.jpg)
សមត្ថកិច្ចពិនិត្យការកាប់ទន្ទ្រានដីព្រៃអភិរក្ស។ រូបថត គេហទំព័រ សុខ ទូច
ព្រះវិហារ: សាលាដំបូងខេត្តព្រះវិហារគ្រោងប្រកាសសាលក្រមលើសំណុំរឿងចំនួន ៣ ក្នុងចំណោម ៤ ករណីផ្សេងៗគ្នាក្នុងខែធ្នូពាក់ព័ន្ធការរំលោភទន្ទ្រានដែនជម្រកសត្វព្រៃគូលែនព្រហ្មទេព ភ្នំត្នោត-ភ្នំពក ស្ថិតនៅស្រុកត្បែងមានជ័យ ស្រុកជាំក្សាន្ត ខេត្តព្រះវិហារកាលពីអំឡុងឆ្នាំ ២០១៩ ខណៈជនសង្ស័យចំនួន ៦ នាក់កំពុងត្រូវបានឃុំខ្លួននៅពន្ធនាគារខេត្ត។
លោកស្រី ជុំ កន្នីយ៉ា អ្នកនាំពាក្យសាលាដំបូងខេត្តព្រះវិហារបានថ្លែងពីម្សិលមិញថា ចៅក្រមស៊ើបសួរនៃសាលាដំបូងខេត្តព្រះវិហារ ជំនុំជម្រះលើសំណុំរឿងកាប់ព្រៃឈើ និងការឈូសឆាយរំលោភទន្ទ្រានយកដីព្រៃចំនួន ៣ ករណីផ្សេងៗគ្នាក្នុងចំណោម ៤ ករណីកាលពីថ្ងៃទី ៨ ខែធ្នូ ខណៈ ១ ករណីទៀតគ្រាន់តែសាកសួរអ្នកពាក់ព័ន្ធ ប៉ុន្ដែលោកស្រីមិនទាន់អាចបញ្ជាក់អំពីកាលបរិច្ឆេទនៃការប្រកាសសាលក្រមនៅឡើយ។
លោកស្រីបញ្ជាក់ថា៖ «ខ្ញុំមិនទាន់ដឹងច្បាស់ថា លោកចៅក្រមប្រកាសសាលក្រមនៅពេលណាទេ តែគ្រាន់តែដឹងថា លោក មាស ញឹម អនុប្រធានមន្ទីរបរិស្ថានគាត់ចូលរួមក្នុងសវនការហ្នឹងដែរ ព្រោះតុលាការអញ្ជើញគាត់មកក្នុងនាមមន្ត្រីនគរបាលយុត្តិធម៌។ បើសិនមានការប្រកាសមែន គឺប្រហែលជាប្រកាសក្នុងអំឡុងខែធ្នូនេះហើយ»។
លោក មាស ញឹម អនុប្រធានមន្ទីរបរិស្ថានខេត្តព្រះវិហារបានថ្លែងកាលពីថ្ងៃទី ៩ ខែធ្នូ ថាលោកបានចូលរួមសវនាការចំនួន ៤ ករណីក្នុងនោះចូលរួមបំភ្លឺ ១ ករណី និងចូលរួមជំនុំជម្រះចំនួន ៣ ករណី។
លោកបញ្ជាក់ថា សវនាការនេះពាក់ព័ន្ធការកាប់ព្រៃឈើដោយខុសច្បាប់នៅដែនជម្រកសត្វព្រៃគូលែនព្រហ្មទេព ការឈូសឆាយរំលោភទន្ទ្រានយកដីព្រៃនៅដែនជម្រកគូលែនព្រហ្មទេពចំនួន ៤ ហិកតា ការកាប់ទន្ទ្រានរានយកដីរដ្ឋដោយខុសច្បាប់នៅភ្នំត្នោត-ភ្នំពកសរុបចំនួន ៧០ ហិកតា និង ការប៉ុនប៉ងសម្លាប់លោក បេន ដេវីស (ជនបរទេស) នៅដែនជម្រកសត្វព្រៃភ្នំត្នោត។
លោកបន្តថា តុលាការបានសួរដេញដោលអំពីជនសង្ស័យចំនួន ៦ នាក់ ថា តើពួកគេពិតជាបានកាប់រានទន្ទ្រានដីព្រៃរបស់រដ្ឋប្រាកដមែនឬអត់? ដោយលោកបានឆ្លើយប្រាប់ទៅតុលាការតាមដំណើររឿងព្រមទាំងដាក់របាយការណ៍មួយចំនួនជូនទៅតុលាការ ដើម្បីឱ្យតុលាការពិនិត្យតាមនីតិវិធីច្បាប់។ ចំពោះសវនាការនេះ តុលាការគ្រោងប្រកាសសាលក្រមនៅថ្ងៃទី ១២ ចំនួន ១ ករណីនៅថ្ងៃទី ១៧ ចំនួន ១ ករណី និងនៅថ្ងៃទី ២៤ ចំនួន ១ ករណីនៅក្នុងខែធ្នូ ឆ្នាំ ២០២០។
លោកបានបញ្ជាក់ថា៖ «យើងប្ដឹងឱ្យរឹបអូសដីព្រៃរបស់រដ្ឋ ៤ ហិកតាស្ថិតនៅដែនជម្រកសត្វព្រៃគូលែនព្រហ្មទេពដែលជនសង្ស័យបានរំលោភទន្ទ្រានយក និងទាមទារឱ្យរឹបអូសដីព្រៃចំនួន ៧០ ហិកតានៅដែនជម្រកសត្វព្រៃភ្នំត្នោត-ភ្នំពកមកទុកជាសម្បត្តិរដ្ឋវិញ។ ជាពិសេសខ្ញុំទាមទារឱ្យតុលាការផ្តន្ទាទោសជនល្មើសតាមច្បាប់ដែលបានកំណត់ជាធរមាន»។
លោក មាស ញឹម បានថ្លែងឱ្យដឹងទៀតថា ជនសង្ស័យទាំង ៦ នាក់ បាននិងកំពុងជាប់ពន្ធនាគារ ដោយខ្លះជាប់ពន្ធនាគារកន្លះឆ្នាំ និងខ្លះ ១ ឆ្នាំក្នុងសំណុំរឿងផ្សេងៗគ្នា។ អ្នកពាក់ព័ន្ធនៅភ្នំត្នោត និងភ្នំពកចំនួន ៤ នាក់បានជាប់បទចោទ «ការកាប់ទន្ទ្រាន ឈូសឆាយដីព្រៃរបស់រដ្ឋដោយខុសច្បាប់ និងបទគំរាមសម្លាប់។ ចំណែក ២ នាក់ទៀតពាក់ព័ន្ធកាប់ព្រៃឈើ និងរំលោភដីព្រៃនៅដែនជម្រកសត្វព្រៃគូលែនព្រហ្មទេព។
លោក សេត ទេព តំណាងពលរដ្ឋចំនួន ១២ សហគមន៍ស្ថិតនៅក្នុងតំបន់ដែនជម្រកសត្វព្រៃគូលែនព្រហ្មទេព ស្រុកជាំក្សាន្ដបានថ្លែងកាលពីថ្ងៃទី ៩ ធ្នូថា កន្លងមកពិតជាមានករណីរំលោភទន្ទ្រានដីព្រៃដែនជម្រកសត្វព្រៃគូលែនព្រហ្មទេព និងរំលោភយកដីសមូហភាពរបស់សហគមន៍ជនជាតិដើមភាគតិចមែន។ ក្នុងនោះមានពលរដ្ឋចំនួន ៤ នាក់ត្រូវបានជាប់ពាក្យបណ្ដឹងនៅតុលាការ និងកំពុងត្រូវបានឃុំខ្លួននៅពន្ធនាគារផងដែរ។
លោកបញ្ជាក់ថា៖ «កន្លងមកធ្លាប់មានច្រើន បញ្ហារំលោភយកដីព្រៃហ្នឹង ប៉ុន្ដែអ្នកដែលរំលោភយកដីទាំងអស់ត្រូវបានមន្ត្រីបរិស្ថានប្ដឹងទៅតុលាការ ហើយខ្លះទៀតត្រូវបានធ្វើកិច្ចសន្យាបញ្ឈប់សកម្មភាព និងខ្លះទៀតត្រូវបានអប់រំណែនាំជាបន្តបន្ទាប់។ ចំពោះបច្ចុប្បន្ននេះគឺមិនមានអ្នករំលោភយកដីទៀតទេ ហើយបទល្មើសកាប់ឈើក៏មិនសូវមានដែរ ឥឡូវនេះហាក់ដូចជាស្ងាត់បទល្មើស»។
លោក សេត ទេព ជំរុញឱ្យអាជ្ញាធរ និងមន្ត្រីជំនាញយកចិត្តទុកដាក់បន្ថែមទៀត បើទោះបីជាបទល្មើសស្ងប់ស្ងាត់នៅតំបន់ដែនជម្រកសត្វព្រៃគូលែនព្រហ្មទេព និងដែនជម្រកសត្វព្រៃភ្នំត្នោត-ភ្នំពកក៏ដោយ ព្រោះជនល្មើសមួយចំនួនកំពុងតាមដានការអនុវត្តច្បាប់របស់មន្ត្រី។ ប្រសិនជាសមត្ថកិច្ចមានការអនុវត្តច្បាប់ធូររលុង ក្រុមជនល្មើសនឹងធ្វើសកម្មភាពបន្តទៀត៕
