.jpg)
ជនសង្ស័យ ក្រោយពេលសមត្ថកិច្ចចាប់ខ្លួនកាលពីថ្ងៃទី ៦ តុលា។ រូបថត ប៉ូលិស
ភ្នំពេញ: ចៅក្រមសាលាដំបូងរាជធានីភ្នំពេញពីថ្ងៃទី ១១ តុលា បានសម្រេចឃុំខ្លួនជនសង្ស័យ ៣ នាក់ក្នុងពន្ធនាគារ ខណៈ ២ នាក់ផ្សេងទៀតត្រូវបានចៅក្រមកំពុងសាកសួរ បន្ទាប់ពីមន្ត្រីជំនាញមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិបានបញ្ជូនជនសង្ស័យ ៥ នាក់ទៅតុលាការ ក្រោយពីឃាត់ខ្លួនក្នុងករណីជួញដូរគ្រឿងញៀន ២ ករណីផ្សេងគ្នា។
លោក គុជ គឹមឡុង អ្នកនាំពាក្យសាលាដំបូងរាជធានីភ្នំពេញបានថ្លែងពីថ្ងៃ ១១ តុលាថា ចៅក្រមស៊ើបសួរនៃសាលាដំបូងរាជធានីភ្នំពេញបានសម្រេចឃុំខ្លួនជនសង្ស័យចំនួន ៣ នាក់រួមមាន ទី ១- ឈ្មោះ CONTH ABDUL, ទី ២- ឈ្មោះ OGAN DIMMA LGWE LINUS និងទី ៣- ឈ្មោះ ហាន លីស ភេទស្រី ជនជាតិខ្មែរនៅពន្ធនាគារបណ្ដោះអាសន្ន ដោយចោទប្រកាន់ពីបទដឹកជញ្ជូន រក្សាទុក និងជួញដូរគ្រឿងញៀនខុសច្បាប់។
លោកបន្តថា ចំណែកករណីជនសង្ស័យចំនួន ២ នាក់រួមមាន ឈ្មោះ ឈន មករា អាយុ ៣១ ឆ្នាំ និងឈ្មោះ តែម ជីមី ត្រូវបានលោក សេង គឹមឡាក់ ព្រះរាជអាជ្ញារងនៃសាលាដំបូងរាជធានីភ្នំពេញបានសម្រេចចោទប្រកាន់ពីបទរក្សាទុកដឹកជញ្ជូន និងជួញដូរគ្រឿងញៀនដោយខុសច្បាប់ដោយបានបញ្ជូនសំណុំរឿងទៅចៅក្រមស៊ើបសួរដើម្បីបន្តនីតិវិធីច្បាប់។
លោកថា៖ «ករណីជនសង្ស័យ ៣ នាក់ត្រូវបានតុលាការសម្រេចចោទប្រកាន់និងឃុំខ្លួនហើយ។ រីឯសំណុំរឿងជនសង្ស័យ ២ នាក់ត្រូវបានចៅក្រមកំពុងស៊ើបសួរតាមនីតិវិធីច្បាប់ ហើយបើមានការសម្រេចយ៉ាងណាទៀតខ្ញុំនឹងជម្រាបជូនពេលក្រោយទៀត»។
លោក ឡឹក វណ្ណៈ នាយកមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិបានថ្លែងពីថ្ងៃទី ១១ ខែតុលាថា មន្ត្រីជំនាញនៃមន្ទីរប្រឆាំងគ្រឿងញៀនបានបញ្ជូនជនសង្ស័យ ៥ នាក់ទៅសាលាដំបូងរាជធានីភ្នំពេញកាលពីថ្ងៃទី ៩ ខែតុលា បន្ទាប់ពីឃាត់ខ្លួនក្នុង ២ ករណីផ្សេងគ្នាកាលពីថ្ងៃទី ៦ និងថ្ងៃទី ៧ ខែតុលា។
លោកបន្តថា ប្រតិបត្តិការនេះធ្វើឡើងក្រោមការបញ្ជាផ្ទាល់ពីនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងនាយឧត្តមសេនីយ៍ ម៉ក់ ជីតូ ក្រោមការសម្របសម្រួលពីតំណាងអយ្យការអមសាលាដំបូងរាជធានីភ្នំពេញ ទើបឈានទៅបង្ក្រាបករណីគ្រឿងញៀននៅសង្កាត់កន្ទោក ខណ្ឌកំបូល ដោយឃាត់ខ្លួនជនសង្ស័យ ២ នាក់ជាមួយនឹងវត្ថុតាងគ្រឿងញៀនប្រភេទមេតំហ្វេតាមីន ICE ១០ កញ្ចប់ ប្រហែល ១ គីឡូក្រាម។
លោកថា ករណីដាច់ដោយឡែកមួយទៀតនៅថ្ងៃទី ៦ ខែតុលាសមត្ថកិច្ចជំនាញគ្រឿងញៀនសហការជាមួយក្រុមហ៊ុនបញ្ញើទំនិញទៅក្រៅប្រទេសបានត្រួតពិនិត្យកញ្ចប់បញ្ញើមិនប្រក្រតីមានបង្កប់គ្រឿងញៀនក្នុងសៀវភៅ។ ក្នុងនោះសមត្ថកិច្ចឆែកឃើញមានថ្នាំញៀនប្រភេទមេតំហ្វេតាមីន (ICE) ទម្ងន់សុទ្ធ ៩៩៣,៤២ ក្រាមដោយទៅឃាត់ខ្លួនសង្ស័យចំនួន ៣ នាក់។
លោក ឡឹក វណ្ណៈ បានបញ្ជាក់ថា៖ «ក្រោយបញ្ចប់ការសួរនាំជនសង្ស័យទាំង ៥ នាក់ យើងបានបញ្ជូនជនសង្ស័យ រួមនឹងវត្ថុតាងទៅសាលាដំបូងរាជធានីភ្នំពេញ ដើម្បីផ្ដន្ទាទោសតាមផ្លូវច្បាប់ ហើយរឿងនីតិវិធីបន្តបែបណាខ្ញុំអត់ទាន់ដឹងទេ ព្រោះវាជានីតិវិធីរបស់តុលាការចាត់ចែង»។
បើតាមរបាយការណ៍របស់មន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិ ការបង្ក្រាបនៅភូមិកន្ទោកជើង សង្កាត់កន្ទោក ខណ្ឌកំបូលនោះ សមត្ថកិច្ចបានឃាត់ខ្លួនជនសង្ស័យឈ្មោះ ឈន មករា អាយុ ៣១ ឆ្នាំ និងឈ្មោះ តែម ជីមី អាយុ ២៦ ឆ្នាំ ដោយដកហូតវត្ថុតាងថ្នាំញៀនប្រភេទមេតំហ្វេតាមីន ICE ១០ កញ្ចប់ ប្រហែល ១ គីឡូក្រាម, ជញ្ជីងថ្លឹងគ្រឿងញៀន ១ គ្រឿង,ទូរស័ព្ទ ៤ គ្រឿង និងសម្ភារប្រើប្រាស់វេចខ្ចប់មួយចំនួនទៀត។
របាយការណ៍ដដែលបន្តថា ចំណែកការបង្រាបនៅថ្ងៃទី ៦ ខែតុលា សមត្ថកិច្ចជំនាញបានសហការជាមួយក្រុមហ៊ុនទទួលបញ្ញើទំនិញមួយ និងដោយមានការសម្របសម្រួលពីលោក សឿន មុនីរ័ត្ន ព្រះរាជអាជ្ញារងនៃសាលាដំបូងរាជធានីនៅភ្នំពេញបានត្រួតពិនិត្យកញ្ចប់បញ្ញើមិនប្រក្រតីដែលបង្កប់គ្រឿងញៀនក្នុងសៀវភៅ។ ករណីនេះសមត្ថកិច្ចបានឃាត់ខ្លួនជនសង្ស័យ ៣ នាក់រួមមាន ទី ១- ឈ្មោះ CONTH ABDUL អាយុ ៣៩ ឆ្នាំ ជនជាតិសៀរ៉ាឡេអូន, ទី ២- ឈ្មោះ OGAN DIMMA LGWE LINUS អាយុ ២៩ ឆ្នាំ ជនជាតិនីហ្សេរីយ៉ា និងទី ៣- ឈ្មោះ ហាន លីស ភេទស្រី អាយុ ២៨ ឆ្នាំជាមួយនឹងវត្ថុតាងថ្នាំញៀនប្រភេទមេតំហ្វេតាមីន (ICE) ទម្ងន់សុទ្ធ ៩៩៣,៤២ ក្រាម៕
