The Phnom Penh Post Search

Search form




Logo of Phnom Penh Post newspaper Phnom Penh Post - តុលាការ​គ្រោង​កោះហៅ​មន្ត្រីនគរបាល​ព្រំដែន​ម្នាក់​ សាកសួរពាក់ព័ន្ធ​បណ្តឹង​រំលោភ​ផ្លូវភេទ




តុលាការ​គ្រោង​កោះហៅ​មន្ត្រីនគរបាល​ព្រំដែន​ម្នាក់​ សាកសួរពាក់ព័ន្ធ​បណ្តឹង​រំលោភ​ផ្លូវភេទ

Content image - Phnom Penh Post
មន្ត្រីនគរបាល​ព្រំដែន​ដែល​រង​ការ​ចោទរំលោភ​ផ្លូវភេទ​ក្មេងស្រី​នៅ​ខេត្តរតនគិរី​។ រូប FB

តុលាការ​គ្រោង​កោះហៅ​មន្ត្រីនគរបាល​ព្រំដែន​ម្នាក់​ សាកសួរពាក់ព័ន្ធ​បណ្តឹង​រំលោភ​ផ្លូវភេទ

រតនគិរីៈ តុលាការ​គ្រោង​កោះហៅ​នាយ​នគរបាល​ប៉ុស្តិ៍​ការពារ​ព្រំដែន​ម្នាក់ ប្រចាំ​ប៉ុស្តិ៍​ភូមិ​ភិៈ ឃុំ​សេសាន ស្រុក​អូរយ៉ាដាវ មក​សាកសួរ​នា​សប្តាហ៍​ក្រោយ ជុំវិញ​សំណុំរឿង​ចោទប្រកាន់​ពី​បទ​រំលោភ​សេពសន្ថវៈ​លើ​អនីតិជន​ក្រោម​អាយុ​ ១៥ ​ឆ្នាំ​។ នេះ​បើតាម​មន្ត្រី​នាំពាក្យ​តុលាការខេត្ត​រតនគិរី​កាលពី​ថ្ងៃទី​ ១២ មករា​។

លោក​ កែវ ពិសុទ្ធ អ្នកនាំពាក្យ​តុលាការខេត្ត​រតនគិរី ប្រាប់​ ភ្នំពេញ​ ប៉ុស្តិ៍​ នៅ​ថ្ងៃ​ចន្ទ​ថា យោងតាម​សំណុំ​រឿង​ដែល​ត្រូវបាន​កម្លាំង​នគរបាល​ការិយាល័យ​បង្ក្រាប​ការជួញដូរ​មនុស្ស និង​ការពារ​អនីតិជន​នៃ​ស្នងការដ្ឋាន​នគរបាល​ខេត្តរតនគិរី បញ្ជូន​មក​ដល់ដៃ​តុលាការ​កាលពី​ថ្ងៃទី​ ៦ មករា​ ជនជាប់ចោទ​មាន​ឈ្មោះ​ ទួន មេសា មាន​តួនាទី​នាយ​នគរបាល​ប៉ុស្តិ៍​ភូមិ​ភិៈ​។

តាម​ការរៀបរាប់​នៅក្នុង​ពាក្យបណ្ដឹង​របស់​កុមារី​រងគ្រោះ​ចុះ​ថ្ងៃទី​​ ១ ខែ ធ្នូ ឆ្នាំ​ ២០២០ គឺ​ជន​ជាប់ចោទ​នៅ​ព្រលប់​ថ្ងៃទី​ ៣០ វិច្ឆិកា ឆ្នាំ​ ២០២០ បាន​ទូរស័ព្ទ​បបួល​នាង​ទៅ​ញ៉ាំ​អាហារ​ពេល​ល្ងាច​នៅ​ហាង​ម្លិៈ​ ៧៧​។ នៅពេលនោះ​នាង និង​ម្ដាយមីង​របស់​នាង​ឈ្មោះ ស្រី នាង ក៏បាន​ជិះ​ម៉ូតូឌុប​គ្នា​ទៅ​ហាង​នោះ​តាម​ការណាត់​។

លុះ​ដល់​ម៉ោងជាង ៩ ​យប់​ ក្រោយពី​បរិភោគ​អាហារ​ពេលល្ងាច​រួច ជនជាប់ចោទ​ក៏​បបួល​កុមារី​រងគ្រោះ​ទៅ​ហូប​បង្អែម ដោយ​ប្រាប់​ស្ត្រី​ជា​ម្ដាយមីង​ឱ្យ​ជិះ​ម៉ូតូ​ត្រឡប់​ផ្ទះ​មុន ដោយ​ធានា​ដឹក​ក្មេងស្រី​រងគ្រោះ​ទៅផ្ទះ​វិញ​ដោយ​សុវត្ថិភាព​។ ប៉ុន្តែ​ជន​ជាប់ចោទ​មិនបាន​ដឹក​ក្មេងរងគ្រោះ​ទៅ​ហូប​បង្អែម​នោះឡើយ​បែរ​ជា​ដឹក​ក្មេងស្រី​រងគ្រោះ​ទៅកាន់​ផ្ទះសំណាក់​ ១ ​កន្លែង​នៅ​ក្រុង​បានលុង ហើយ​ធ្វើ​សកម្មភាព​លួងលោម​ក្មេងស្រី​រងគ្រោះ ដើម្បី​រួមភេទ​រហូត​បានសម្រេច​តែម្តង​។

លោក​ ពិសុទ្ធ ​ថ្លែង​ថា​៖ «​នៅពេលនេះ តំណាង​អយ្យការ​អម​សាលាដំបូង​ខេត្តរតនគិរី កំពុង​ត្រួតពិនិត្យ និង​គ្រោង​កោះហៅ​ជនជាប់ចោទ​ឱ្យ​ចូលមក​ឆ្លើយ​បំភ្លឺ​ជុំវិញ​បទចោទប្រកាន់​របស់​កុមារី​រងគ្រោះ​»​។ ប៉ុន្តែ​លោក​មិនបាន​បញ្ជាក់​ពី​ពេលវេលា​ច្បាស់លាស់​ក្នុង​ការកោះហៅ​ជន​ជាប់ចោទ​នោះទេ ដោយ​គ្រាន់តែ​បង្ហើប​ថា អាច​កោះហៅ​មក​សួរ នា​សប្តាហ៍​ក្រោយ​។

ទោះ​យ៉ាងណា​កាលពី​ម្សិលមិញ​លោក​ ទួន មេសា បាន​បដិសេធ​ចំពោះ​ការចោទប្រកាន់​នេះ ហើយ​លោក​បាន​ប្រាប់ ​ភ្នំពេញ​ ប៉ុស្តិ៍​ ថា នៅពេល​នេះ​លោក​កំពុង​ជាប់​បំពេញការងារ​ការពារ​សន្តិសុខ​សុវត្ថិភាព តាម​ជួរ​បន្ទាត់​ព្រំដែន​កម្ពុជា-វៀតណាម គ្មាន​ពេល​ចាប់​អារម្មណ៍​ចំពោះ​បណ្ដឹង​ចោទប្រកាន់​នេះ​ទេ​។

លោក​ថ្លែងថា​៖ «​ខ្ញុំ​គ្មាន​បារម្ភ​អ្វី​នោះទេ​ចំពោះ​ករណីនេះ ព្រោះ​ខ្ញុំ​មិនបាន​ប្រព្រឹត្ត​។ ខ្ញុំ​នឹង​ចូលទៅ​ឆ្លើយបំភ្លឺ​ចំពោះមុខ​តុលាការ ប្រសិនបើ​តុលាការ​ចេញ​ដីកា​កោះហៅ​រូបខ្ញុំ​»​។

ប៉ុន្តែ​បើតាម​មន្ត្រី​នគរបាល​មូលដ្ឋាន​ម្នាក់ ដែល​ស្នើសុំ​មិន​បញ្ចេញ​ឈ្មោះ​បាន​ប្រាប់​ភ្នំពេញ​ប៉ុស្តិ៍​នៅ​ថ្ងៃ​ចន្ទ​ថា ករណីនេះ​គឺជា​ការពិត​។ ព្រោះ​ក្រោយពី​កើតមាន​ករណី​ប្ដឹង​ចោទប្រកាន់​ពី​ក្មេងស្រី​រងគ្រោះ​មាន​មន្ត្រីនគរបាល​ជាន់ខ្ពស់​ម្នាក់​បាន​ចេញ​មុខ​ជួយ​សម្របសម្រួល រក​ដំណោះស្រាយ​ក្រៅ​ប្រព័ន្ធតុលាការ ដើម្បី​ជួយ​ដល់​ភាគី​ជនជាប់ចោទ​ដែល​ជា​មន្ត្រី​នគរបាល​ដូចគ្នា​។

ក្នុង​ការសម្របសម្រួល​នោះ ភាគី​ជនជាប់ចោទ​បាន​សម្រេច​ផ្ដល់​សំណង​ជំងឺ​ចិត្ត​ចំនួន​ ៦ ​លាន​រៀល​ដល់​ក្រុមគ្រួសារ​កុមារី​រងគ្រោះ ដើម្បី​បញ្ចប់​បញ្ហា​។ ក្រោយពី​ទទួល​លុយ​ពី​ភាគី​ជនជាប់ចោទ កុមារី​រងគ្រោះ​បាន​សម្រេច​ចិត្ត​ទៅ​ស្នើសុំ​ដក​ពាក្យបណ្ដឹង​ពី​មន្ត្រី​នគរបាល​ជំនាញ​វិញ ដោយ​អះអាង​ថា ដើម្បី​ការពារ​កិត្តិយស និង​សេចក្ដី​ថ្លៃថ្នូរ​ក្នុង​គ្រួសារ​របស់​នាង​។

ជាមួយ​គ្នា​នេះ​លោកស្រី​កែវ ដាវី ស្នងការរង​ទទួល​បន្ទុក​ផ្នែកបង្ក្រាប​ការជួញដូរ​មនុស្ស និង ការពារ​អនីតិជន​នៃ​ស្នងការដ្ឋាន​នគរបាល​ខេត្តរតនគិរី បាន​ប្រាប់ ​ភ្នំពេញ ​ប៉ុស្តិ៍​ ថា កុមារី​រងគ្រោះ​បាន​ព្យាយាម​មកសុំ​ដក​ពាក្យបណ្ដឹង​វិញ​ចំនួន​ ៣ ​លើក ប៉ុន្តែ​មិនបាន​ប្រាប់​ពី​មូលហេតុ​នោះទេ​។

លោកស្រី​បញ្ជាក់ថា​៖ «​យើង​មិនដឹង​ពី​មូលហេតុ​ដែលនាំឱ្យ​នាង​មក​ទទូច​សុំ​ដក​ពាក្យបណ្ដឹង​វិញ​នោះទេ​។ យើង​បាន​បញ្ជូន​សំណុំ​រឿង​ទៅកាន់​អយ្យការ ដើម្បី​ចំណាត់ការ​បន្ត​តាម​នីតិវិធី​រួចហើយ​»​។

ករណី​នេះ​លោក​ យិន ចំណាន ស្នងការ​ខេត្តរតនគិរី​ប្រាប់ ​ភ្នំពេញ ប៉ុស្តិ៍ ​ថា​៖ «​ឥឡូវនេះ​សំណុំរឿង​ដល់​ដៃ​តុលាការ​ហើយ​។ រឿងហេតុ​យ៉ាងណា​នោះ ទុក​ឱ្យ​តុលាការ​ជា​អ្នកដោះស្រាយ​ចុះ ព្រោះ​វា​ហួស​ដែន​សមត្ថកិច្ច​របស់ខ្ញុំ​ហើយ​»៕

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ