The Phnom Penh Post Search

Search form




Logo of Phnom Penh Post newspaper Phnom Penh Post - តុលាការ​គ្រោង​ជំនុំ​ជម្រះ​សំណុំ​រឿង​ឪពុកម្តាយ​លោក ថោង សារ៉ាត់​

តុលាការ​គ្រោង​ជំនុំ​ជម្រះ​សំណុំ​រឿង​ឪពុកម្តាយ​លោក ថោង សារ៉ាត់​

Content image - Phnom Penh Post
ឪពុក​ម្តាយ​​ ​ថោង សារ៉ាត់​ ពេល​នាំ​​​​ខ្លួន​ទៅតុលាការ​។ ហេង ជីវ័ន

តុលាការ​គ្រោង​ជំនុំ​ជម្រះ​សំណុំ​រឿង​ឪពុកម្តាយ​លោក ថោង សារ៉ាត់​

ភ្នំពេញៈ សាលា​ដំបូង​រាជធានី​ភ្នំពេញ គ្រោង​បើក​សវនាការ​ជំនុំ​ជម្រះ​លើ​សំណុំ​រឿង​ឪពុក​ម្តាយ​លោក​ ថោង សារ៉ាត់ នៅ​ថ្ងៃ​ទី​៣ ខែ​មេសា​ខាង​មុខ​នេះ ក្រោម​ការ​ចោទពី​បទកាន់​កាប់​អាវុធ​ខុស​ច្បាប់​ ខណៈ​មន្រ្តី​ក្រសួង​យុត្តិធម៌​បង្ហើប​ឲ្យ​ដឹង​ថា ​អធិការ​កិច្ច​លើ​ភាព​មិន​ប្រក្រតី​នៃ​សំណុំ​រឿង​នៅ​ក្រៅ​ឃុំ​របស់​ជន​ជាប់​ចោទ​ទាំង​ពីរ​ មាន​លទ្ធផល​ខ្លះ​ហើយ។

ឪពុក​ម្ដាយ​ឧកញ៉ា ថោង សារ៉ាត់ មាន​លោក ថោង ចំរើន អាយុ​​ ៦៣ ​ឆ្នាំ និងអ្នក​ស្រី​ កែវ សារី អាយុ​​ ៥៥ ​ឆ្នាំ ត្រូវ​បាន​តុលាការ​រាជធានី​សម្រេច​ចោទ​ប្រកាន់ កាលពី​ថ្ងៃទី​០៧ ខែធ្នូ ឆ្នាំ​២០១៤ ក្រោម​​ការ​ចោទ​ពី​បទ​កាន់​កាប់​អាវុធ​ខុស​ច្បាប់ តាម​មាត្រា​ ៤៩០ នៃ​ក្រម​ព្រហ្ម​ទណ្ឌ​ ពាក់​ព័ន្ធ​នឹង​ការ​រក្សា​ទុក​នូវ​អាវុធ​វែង​ខ្លី​ ១១​ដើម ​ដែល​សមត្ថកិច្ច​រឹប​អូស​បាន​ពី​ភូមិ​គ្រឹះ​ឧកញ៉ា ថោង សារ៉ាត់ ជា​ទី​ស្នាក់​នៅ​​អចិន្រៃ្តយ៍​របស់​ជន​ជាប់​ចោទ​។

ចៅក្រម​ជំនុំជម្រះ លោក ឃី ឆៃ ​ប្រាប់​ភ្នំពេញ​ប៉ុស្តិ៍​ពី​ម្សិលមិញ​ថា សវនាការ​នេះ​នឹង​មាន​លោក វង្ស ប៊ុន​វិសុទ្ធ ជា​តំណាង​អយ្យការ និង​មាន​មេធាវី​ការពារ​ជន​ជាប់​ចោទ​ចូល​រួម​ផងដែរ។

លោក​ថា៖ «យើង​នឹង​បើក​សវនាការ​រឿង​ក្តី​របស់​ជន​ជាប់​ចោទ​ទាំង​ពីរ​នៅ​ថ្ងៃ​ទី ៣ ខែ​មេសា ​ពេលព្រឹក​ លើ​រឿង​កាន់​កាប់​​អាវុធ​​ខុស​ច្បាប់​នោះ»។

មេធាវី​ការពារ​ជន​ជាប់​ចោទ​ លោក​ ស៊ី សត្យា បាន​ឲ្យ​ដឹង​ថា​ លោក​មិន​ទាន់​ទទួល​បាន​ដីកា​កោះរ​បស់​ចៅក្រម​ទេ តែ​លោក នឹង​ពិនិត្យ​លើ​រឿង​នេះ។

លោក​ស្រី កែវ សារី និង​លោក ថោង ចំរើន​ ដែល​កំពុង​ជាប់​ឃុំ​នៅ​ពន្ធនាគារ​ព្រៃស ​រង​ការ​ចោទ​ពី​បទ​កាន់​កាប់​និង​រក្សា​អាវុធ​ដោយ​ខុស​ច្បាប់​ ធ្លាប់​ត្រូវ​បាន​ដោះ​លែង​នៅ​ក្រៅ​ឃុំ​ម្តង​ ពី​ថ្ងៃ​ទី​ ៧ ​ ខែ​កុម្ភៈ​ តែ​ក្រោយ​មក អ្នក​ទាំង​ពីរ​ត្រូវ​​សមត្ថកិច្ច​ឃាត់​ខ្លួននៅ​ម៉ោង ១០​យប់​ ថ្ងៃ​​ទី​​ ១៥ ​ ខែ​កុម្ភៈ ខណៈ​​បាន​ព្យាយាម​ធ្វើ​​ដំណើរ​បម្រុង​​ឆ្លង​ដែន​ទៅ​ព្យាបាល​ជំងឺ​នៅ​ប្រទេស​វៀតណាម និង​ត្រូវ​លោក​ចៅក្រម​ លី ​សុខ​លេង​ សម្រេច​បញ្ជូន​មក​ឃុំ​នៅ​ពន្ធនាគារ​នៅ​ថ្ងៃ​បន្ទាប់។

ក្រោយ​មក​នៅ​ថ្ងៃ​ទី​១៧​ ខែ​កុម្ភៈ​ លោក​នាយក​រដ្ឋ​មន្រ្តី ​ហ៊ុន សែន ​បាន​ប្រកាស​ស្នើ​ជា​សាធារណៈ​ទៅ​កាន់​ឧត្តម​ក្រុម​ប្រឹក្សា​នៃ​អង្គ​ចៅក្រម ត្រួត​ពិនិត្យ​លើ​សេចក្តី​សម្រេច​របស់​ចៅ​ក្រម លី សុខ​លេង ដែល​ដាក់​ឲ្យ​ឪពុក​ម្តាយ​លោក​ឧកញ៉ា ​ថោង សា​រ៉ាត់ នៅ​​ក្រៅ​ឃុំ​កាល​ពី​ថ្ងៃ​ទី​ ៧​ មករា​ ដោយ​ហៅ​សេចក្តី​សម្រេច​នោះ​ថា​ មិន​មាន​មូល​ហេតុ​សមរម្យ​ បើ​ធៀប​នឹង​បទ​ល្មើស​តូច​តាច​ផ្សេង​ទៀត ហើយ​លោក ក៏​ស្នើ​ឲ្យ​មាន​ការ​ស៊ើប​អង្កេត​លើ​ករណី​ពុក​រលួយ​នៅ​ក្នុង​ស្ថាប័ន​តុលា​ការ​មួយ​នេះ​ផង​ដែរ​។

នា​ថ្ងៃ​ដដែលនោះ ឧត្តម​ក្រុម​ប្រឹក្សា​នៃ​អង្គចៅក្រម​បាន​បើក​កិច្ចប្រជុំ​បន្ទាន់​មួយ សម្រេច​ផ្ទេរ​ភារកិច្ច​លោក អាំង មាលតី ពី​ប្រធាន​សាលា​ដំបូង​រាជ​ធានី​មក​បញ្ឈរ​ជើង​នៅ​ក្រសួង​យុត្តិធម៌​ ដើម្បី​រង់​ចាំ​ការ​ស៊ើប​អង្កេត។

ចំណែក​ក្រសួង​យុត្តិធម៌ក៏​បាន​ចាត់​តាំង​ក្រុម​អធិការ​កិច្ច​ឡើង ដើម្បី​ស៊ើប​អង្កេត​លើ​ភាព​មិន​ប្រក្រតី​ទាំង​នេះ។ ក្នុង​នោះ​ ក៏​បាន​សម្រេច​តែង​តាំង​លោក តាំង ស៊ុន​ឡាយ ពី​អនុ​ប្រធាន ឲ្យ​ឡើង​ជា​ប្រធាន​សាលា​ដំបូង​រាជធានី​នៅ​ថ្ងៃ​ទី​ ១៨ ខែ​កុម្ភៈ។

អ្នក​នាំ​ពាក្យ​ក្រសួង​យុត្តិ​ធម៌ លោក ជិន​ ម៉ាលីន បាន​ឲ្យ​ដឹង​​ពី​ម្សិល​មិញ​​ថា ​រហូត​មក​ទល់​ពេល​នេះ​ ក្រុម​អធិការ​​កិច្ច​ចាត់​តាំងបាន​រក​ឃើញ​នូវ​លទ្ធ​ផល​វិជ្ជ​មាន​មួយ​ចំនួន​ដើម្បី​ឈាន​ទៅ​ដល់​ការ​ចាប់​ខ្លួន​ជន​ពាក់​ព័ន្ធ​ផ្សេងៗ​ទៀត។

លោក​ថា៖ «ក្រុម​ការ​ងារបាន​រក​ឃើញ​នូវ​លទ្ធ-​ផល​ខ្លះ​ហើយ តែ​មិន​អាច​ផ្សព្វផ្សាយ​ជា​សាធារណៈ​បាន​ទេ ដោយ​សារ​ស្ថិត​ក្នុង​ការ​ស៊ើប​អង្កេត​នៅ​ឡើយ​»។

ក្រៅ​ពី​ចំណាត់​ការ​អធិការ​កិច្ច​របស់​ក្រសួង​យុត្តិ​ធម៌​ អង្គ​ភាព​ប្រឆាំង​អំពើ​ពុក​រលួយ​ ក៏​បើក​ ការ​ស៊ើប​អង្កេត​លើ​សំណុំ​រឿង​​ឪពុក​ម្តាយ​លោក ថោង សារ៉ាត់ និង​លើ​អតីត​ប្រធាន​សាលា​ដំបូង​លោក​ អាំង មាល​តី ផង​ដែរ​ តែ​មក​ទល់​ពេល​នេះ​ព័ត៌​មាន​ជា​លទ្ធ​ផល​​ផ្លូវ​ការ ​មិន​ទាន់​​បាន​បង្ហាញ​​នៅ​ឡើយ​ទេ៕​

អត្ថបទគួរចាប់អារម្មណ៍