្ស័យមានបក្ខពួកនៅប្រទេសកម្ពុជា ហើយក៏នាំគ្រឿងញៀនពីប្រទេសកម្ពុជាផងនោះត្រូវខាងភាគី វៀតណាមបានប្រគល់ស្ត្រីសង្ស័យ និងវត្ថុតាងថ្នាំញៀនដល់សមត្ថកិច្ចរបស់លោកដើម្បីចាត់ការបន្តតាមច្បាប់នៃប្រទេសកម្ពុជា។
លោក កាន បានថ្លែងឲ្យដឹងទៀតថា ស្ត្រីវៀតណាមរូបនោះត្រូវសមត្ថកិច្ចវៀតណាមចាប់ខ្លួននៅខេត្តតាយនិញប្រមាណ ២ គីឡូម៉ែត្រពីច្រកព្រំដែនបាវិតហើយគាត់បានឆ្លើយប្រាប់សមត្ថកិច្ចលោកថា គ្រឿងញៀន និង សារធាតុផ្សំគ្រឿងញៀនគឺគាត់ និង បុរសជនជាតិចិនម្នាក់នោះនាំពីរាជធានីភ្នំពេញ និងមានគោលបំណងយកទៅប្រទេសវៀតណាមដើម្បីចែកចាយបន្តទៀត។
លោកថ្លែងថា៖ «ពួកជនសង្ស័យបានជួញដូរថ្នាំញៀនហើយនាំទៅប្រទេសវៀតណាម»។
លោកបានថ្លែងបន្តទៀតថា ក្រោយចាប់ខ្លួនបុរសជនជាតិចិនខាងលើសមត្ថកិច្ចរឹបអូសបានម្សៅក្រាមពណ៌ថ្លា និងម្សៅក្រាមពណ៌ស ប្រភេទមេតំហ្វេតាមីនទម្ងន់ប្រមាណជិត ១ គីឡូក្រាម, ម្សៅក្រាមពណ៌ផ្កាឈូក សង្ស័យជាថ្នាំញៀនប្រភេទ MDMA (អិចស្តាស៊ី) ទម្ងន់ប្រមាណជាង ១៣១ ក្រាម, ម្សៅថ្នាំគ្រាប់ពណ៌ផ្កាឈូក សង្ស័យជាថ្នាំញៀនមេតំហ្វេតាមីនចំនួន ៤០០ គ្រាប់ ទម្ងន់ប្រមាណជាង ១០២ ក្រាម, ម្សៅក្រាមពណ៌សថ្លាចំនួន ១ កញ្ចប់ ទម្ងន់ប្រមាណជាង ៦ ក្រាម, ទឹកអាកុលចំនួន ៣ ដប, សារធាតុគីមីផ្សំ (ទឹកថ្នាំដប) ចំនួន ៧ (ធំ ១)ដប និងសម្ភារប្រើប្រាស់វេចខ្ចប់ថ្នាំញៀនមួយចំនួនទៀត៕