ប៉ៃលិនៈ តុលាការខេត្តប៉ៃលិនកាលពីល្ងាចម្សិលមិញបានសម្រេចឃុំខ្លួនបុរសម្នាក់ក្នុងពន្ធនាគារខេត្ត បន្ទាប់ពីជននេះបានប្រគល់ខ្លួនតាមដីកាជូនសមត្ថកិច្ចពីថ្ងៃទី ១ ឧសភា ក្រោយពីប្រើហិង្សាលើប្រពន្ធ នៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ រួចគេចខ្លួន ។
លោកស្រី ស ចិន្តា ស្នងការរងទទួលបន្ទុកផែនប្រឆាំងការជួញដូរមនុស្សខេត្តប៉ៃលិនបានឱ្យដឹងនៅថ្ងៃទី ៣ ឧសភានេះ ថា ជនត្រូវចោទ ឈ្មោះ អ៊ាន អំ អាយុ ៣៦ ឆ្នាំ ជាកម្មករសំណង់។ ជននេះត្រូវបានសមត្ថកិច្ចបញ្ជូនទៅឃុំក្នុងពន្ធនាគារខេត្តកាលពីល្ងាចថ្ងៃទី ២ ឧសភាទៅតាមដីការបស់សាលាដំបូងខេត្តពាក់ព័ន្ធករណីវាយប្រពន្ធឈ្មោះបាត់ សាវេត។
លោកស្រីបន្តថា៖ «ជនម្នាក់នោះ ខ្ញុំអនុវត្តតាមដីកាបង្គាប់ឱ្យចាប់ខ្លួនរបស់លោកចៅក្រមស៊ើបសួរលោក លី ម៉េង ពាក់ព័ន្ធបទចោទប្រើអំពើហិង្សាប្រព្រឹត្តដោយអនីតសង្វាសជនតាមមាត្រា ២២២ នៃក្រមព្រហ្មទណ្ឌ»។
ពាក់ព័ន្ធមាត្រា ២២២ នៃក្រមព្រហ្មទណ្ឌនេះ ប្រសិនបើតុលាការរកឃើញថាបុរសរូបនេះពិតជាបានប្រព្រឹត្តដូចការចោទមែននោះនឹងត្រូវប្រឈមការផ្តន្ទាទោសដាក់ពន្ធនាគារចន្លោះពី ២ ឆ្នាំដល់ ៥ ឆ្នាំ និងពិន័យប្រាក់ចូលថវិការដ្ឋពី ៤ ទៅ ១០ លានរៀល។
លោក មាស សារ៉ន អធិការនគរបាលស្រុកសាលាក្រៅបានប្រាប់ភ្នំពេញប៉ុស្តិ៍នៅថ្ងៃទី ៣ ឧសភានេះដែរថា បុរសឈ្មោះ អ៊ាន អំ ម្នាក់នេះតែងតែប្រើអំពើហិង្សាវាយដំលើប្រពន្ធរបស់ខ្លួនស្ទើររាល់ថ្ងៃ ប៉ុន្តែមិនបង្កជារបួសស្នាមធ្ងន់ធ្ងរទេ។
លោកបាននិយាយតាមសម្តីស្ត្រីជាប្រពន្ធថានៅថ្ងៃកើតហេតុថ្ងៃទី ២៨ មេសាគឺបុរសរូបនេះបានវាយទាត់ធាក់លើគាត់ បន្ទាប់មកក៏រត់គេចខ្លួនឡើងលើភ្នំនៅក្បែរភូមិក្រោយពេលស្ត្រីរងគ្រោះរត់ទៅប្តឹងនៅប៉ុស្តិ៍នគរបាលរបស់លោក។ បន្ទាប់មកសមត្ថកិច្ចបានបញ្ជូនសំណុំរឿងនេះទៅតុលា និងបានសុំដីកាតាមចាប់ខ្លួន។
លោកបានបញ្ជាក់ថា៖ «ជននេះគាត់ភ័យហើយបានរត់ទៅសម្ងំលើភ្នំតែសាច់ញាតិគាត់បានលួងលោមពន្យល់គ្រប់បែបយ៉ាងទើបគាត់ព្រមមកប្រគល់ខ្លួនឱ្យយើងចាប់តាមសម្រួលទៅ»៕