បាត់ដំបងៈ ចៅក្រមស៊ើបសួរនៃសាលាដំបូងខេត្តបាត់ដំបងចេញដីកាឃុំខ្លួនក្រុមក្មេងប្រុសទំនើង ១៥ នាក់ ដាក់ពន្ធនាគារខេត្តពាក់ព័ន្ធបង្កហិង្សាវាយតប់គ្នាតាមផ្លូវសាធារណៈ ប្រព្រឹត្តនៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង កាលពីថ្ងៃទី ១៣ មីនា។
លោកស្រី ជា ចាន់រស្មី អ្នកនាំពាក្យសាលាដំបូងខេត្តបាត់ដំបងឱ្យដឹងពីម្សិលមិញថាក្រុមក្មេងទាំង ១៥ នាក់ ត្រូវបានលោកចៅក្រមស៊ើបសួរ គី ទីម៉េង សម្រេចចេញដីកាឃុំ បណ្តោះអាសន្នក្នុងពន្ធនាគារខេត្ត បាត់ដំបងកាលពីថ្ងៃទី ១៥ មីនា ពាក់ព័ន្ធបង្កហិង្សាវាយគ្នា។
លោកស្រីថា៖ «ជនទាំង ១៥ នាក់នោះ ត្រូវបានព្រះរាជអាជ្ញាចោទពីបទធ្វើឱ្យខូចខាតដោយចេតនាមានស្ថានទម្ងន់ទោសតាមបញ្ញត្តិមាត្រា ៤១១ នៃក្រមព្រហ្មទណ្ឌ និងដាក់ឱ្យស្ថិតក្រោមការត្រួតពិនិត្យពីតុលាការ»។
តាមមាត្រា ៤១១ នៃក្រមព្រហ្មទណ្ឌនេះ ប្រសិនបើតុលាការរកឃើញថា ពិតជាបានប្រព្រឹត្តបទល្មើសដូចការចោទប្រកាន់មែននោះនឹងត្រូវផ្តន្ទាទោសដាក់ពន្ធនាគារពី ២ ឆ្នាំទៅ ៥ ឆ្នាំ និងពិន័យប្រាក់ពី ៤ លានទៅ ១០ លានរៀល។
តាមកំណត់ហេតុនគរបាលខេត្តបង្ហាញថា ក្រុមក្មេងទំនើងទាំង ២ ក្រុមដែលខ្លះជាសិស្សហើយក្នុង ១ ក្រុមៗមានគ្នាពី ៦ ទៅ ៨ នាក់ សុទ្ធតែលេងបណ្តាញសង្គម TiK Tok ដូចគ្នា។ ការលេង TikTok នោះក្រុមម្ខាងៗបានទាស់សម្តីគ្នា ហើយក៏ណាត់ជួបវាយគ្នាបណ្តាលឱ្យខូចខាតម៉ូតូចំនួន ២ គ្រឿង ដែលជាមធ្យោបាយបង្កបទល្មើស ប៉ុន្តែមិនគ្រោះថ្នាក់ដល់អាយុជីវិតទេ។
កំណត់ហេតុបង្ហាញបន្តថាបន្ទាប់ពីទាំង ២ ក្រុមបង្កហិង្សាវាយតប់គ្នាមក សមត្ថកិច្ចបានស្រាវជ្រាវឃាត់ខ្លួនជនសង្ស័យបានទាំង ២ ក្រុមដោយក្រុមឈ្មោះ Boy Srer ចាប់បាន ៨ នាក់ និងក្រុមឈ្មោះ Boy Loy ចាប់បាន ៧ នាក់។ ក្នុងនោះសមត្ថកិច្ចដកហូតបានកាំបិតខ្វែវចំនួន ១ ដើមពីក្រុម Boy Loy៕